Read Abun 1 Timotius 5 Bible Online

1 Timotius 5 - Abun bible

1 Timotius 5

¹Nan ndantom ye gato sye nyim kadit nan nde, wo nan duno ye gato sye nyim pare, tepsu nan duno nan dakai bi ai. Nan ben suk su pa yemsok tepsu nan ben suk su nan bi nji.

²Nan ben suk su nggon gato sye nyim kadit nan tepsu nan ben suk su nan bi im. Nan ben suk su nggon gato bi im pe wari kadit nan tepsu nan ben suk su nan bi nyanggon. Nan mewa nan nggwa subere nan ben suk mwa su nggon ne sisu ndo sor, kwa gato ibit wokgan yo dom nde.

³Nan mewa nggonna gato yé yo ós nde,

⁴wo nggonna gato bi pa si bi dat mó it yo, nan duno bi pa ne subere pa benbot sukduno gato men onyar kem mó, sare do, pa mewa pa dakai bi im si bi dat gato nggonna ne sor. Suga nyim nggonna ne kamba wa kon bi pa si bi dat ne, sane pa ne waii mewa bi im si bi dat ne tepsu nggonna ne bi kamba mo an, we Yefun Allah iwa men ben sane.

⁵Nggonna gato ye yo ós nde, wo mom wadigan sor ré, nggonna ne kwabom kam mo Yefun Allah, mom ki suk su Yefun noru nombrak sor, subere Yefun Allah ós mom.

⁶Sarewo nggonna gato ben bi suk-i ket mom í sor, mom da mbau, sarewo Yefun Allah bi sukjimnut mo nggon ne do, nggon ne kwop ré.

⁷Nan duno nggonna si bi rus ne sino, subere ye yo ku os wa ye ki án gum ibit mo nggonna ne nde.

⁸Ye gato yo mewa an bi nje mo sukye gato yé ne ku nde, tepsu an misyar Yefun bi sukduno-i it anane. Sane dom, ye gato yo mewa an dakai bi rus-i nde anato ibit wai o ré, an ben an bi suk-i ibit wai kadit ye gato jam nde Yefun.

⁹Sagana mo men bi nu ari men krom nggonna gum gato yewa suk subere men mewa nggonna ne. Sane nan krom nggonna gum sok mo daftar ne daret nde. Nggonna gato nan sok gum mo daftar ne yo, nggonna sato re, nggonna gato ndin, gato kaim sa kom mo tahun musyu mumat wai, ete nan krom nggonna ne gum mo daftar. Nggonna gato suga nyim kem not su bi ya ge dik sor, ete nan krom nggonna ne gum mo daftar.

¹⁰Nggonna ne yé mwa jam do, mom ben bi suk-i ndo sato re, mom kon mom bi pa sisu ndo e; yé yo ma mo mom bi nu yo, mom iwa, mom syo sugit nai e; mom ben suk tepsu pakwerut wa ós ye gato onyar kem mo Yefun Yesus e; mom ós ye gato ku sukye e; mom ben suk mwa gato ndo petok su mom mit dik mom inyar dik sor e ne.

¹¹Nggonna gato ben bi suk-i sane, nan krom mom gum sok mo nggonna bi daftar mo nu ari, Sarewo nggonna gato yo din nde tó, nan sok nggonna ne gum nde, sawe nggonna sane bere mit at wa yebris wa mom kra o wai kadit mom ben Kristus bi suk-i, sane bere mom misyar Yesus Kristus bi suk-i or ré.

¹²Sato mom tom do, mom ben Kristus bi suk-i sor, orete mom yo benbot suk gato mom tom ne nde, wo mom kra kadit it yo, bere siri ré. Bere Yefun Allah syo sukye nai mom mone.

¹³Sane dom, nggonna gato ben bi suk-i sane, mom owa mom kamo, mom mubot nu, mom yo ben suk nde. Suk sane sor nde, wo nggonna gane ben suk gato ibit wai sato re, mom ki sukwok e, mom sok mom bi sukdu-i daret mo ye yi bi et-i gato ye kibot ne e, mom nukbot sukibit bu e ne.

¹⁴Sane anato ji dakai duno nggonna gato yo din nde tó subere mom kra sor, mom pe pa, mom mewa mom bi pa si mom bi ya mo bi nu-i, subere ye gato bariket men yo ku os wa ki men gum ibit mone nde.

¹⁵Ye ki men gum ibit mó ré, we nggonna ge bok yo brek kadit Yefun Allah bi os-i, ete sibot biris bi yekwesu bi os-i o ré.

¹⁶Sarewo nggon gato onyar kem o Kristus ne, mom bi im e bi dat mo mom bi rus-i gato nggonna it yo, nggon ne mewa ngonna ne sor ré. Nggon ne ndekwa yekwesu mo nu ari mewa nggonna ne nde, subere yekwesu mo nu ari mewa nggonna gato bi nje-i gato ós mom yo mo nde.

¹⁷Yekwesu mo nu ari gato ben suk mone sisu ndo yo, men bes án gum kok, men syo suk nai án mo án bi kamba mone tep yi sor nde, wo mwa wai kadit ne et. Yekwesu gato faiya si duno nje, men bes án gum kok, men syo suk nai án wai kadit yekwesu yi ne,

¹⁸we, ye krom mo Yefun Allah bi sukdu suga nyim tuya ne do, “Sapi yakos gandum gro syesyar kadit i-dar yo, men far sapi syokwet mone nde, {wo men misyar sapi git napyo tepsu sapi bi kamba sor.}” Ye krom o do, “Ye gato ben suk, ye syo sugum nai an tepsu an bi kamba mone et.”

¹⁹Yetu ge dik yo nuk yekwesu mo nu ari ne gum ibit yo, nan misyar sor, wo yetu ge we yo, ge gri yo, nuk yekwesu mo nu ari ne gum ibit, nan jambot sukdu ne, {nan kendo yepasye ma sum wa kibot sino et.}

²⁰Yekwesu mo nu ari gato ben sukibit ne yo, nan ndantom mo yé mwa gwem, subere yé mwa mone nyuwa ben sukibit.

²¹Ji kiwa nan benbot ji bi sukdu-i re, nan tom su ji mo Yefun Allah, Yesus Kristus si malaikat gato Yefun fro suga nyim wa ben Yefun bi suk-i sino ne gwem et. Nan tom su ji subere nan benbot suk gato ji krom re sisu ndo et. Nan ben suk su yé mwa ne tepsu yu sino, nan ós deyo, nan misyar deyo nde, wo nan ós yé mwa ne sino tepsu yu sor.

²²Sane, nan ak syim mo yetu ge dik yo wa bes an wa ben Yefun bi suk-i kekro nde, nan bes nje daret nde, nan nut subot sisu ndo et. Nan bes an kekro teker nde, sawe an ben sukibit ete ye ki nan gum ibit mone o ré. Nan mewa nan nggwa subere nan ben nan bi suk-i ndo sino, kwa gato ibit yo mo nde.

²³Ji jam do, nan i dek, nan on i dek, sane nan da syur sor nde, wo nan da nau anggur wokgan dom et, subere ós nan on, subere nan on yo i teker nde.

²⁴Sukibit gato yetu deyo ben ne, napyo bor wa yé mwa jam do, bere yé ne ku sukye mone tó. Sarewo sukibit gato yetu deyo o ben ne, yo bor sugane nde, wo kom mo rut sa, bere yé mwa ne jam mone tó.

²⁵Sane dom, sukndo gato ye ben ne, bere bor wa yé mwa jam. Sane o, sukndo gato yo bor nde, bere kom mo rut sa, yé mwa jam mone tó.