Read Abun 1 Timotius 6 Bible Online

1 Timotius 6 - Abun bible

1 Timotius 6

¹Ye Kristen gato gum kwerut wa yenggras dik yo, an nut mo an bi yenggras ne do, yenggras ne gum kok, ete an jammo an bi yenggras sisu ndo sor, subere ye yo ku os wa ki Yefun Allah gum ibit nde. An jammo an bi yenggras subere ye yo ku os wa ki do Yefun Allah bi sukduno ibit dom nde.

²Pakwerut gato bi yenggras onyar kem mo Kristus ne, ete pakwerut ne nut do, yenggras ne tepsu an bi nji sor ré, sane an yo jammo yenggras ne sisu an mit dik nde, bere siri ré. Kapre an nut do yenggras ne tepsu an bi nji, an ben suk su an mit dik wai o ré, we an jam do, an ós an bi yenggras gato onyar kem mo Kristus, an ós an bi yenggras gato an jimnotku ne. Nan duno nje, nan wergat nje subere yé benbot sukduno mwa gato ji krom re et.

³Yé gato duno nje su sukduno daret gato siri kadit men bi Yekwesu Yesus Kristus bi sukduno-i gato sangge, yé gato duno nje su sukduno gato siri kadit Yesus Kristus bi sukduno-i gato kadum Yefun bi os-i nai men ne yo,

⁴yé ne jam nde suk, yé ne at ndo nde. Án bi sukjimnut ne kwop ré, án iwa án duwer ye yi, ete án maskwa ye ne subot sukdu kwa bok yo gato án ki ne. Sane anato ri ma yé on sa ket yu mo sukdu ne, yé ben sukndi su yu, yé ki yu ket kwayo-kwayo, yé syidem syu yu subot suk gato ibit.

⁵Sane yé gato bi sukjimnut ibit maskwa yu petok sor. Yé ne jam nde Yefun Allah bi sukduno gato sangge ne ware. Án nut do, án ben Yefun bi suk-i subere án ku suk mwa mone.

⁶Sarewo men kem not su suk gato men ku ne, men yo bi sukjimnut mwa subot suk ne nde, ete men ben Yefun bi suk-i ne yo, bere men ku suk mwa gato ndo it anane,

⁷we men bi im kem su men it yo, men yo gwat suk yo ma mo bur re nde. Sane dom, bere men kwop it yo, men yo gwat suk yo mu kadit bur re dom nde.

⁸Sane men bi sugit si san do mó yo, tep it anane, men kem not sor, men bi sukjimnut waiyu bot suk mwa neya o nde.

⁹Sarewo ye gato iwa ku suk mwa ne, bere an ges mo os ibit ré. Ye gato iwa ku suk mwa ne, an tepsu suge gato bus sip, ete an ku sukye mwa ndo nde mone. Suk mwa gato an iwa ne ben an bi sukjimnut ibit. Suk mwa ne ben an bi sukjimnut tepsu ye gato jimgon, anato kom mo rut yo, suk mwa gato an iwa an ku ne ben an ibit or ré,

¹⁰we men bi sukjimnut sye kas subot sugum yo, bere men ben sukibit mwa bor mone. Yé bok yo werwa ku sugum mwa teker anato án misyar Yesus Kristus bi sukdu-i or ré, ete án ku sukye mwa ndo nde. Án kem, án nderbot án nggwa ndo nde.

¹¹Sane, Timotius, nan gro sye wa sugum nde, wo nan mu yak yi kadit ré. Nan gum sok mo Yefun Allah bi rus-i, sane nan ben sukibit nde. Nan wergat nan dakai subere nan ben nan bi suk-i ndo tepsu Yefun Allah mit sor. Nan bi nan nggwa mo Yefun Allah wa ben Yefun bi suk-i sor. Nan onyar kem mo Kristus. Nan bi sukjimnut sye kas subot ye yi neya. Kapre nan ku sukye, nan misyar Yefun nde, wo nan ben An bi suk-i njep su ye yi neya petok sor.

¹²Nan wergat nan dakai su nan mit dik nan onyar dik, subere nan ben nan bi suk-i tepsu ye gato onyar kem mo Kristus, subere nan kem ndo to kapyo mato kapyo, we kam gato nan ki rer mo yé mwa gem do, nan onyar kem mo Kristus it, Yefun Allah anato nai nan wa nan si An kem ndo to kapyo mato kapyo mone.

¹³Sane su re, ji kiwa nan tom suk yo mo Yefun Allah si Yesus Kristus gwem et. Nan tom suk ne mo Yefun Allah gato bi mas mo suk mwa gato mbau mo bur re ne gwem. Nan tom suk ne mo Yesus Kristus gato ki bi sukdu-i rer mo Pontius Pilatus ne gwem.

¹⁴Nan tom Yefun Allah si Yesus Kristus ne do, bere nan benbot sukdu mwa gato men duno nan su ne, kwa yo gwet mo nde. Nan benbot sukduno ne sor kom mo kam gato men bi Yekwesu Yesus Kristus satu ma mo bur re ré.

¹⁵Kam gato Yefun Yesus satu ma mo bur re, Yefun Allah dakai fro ré. Yefun Allah anato Yekwesu gato gum kok wai kadit yesu mwa ne o ré. An sor ete jowa yé mwa mo bur re or sino. An anato Yeraja gato nggi wai kadit yeraja mwa ne sino. An anato Yekwesu gato nggi wai kadit Yekwesu mwa ne sino.

¹⁶An ka dik sor yo kwop nde, wo An ye gato gesyos. An kem mo pe gato rer teker, men yetu yo ku os wa men karowa An mone nde. Men yetu yo me An su men gro nde, men gro nokwa ré. Men yetu bes An gum kok, An nggiwa jowa men su re to kapyo mato kapyo. Sangge.

¹⁷Nan syaugat ye gato ku suk mwa mo bur re, subere án yo bes án nggwa kok mone nde. Suk mwa ne bergan mó, or o bergan or kadit men ré. Nan duno án subere án kwabom kam mo suk mwa gato án ku mo bur re dom nde, suk mwa ne yo ós án kem ndo to kapyo mato kapyo nde. Nan duno án subere án kwabom kam mo Yefun Allah gato syo suk mwa ne sino gato men mitmo, Yefun Allah syo suk mwa ne wai o ré, subere men ben suk tepsu pe gato men imo.

¹⁸Nan syaugat ye gato ku suk mwa mo bur re subere án ben suk gato ndo, subere án ben sukndo ne mwa, tepsu suk mwa gato án ku ne. Nan duno án subere án yo gro er wa suk nde, wo án iwa án syo suk mwa nai ye yi neya sor.

¹⁹Sane ye gato ku suk mwa, ete án do syo suk mwa ne napyo nai nje it yo, tepsu án sum suk mwa mo gu wa kam sari ne ma it anane. Sane bere án kem ndo sisu sangge to kapyo mato kapyo.

²⁰Timotius, Yefun Allah bi sukduno mwa gato Yefun grem kem su nan wa nan duno nje su ne, nan mewa sisu ndo et, nan jamwa pe sor. Sane ye ki subot sukduno gato siri kadit Yefun Allah mit yo, nan si nje kibot sukdu sino mone nde. Sane dom, ye duwer nan mo Yefun bi sukduno-i it yo, nan si nje duwer yu mo sukduno ne nde. Sukduno ne, yé bok ne ki do, “Sukjimnut kru,” anane, sarewo ye kidar kone. Nan si nje duwer yu mo sukduno ne nde,

²¹we yé bok yo gato jammo sukduno gato bi sukjimnut kru gane ges mo os siri or ré. Suga nyim án ki do, án onyar kem mo Yefun Yesus bi sukduno-i, sarewo su re án misyar Yefun bi sukduno-i ne o ré. Yefun ete mewa nan sor. Ndo mo nin sor, kadit Paulus