Read Abun 2 Timotius 1 Bible Online

2 Timotius 1 - Abun bible

2 Timotius 1

¹Surat re, ji krom wa nan, Timotius, ji bi pa gato ji jimnotku ndo nde. Ji gato gum do Paulus anato krom surat re wa nan. Yefun Allah bes ji gum yerasul wa ji ben Yesus Kristus bi suk-i. Ji mu ki sukdu subot os ndo gato Yefun Allah tom su men yetu subere men kem ndo. Yesus Kristus anato kak os ndo ne wa men kem ndo to kapyo mato kapyo. Men bi Ai, Yefun Allah si men bi Yekwesu Yesus Kristus ete mewa nan. Yefun Allah si Yesus Kristus ete jimnotku nan. Yefun Allah si Yesus Kristus ete uttok nan petok sor.

³Ji ki ndo mo Yefun Allah. Ji ben Yefun Allah bi suk-i tepsu ji bi amui, ji ben Yefun Allah bi suk-i sisu ji mit dik, kwa yo gato siri kadit ji bi sukjimnut gato ndo mo ji mit yo mo nde. Ji ki suk su Yefun Allah sa, ji napawa nan petok sor, ji ki ndo mo Yefun wa nan. Noru nombrak, ji ki ndo mo Yefun Allah wa nan petok sor.

⁴Ji napawa tomgato men ka we top yu, nan wo, nan jimnotku ji ndo nde. Sane ji da o wa men ka we ku yu o et. Ji iwa men ka we ku yu subere ji mit at wa wai o ré.

⁵Ji napawa do, nan sa, nan onyar kem mo Kristus sisu sangge tepsu nan bi dat gato gum do Lois si nan bi im, Eunike. Ji nut do, sangge, nan onyar kem pe mo Kristus sato nan bi im si nan bi dat ne dom.

⁶Sane, ji krom suknapa wa nan do, nan wegat nan nggwa, subere suktinggi gato Yefun Allah Gen syo nai nan tomgato ji ak ji syim mo nan, nan misyar nde, wo nan werwa suktinggi ne bor mo suk gato nan ben ne mwa o et,

⁷we Yefun Allah Gen gato bok nggwa mo men, yo ben men nyuwa suk nde, wo An gen ben men nggi wai kadit suk bok neya. An Gen ben men nggiwa men bi sukjimnut kas subot ye yi neya. An Gen ben men nggiwa men mewa men nggwa subere men ben sukdaret nde.

⁸San nan nyuwa nan ki sukdu subot men bi Yekwesu Yefun Yesus nai nje nde. Nan damen wa ji gato ye grem mo sel re nde, we ji ki subot os ndo gato Yesus Kristus kak ne anato ye grem ji mo sel mone. Nan ki subot os ndo gato Yefun Yesus kak wa men yetu ne, nan nyuwa nde, wo Yefun Allah ete ben nan nggiwa nan waii ku sukye mone sato ji ku ré.

⁹Yefun Allah fro os ndo wa nai men wé kadit bot gesyos, subere men kem ndo to kapyo mato kapyo. Yefun Allah kiwa men brek ma kadit os ibit gato men muket ne, ete men tepsu An bi rus-i ben An bi suk-i gato ndo petok sor. An yo me mo sukndo gato men ben ne nde, wo An dakai fro An bi os-i, An dakai bi sukjimnut sye kas subot men yi sor, men yo ben suk yo nyim wa An nde. Sane anato An yo ut bur re nde tó, An fro os ndo ne su Yesus Kristus nyim wé ré, subere ri ma Kristus ma wa kak os ne wa men ré.

¹⁰Sane su re, Yefun Allah bi sukjimnut sye gato kas subot men dakai yi ne bor ré. An syogat Yesus Kistus ma mo bur re subere Kristus kak os ndo wa men kem ndo to kapyo mato kapyo ne it. Yesus Kristus kak os ndo wa men, An ben suktinggi gato gu men yetu kwop ne ibit or ré, ete An kak os wa men kem gesyos sor.

¹¹Sukdu subot os ndo gato Yesus Kristus kak ne anato Yefun Allah syogat ji mu kibot ré. Yefun Allah bes ji gum yerasul si yeguru wa ji mu ki subot sukdu ne ré.

¹²Ji ki subot sukdu ne anato ji ku sukye mwa re, sarewo suk yo nde, ji yo damen nde, we Yefun Yesus gato ji onyar kem mó, ji jam kom mo mit ré. Sukdu gato Yefun Yesus bes ji wa ji ki subot ne, bere An mewa sukdu ne sor, sukdu ne yo ges nde. Bere An mewa sor, kom mo kam gato An satu ma mo bur re, ji jamwa ré.

¹³Sane nan simo sukdu gato sangge, gato ji duno nan su ne sor, nan simo sisu nan mit dik si nan onyar dik et. Nan simo sukdu ne yo, nan onyar kem mo Yefun Yesus, nan bi sukjimnut sye kas subot ye yi petok sor, tepsu Yesus Kristus ben ne.

¹⁴Yefun Allah bes nan wa nan ki subot sukdu gato ndo wai o ré, sane nan mewa sukdu gato Yefun Yesus grem kem su nan, subere napyo ges nde. Bere Yefun Allah Gen, gato bok nggwa mo nan, bere ben nan nggiwa mewa sukdu ne.

¹⁵Nan jam do, yé mwa ne sino mo bur Asia misyar ji ré. Figelus si Hermogenes dom misyar ji ré.

¹⁶Sarewo Onesiforus si bi rus ba ku ji, án ma ben ji mit ndo wam bok yo ré. Kapre ji kem mo sel, an yo damen wa an ba ku ji more nde. Yefun ete dakai ben sukndo su án sor.

¹⁷Onesiforus ma kom mo kota Roma sa, an mere ji it anane. An werwa an meret ji sane sor, wade an ku ji mo sel re ré.

¹⁸Nan jam do, tomgatu ji kem mo kota Efesus tó, Onesiforus ós ji mo suk mwa mone. Yefun Allah ete dakai ben sukndo su an su kam gato Yefun Allah ma ndobot yetu mwa ne sino.