Read Abun 2 Timotius 2 Bible Online

2 Timotius 2 - Abun bible

2 Timotius 2

¹Timotius, ji bi pa, Yesus Kristus dakai bi sukjimnut sye kas subot men yi, men yo ben suk yo nyim wa An nde, sane nan jom sukdu ne pe subere nan bi sukjimnut nggi mone.

²Sukdu gato nan jam tomgatu ji duno nan mo yé mwa gwem ne, nan waii duno ye gato jam duno ye yi sisu ndo, gato ben bi suk-i ri-roi et, subere án waii duno nje su sukduno ne o.

³Nan dom, bere ku sukye tepsu men. Nan tepsu Yesus Kristus bi yesukmise gato benbot nan bi Yekwesu bi sukdu. Sane nan ku sukye yo, nan misyar Yefun nde, wo nan ben An bi suk-i petok sor.

⁴Yesukmise gato benbot án bi yekwesu bi sukdu it yo, án yo ben suk yi nde, wo án iwa án ben suk tepsu án bi yekwesu mit sor.

⁵Sane dom, ye gato simo sukkamo, ete an yo simo tepsu pe gato ye fro ne sisu sangge nde yo, bere ye yo syo suk yo nai an tepsu juara mone nde.

⁶Ye gato samok wa ben nggwe, ete sukjan mo nggwe ne do kri it yo, an anato mu nai sugit mone nyim kadit ye yi neya.

⁷Nan nutbot sukdu gato ji krom ne sisu ndo et, bere Yefun Allah kak nan bi sukjimnut subere nan jam sukdu bok ne rer ré.

⁸Nan bi sukjimnut kem mo Yesus Kristus sor. An anato Daud bi dat. An anato sun kadit sukkwop o ré. Yesus Kristus ne kak os ndo wa men yetu ne. Ji duno nje subot os ndo ne

⁹anato ji ku sukye ré. Ye rai ji su rantai tepsu ye rai ye gato ben sukibit. Sarewo ye yo bi os wa ye rai Yefun Allah bi sukdu ne su rantai nde.

¹⁰Sane sukye bok yo gato ji ku ne, ji misyar, ji duno nje gat sor, we ji bi sukjimnut mo yé gato Yefun Allah fro suga nyim wa An nai sok mo An bi rus-i ne. Ji duno án su sukdu subot Yesus Kristus, subere án kem ndo to kapyo mato kapyo mo os gato Yesus Kristus kak ne. Ji duno án subere án si Yefun Allah kem ndo su yu mo Yefun bi nat-i gato ndo wai o ré.

¹¹Sukdu gato ji krom re sangge, “Men do kwop su Yefun Yesus yo, bere men si An kem ndo to kapyo mato kapyo dom.

¹²Kapre men ku sukye, men misyar Yefun nde, wo men simo An pe sor, sane yo, bere men si An tepsu yekwesu sino. Men do rewa An yo, bere An rewa men dom.

¹³Men do misyar An yo, bere An yo misyar men nde, we An mit kem mo men, sane An yo ben suk siri kadit An mit nde.”

¹⁴Nan ki subot sukdu re subere yé mwa napawa pe. Nan duyawa nje subere án duwer yu mo sukdu kwa wokgan bok neya nde. Yé duwer yu mo sukdu wokgan sane bere yo ós nje nde, wo yé duwer yu sane bere ben nje ibit mo koirut sor.

¹⁵Nan wergat nan dakai subere nan ben Yefun Allah bi suk-i, subere Yefun Allah imo suk gato nan ben ne. Nan wergat nan dakai subere nan damen mo suk gato nan ben nde. Nan wergat nan dakai subere nan duno nje su sukduno gato sangge kadit Yefun Allah sisu ri-roi sor.

¹⁶Ye ki subot sukduno gato siri kadit Yefun Allah mit yo, nan si nje kibot sukdu sane nde. Yé gato iwa nukbot sukdu sane yo, bere án ben bi suk-i ibit mwa wai kadit nyim ne o ré.

¹⁷Sukduno siri gato ye nukbot ne tepsu suki wip mok gato git men ku mbu ete dat sane sor men kwop mone. Ye ka we gato gum do Himeneus si Filetus an we duno nje su sukduno siri sane ré.

¹⁸An we misyar Yefun Allah bi sukduno-i gato sangge. An we duno nje su sukduno gato siri. An we ki do, yé mwa gato Yefun Allah fro wa sun kadit sukkwop ne, Yefun Allah sun ete gwat mu mo gu or ré. Sane an we ki do, bere kam sari ne ma Yefun Allah yo sun ye yi yo o nde. An we duno nje sane anato yé bok yo onyar kem mo Yefun Allah bi sukduno-i ne o nde.

¹⁹Sarewo Yefun Allah bi sukduno-i kem pe kadit ketke. Yetu yo nggiwa rus sukduno kwa wokgan yo wé dom nde. Yefun Allah bi sukduno-i tepsu nu bi fondasi gato ye ut mo bur ketke wa ye syut kwedi mó. Mo fondasi mo bur ne ye krom do, “Yefun Allah jam ye gato sok mo An bi rus-i.” Ye krom o do, “Ye gato ki rer do, sangge an sok mo Yefun Allah bi rus-i yo, an kwet kadit sukibit mwa gato an ben suga nyim ne wé et.”

²⁰Mo nu sye mit sagana ye grem suk mwa sato, mbem e, brek e, ansyok e ne. Suk mwa ne ye ben deyo su perak e, deyo su emas e, deyo su bur ndak e, deyo suk kwe e ne. Suk ne deyo ye ben suk su kamdik-kamdik sor. Suk ne deyo ye fro wamdik-wamdik wa yepasye ma git mó.

²¹Ye gato mewa nggwa kadit an ben sukibit mwa neya, an tepsu mbem gato tep wa yepasye git mone. Ye gato mewa nggwa sane, an tepsu an bi yenggras bi suk-i gato yenggras grem wa ben suk gato ndo su. Yenggras ne grem ye ne kem ndek wade yenggas ne iwa ben suk gato ndo, ete yenggras nai ye ne wa ben suk ne.

²²Nan ben suk tepsu yemsok gato at wa sukdaret ne nde, nan misyar, nan mu yak yi kadit ré. Nan wergat nan dakai subere nan ben nan bi suk-i ndo tepsu Yefun Allah mit sor. Nan wergat nan dakai subere nan ben suk tepsu ye gato onyar kem mo Yesus Kristus. Nan wergat nan dakai subere nan bi sukjimnut sye kas subot ye yi neya. Nan wergat nan dakai subere nan si ye yi kem ndo su yu. Nan grem sukmaskwa mo nan mit nde. Nan si ye gato onyar kwo gato ndek Yefun Allah wa ós án ne ben suk sane sino sor.

²³Nan me ye gato jimgon duwer yu mo sukdu daret it yo, nan si ye ne duwer yu mo sukdu ne nde, we nan jam do, kom mo rut bere ye maskwa ket yu mo sukdu ne or ré.

²⁴Men yé gato ben Yefun Allah bi suk-i, men ki men bi sukdu-i it yo, men maskwa su nde, wo men ki men bi sukdu-i ne njep su yé mwa ne sino. Men duno nje sisu ndo, men duno pare, men maskwa kekro nde.

²⁵Men duno nje gato duwer men it yo, men duno sisu njep sor. Men duno sisu njep, we men iwa kapyo tak Yefun Allah kak ye ne bi sukjimnut subere an kwet kadit os ibit, ete an jammo sukdu gato sangge.

²⁶Men duno an sisu njep subere an jam nggwa, ete an simo sukduno gato sangge, subere an titi fro wé kadit biris bi yekwesu gato but an wa ben biris bi suk-i ne.