Read Abun Titus 1 Bible Online

Titus 1 - Abun bible

Titus 1

¹Ji gato gum do Paulus anato krom surat re wa nan, Titus, gato ji bi pa. Ji anato Yefun Allah bi pakwerut. Ji anato Yesus Kristus bi yerasul. Yefun Allah bes ji, ete syogat ji mu duno yé gato Yefun Allah fro suga nyim wa An nai sok mo An bi rus-i ne. Ji mu duno án subere án jam sukdu gato sangge, subere án onyar kem mo Yefun Allah, subere án ben Yefun bi suk-i.

²Án jammo Yefun Allah, we án kwabom kam mo Yefun Allah do, bere Yefun nai án gum sok mo Yefun bi rus-i, bere án si Yefun kem ndo to kapyo mato kapyo, tepsu Yefun Allah tom su men sugato An ut bur re nde tó. Suk gato Yefun Allah tom su men ne, bere An benbot sor, An yo kidar nde.

³Tepsu bi kam-i ne it, suk gato Yefun Allah tom ne bor wa yé mwa jam ré. Suk ne bor mo suk gato An tarubot ji. Yefun Allah gato fro os ndo wa men kem ndo to kapyo mato kapyo, An syaugat ji ki subot sukdu ne. Sane ji ki subot sukdu gato An tarubot ji ne sor.

⁴Titus, sangge, nan anato ji bi pa, we nan si ji men ka we sino onyar kem mo Kristus ré. Men bi Ai, Yefun Allah si Yesus Kristus men bi Yekwesu gato kak os ndo wa men kem ndo to kapyo mato kapyo, Yefun Allah si Yesus Kristus ete uttok nan petok sor.

⁵Ji mu kadit ef Kreta sa, ji kiwa nan kem mone, nan fro suk mwa mo nu ari gato men yo fro or nde. Sane ji kiwa nan kem mone subere nan bes yekwesu mo nu ari mo kota mwa ne sino tepsu ji duno nan su ne dom. Nan napawa sukduno gato ji duno nan subot yekwesu mo nu ari sare do:

⁶Ye gato nan bes gum yekwesu mo nu ari, an ye gato ben an bi suk-i ne ndo sor, kwa gato ibit yo mo nde; an ye gato kra nggon ge dik sor; an ye gato bi pá onyar kem mo Kristus, an bi pá ben bi suk-i ne ndo sor, ye ki an bi pá gum ibit mo gato pá ben sukdaret e, pá su krat e ne nde.

⁷Yekwesu mo nu ari ne Yefun Allah fro wa ben Yefun bi suk-i mo bur re, sane an ye gato ben an bi suk-i ndo sor, kwa gato ibit yo mo nde. An yo at nde, an yo maskwa dek nde. An yenau bu nde. An iwa ben sukndi nde. An gro sye wa sugum nde.

⁸An ben an bi suk-i sane nde, wo an iwa nje ma kem si an mo an bi nu ne sor. An iwa suk gato ndo sor. An mewa na nggwa subere an ben sukdaret nde. An ben suk su sangge sor, an yo kidar suk nde. An be Yefun Allah bi suk-i sor. An fro nggwa subere suk gato an ben ne kas sisu ndo.

⁹Sukduno gato sangge gato men duno an su ne, an grem sukduno ne pe mo an mit sor, subere yekwesu ne nggiwa an duno nje su sukduno ne. An jom sukduno gato sangge ne pe, subere an nggiwa an duwer ye gato ki bi sukduno-i siri kadit Yefun Allah bi sukduno-i ne.

¹⁰Nan bes yekwesu gato jom sukduno gato sangge ne, we yé mwa bariwa jammo sukduno gato ndo. Yé mwa ki sukdaret gato yo ós nje nde, yé mwa ne ki bi sukdu-i kidar nje sor ré. Ye gato ki bi sukdu-i sane mwa wai kadit ye yi anato ye gato simo ye Yahudi bi sukduno-i. Yé gane duwer men subere men simo sunat.

¹¹Nan duyawa yé gato ki bi sukdu-i sane, subere án yo ki sukdu sane o nde, we án duno nje su sukduno gato yo ri nde, anato án gwat rus bok yo mu ges mo os ibit mone. Án duno nje, án kidar nje sane, subere án ku suk mwa mone wa án dakai sor ré.

¹²Án bi yenabi ge dik yo gato ontu mo ef Kreta, wam dik yo ki sare do, “Ye Kreta kidar suk nggi bu. Ye Kreta tepsu suge krok gato iwa git sugit mwa, ete bambrai wa ben suk.”

¹³Sukdu gato yenabi ki ne sangge. Sane nan ndantom ye Kreta mone, subere án misyar sukibit gato án ben ne wé, ete án grem sukduno gato sangge ne pe mo án mit sor.

¹⁴Nan ndantom án subere án jammo ye Yahudi bi sukdu suski gato kam nyim ne o nde. Nan ndantom án subere án jammo ye gato bariwa sukduno gato sangge ne bi sukduno-i ne o nde.

¹⁵Ye gato ben Yefun Allah bi suk-i it yo, án nut do, suk mwa ne ndo sino. Wo ye gato bi sukjimnut ibit mo án mit, ye gato bariwa jammo Yefun it yo, suk mwa ne sino yo ndo wa án mo nde, we án bi sukjimnut mo án mit ne ibit it.

¹⁶Án da ki do, án jam Yefun Allah, sarewo men me mo sukibit gato án ben ne anato men jam do, án jam nde Yefun Allah or ré. Yefun Allah bariwa án. Án su krat, án yo nggiwa ben suk gato ndo mo nde.