Read Abun Titus 3 Bible Online

Titus 3 - Abun bible

Titus 3

¹Nan ki suknapa wa yé gato onyar kem mo Yefun Yesus mone subere án jammo án bi yekwesu si yepasye gato jowa bur re, subere suk gato yekwesu ne ki yo, án benbot sor, án fro nggwa wa ben suk gato ndo.

²Nan kiwa án subere án kiket ye yi nde, án maskwa dek nde, wo án kem ndo su yé mwa ne, án ben án bi suk-i njep, án bes nggwa kok nde.

³Suga nyim tuya men dakai dom jam suk nde, men su krat, men bariwa Yefun bi os-i. Suk gato men dakai iwa men ben ne, ben sato rai men tepsu men gum kwerut wa men ben suk ket men í nde sor. Sugane men iwa ben sukibit nai ye yi, men maskwa ye yi mo suk mwa gato án ku wai kadit men. Men bariket ye yi, ete ye yi neya bariket men dom.

⁴Suga nyim men ben men bi suk-i sane, sarewo Yefun Allah gato fro os ndo wa men kem ndo to kapyo mato kapyo ne, An bi sukjimnut sye kas subot men, An ben sukndo su men.

⁵Sane anato An nai men wé kadit bot gesyos subere men kem ndo to kapyo mato kapyo. An nai men mo sukndo gato men ben tepsu An mit ne nde, wo An dakai ben sukndo su men yi sor ré. An ós men kem ndo. An syo An Gen ma bok nggwa mo men anato men tepsu yetu be. Men tepsu pabom gato bi im kem su ne. Sane sukibit gato men ben suga nyim ne, Yefun Allah Gen was or wé kadit men, ete men win su suk gato ndo sor.

⁶Men bi Yekwesu Yesus Kristus gato kak os ndo wa men kem ndo to kapyo mato kapyo ne, Kristus ne anato kak os wa Yefun Allah syo An Gen bok nggwa mo men dom ré.

⁷Yefun Yesus dakai ben sukndo su men yi, men yo ben suk yo nyim wa An nde, anato An yo ben sukye nai men tepsu sukibit gato men ben ne nde, wo An ki do, men sa, tep wa sok mo Yefun Allah bi rus-i. Sane anato suk gato men bi sukjimnut kem pe mone do, bere men kem ndo to kapyo mato kapyo ne yo, men jam men ku it.

⁸Sukdu ne sangge sor. Nan kibot sukdu ne gat sor, subere yé gato onyar kem mo Yefun Yesus ne wergat án nggwa wa án ben suk gato ndo su án mit dik án onyar dik sor, subere án ós yé mwa ne sino.

⁹Wo nan si nje duwer yu subot sukdu daret nde. Ye ki sukdu subot yetu gedik-gedik dakai bi binke-i, ye duwer yu ete ye maskwa yu subot ye Yahudi bi sukduno-i e ne it yo, nan misyar, nan mu kadit ré, we ye duwer yu subot suk sane, yo ós men nde, yo ndo wa men dom nde.

¹⁰Yeketut gato ben nje maskwa ket yu ete ye wa yu mo sukdu daret ne yo, nan duyawa an wam dik yo, wam we yo ware, an yo jammo nan nde yo, nan misyar an sor, nan mu karowa an o nde.

¹¹Nan jam do, ye gato ben bi suk-i sane bi sukjimnut ibit it. Sukibit mwa gato bor mo suk gato an ben ne kadum do, bere an dakai ku sukye mone.

¹²Bere ji syogat Artemas yo e, Tikhikus yo e, ba ku nan et. Ye we ne dik yo do ba ku nan it yo, nan wergat nggwa, nan ma ku ji kekro mo kota Nikopolis, we ji iwa ji kem mone sor wade aina gato nyot dek ne or wé et.

¹³Nan wergat nggwa wa nan ós Zenas, gato owa ki an bi sukdu-i mo yepasye gwem sisu ndo, si nan ós Apolos subere an we mubot os yo, an we yo yewa suk mone nde.

¹⁴Men bi nje-i gato men duno ne, án ben suk gato ndo sor, subere kamdik-kamdik án ku suk gato án mitmo ne, subere án kem mo bur re, án bambrai wa ben suk nde.

¹⁵Yé mwa ne sino gato si ji kem more ki ndo mo nan. Nan ku ye gato onyar kem mo Yefun gato jimnotku men yo, nan ki do, men ki ndo mo án sino. Yefun ete mewa nin sino mone sor. Ndo mo nin sor, kadit Paulus