Read Abun Filemon 1 Bible Online

Filemon 1 - Abun bible

Filemon 1

¹Ji gato gum do Paulus, gato ye rai ete bok mo sel mo gato ji ben Yesus Kristus bi suk-i ne, ji si men bi nji, gato gum do Timotius, men ka we anato krom surat re wa nan. Men ka we krom sukdu re wa nan, Filemon, men bi yesyim gato men jimnotku, gato si men ka we ben Kristus bi suk-i sino.

²Men ka we krom surat re wa yé gato onyar kem mo Yefun Yesus gato sum mo Filemon, nan bi nu ne sino. Men ka we anato krom surat re wa Apfia, men bi nyanggon. Men ka we krom surat re wa Arkhipus, men bi yesyim gato si men sino werwa ben Yefun Allah bi suk-i.

³Men bi Ai, Yefun Allah si men bi Yekwesu Yesus Kristus ete mewa nin, Yefun Allah si Yesus Kristus ete uttok nin petok sor. … ji yo syaugat nan nde, wo ji ndek mo nan sor ré

⁴Ji ki suk su Yefun Allah saresa, ji ki kom mo nan gum yo, ji ki ndo mo Yefun Allah wa nan,

⁵we, ji jam sukdu do, nan sa, onyar kem mo men bi Yekwesu Yefun Yesus sisu nan mit dik. Sane dom, ji jam sukdu o do, nan bi sukjimnut sye kas subot ye gato onyar kem mo Yefun Yesus mone sino.

⁶Ji ki suk su Yefun Allah subere nan si ye gato onyar kem mo Kristus ki sukdu subot suk gato Kristus ben ne sino it yo, bere nin sino jam subot sukndo mwa gato Yesus Kristus dakai syo yi nai men wai kadit nyim ne o ré.

⁷Filemon, ji bi nji gato ji jimnotku, ji jam do, nan bi sukjimnut sye kas subot ye gato onyar kem mo Yefun Yesus ne sino anato ji mit ndo wa, ji mit at wa. Ye gato onyar kem mo Yefun Yesus ne sino dom mit at wa.

⁸Ji si nan sino onyar kem mo Kristus, sane kapre ji nggiwa syaugat nan benbot suk gato ndo mone,

⁹ji yo syaugat nan nde, wo ji ndek mo nan sor ré, we ji bi sukjimnut sye kas subot nan. Ji, gato gum do Paulus, re ne ji yenggras rok it, ye rai ji, orete ye bok ji mo sel mo gato ji ben Kristus bi suk-i.

¹⁰Su re, ji ndek mo nan do, nan jambot ji bi sukdu subot ji bi pa, Onesimus ne et. Tomgato ji si pa ne mo sel, ji tepsu pa ne bi ai mo Kristus bi de-i, we ji duno pa subot Kristus mone ré.

¹¹Suga nyim, pa yo ben suk ri su nan nde, wo su re pa iwa pa ben suk ri su nan sisu ji dom.

¹²Su re, ji syogat pa gato ji jimnotku sye teker ne ba satu wa nan.

¹³Ji da syogat pa ba wa nan, sarewo ji iwa pa si ji kem more subere pa ós ji win nan. Ji ki sukdu subot os ndo gato Yesus Kristus kak wa men yetu anato yé bok ji mo sel, sane ji iwa pa kem su ji subere pa ós ji more.

¹⁴Sarewo ji bariwa ji syaugat pa si ji kem more, wo ji jam do, nan imo yo, bere ji iwa pa si ji kem sino. Ji bariwa ji syaugat nan, wo nan iwa nan ben suk gato ndo wa ós ji yo, nan ben su nan mit iwa sor anato ndo, ji bariwa ji wergat nan mone.

¹⁵Yefun Allah fro os Onesimus si nan wat yu wikgan, subere ri ma, pa satu ma si nan kem pe mone bayok.

¹⁶Su re pa gum kwerut wa nan sor nde, wo pa ne gum kok wai kadit ne o ré. Pa ne tepsu nan bi nji mo Kristus bi de-i, men sino jimnotku pa ne. Ji sa, ji jimnotku pa ne ndo nde, wo bere nan jimnotku pa ne wai kadit ji o ré, we pa ne bere ben bi suk-i ndo wa ós nan, si pa ne tepsu nan bi nji mo Kristus bi de-i dom.

¹⁷Sane nan nut mo ji do, nan si ji tepsu yedik mo Kristus bi de-i it yo, nan kak nan mit wa Onesimus satu ba tepsu nan kak nan mit wa ji ba ku nan.

¹⁸Pa ben suk yo ibit mu nai nan, ete nan bi suktik yo kem mo pa ne it yo, bere ji win ré.

¹⁹Ji dakai krom sukdu re su ji syim, subere nan jam rer do: Ji gato Paulus re, ji tom do, bere ji dakai win nan bi suktik ne ré. (Nan mbrinket nde, suga nyim ji duno nan, ete re ne, nan kem ndo it, sane nan bi suktik sye kem mo ji mone tó.)

²⁰Men tepsu yedik mo Yefun, sane ji iwa nan ós ji et. Nan tepsu ji bi nji mo Kristus bi de-i, sane nan ben ji mit ndo, nan nai Onesimus satu ma sisu ndo et.

²¹Ji jam do, sangge, bere nan benbot suk gato ji ndek mo nan sor nde, wo bere nan ben wai kadit ne o ré, anato ji krom surat re wa nan ré.

²²Ji ndekwa nan fro gumwak dik yo wa ji dom et, we ji kwabom kam mo Yefun Allah do, bere Yefun jam suk gato nin sino ki nai An, ete kak os wa ji satu ba ku nin sino mone.

²³Epafras gato ye rai ete bok mo sel mo gato an ben Yesus Kristus bi suk-i ne, an si ji kem mo sel tó. An ki ndo mo nan.

²⁴Sane dom, yé gato si ji ben suk sino gato gum do, Markus, Aristarkhus, Demas si Lukas ki ndo mo nan dom.

²⁵Men bi Yekwesu Yesus Kristus ete mewa nin sor. Ndo mo nan sor, kadit Paulus