Read Abun Ibrani 1 Bible Online

Ibrani 1 - Abun bible

Ibrani 1

¹Suga nyim tuya Yefun Allah tarubot yenabi wa men bi amui. An yo bi suktaru ne dik nde, wo An bi suktaru ne mwa. Yenabi mwa ne gwat sukamno subot Yefun Allah bi suktaru ket kwayo-kwayo.

²Wo su kam gato karowa bur kru re sa, Yefun Allah syo An bi Gan ma, An tarubot An bi Gan wa men ré. Su ketke Yefun Allah syo suktinggi nai An bi Gan anato su ketke An bi Gan ut suk mwa mo bur re si gu nim ne sino. Yefun Allah bes An bi Gan subere suk mwa ne sok mo An bi Gan bi suk-i ne sino.

³Yefun Allah dakai ben sato An rer-rik wai o ré tepsu kam, ete An bi Gan ne ben sato An rer-rik wai o ré dom tepsu kam yor gato gat men. Yefun Yesus ben Yefun Allah rer ne bor ma wa men jam. Sane An bi Gan re anato tepsu Yefun Allah dakai ne it, tara kadit Yefun Allah wokgan yo dom nde. An bi Gan ki bi sukdu-i gato nggi wai subere An bi Gan mewa suk mwa mo bur re si gu nim ne sino subere suk mwa ne kas sisu ndo sor. An bi Gan kak os wa men yetu subere Yefun Allah yo nutbot sukibit gato men ben ne o nde, ete Yefun Allah nai men gum sok mo An bi rus-i. Orete An bi Gan ne kem tak An de syim ge mo gu, mone An bi Gan si Yefun Allah gato sye wai o ré, jom suk mwa ne sino.

⁴Sane Yefun Allah bes An bi Gan gum-i kok wai kadit malaikat mwa ne gum-i sino ré. Yefun Allah bes An bi Gan gum-i, sane anato An bi Gan gum-i kok sye wai kadit malaikat gum-i o ré,

⁵we, Yefun Allah ki sukdu re nai malaikat dik yo dom nde, wo An ki nai An bi Gan sor ré, sare do, “Nan anato Ji bi Gan. Su kam re it, Ji anato tepsu Nan bi Ai it.” Sane dom, Yefun Allah ki sukdu re subot malaikat dik yo mo nde, wo An ki subot An bi Gan sor ré, sare do, “Ji anato Pa ne bi Ai, Pa ne anato tepsu Ji bi Pa-i,” Yefun Allah yo ki sukdu kwa we ne subot malaikat yo mo nde.

⁶Sarewo Yefun Allah syogat An bi Gan gato gum kok wai o ré ma mo bur re sa, Yefun Allah ki do, “Ji bi malaikat mwa ne sino som Pa ne et!”

⁷Yefun Allah ki sukdu subot malaikat mwa ne sare do, “Ji ben Ji bi malaikat ne ben bi suk-i nggi tepsu nofuf gato kas nggi. Ji ben Ji bi malaikat gato tepsu Ji bi pakwerut-i ne ben bi suk-i nggi tepsu bot ru gat suk.”

⁸Sarewo Yefun Allah ki sukdu subot An bi Gan sare do, “Pa, Nan anato tepsu Ji, Yefun Allah, Nan kem mo yekwesu bi kursi, we Nan gum Yekwesu to kapyo mato kapyo. Nan jom Nan bi rus-i sa, Nan ben Nan bi suk-i mu nai Nan bi rus-i mone ri-roi pe sor.

⁹Nan mit iwa yé ben sukndo tepsu Ji mit sor, Nan bariwa yé ben sukibit ré, Sane anato Ji gato jom Nan ne, Ji anato bes Nan gum kok wa Nan ben Ji bi suk-i, Ji ben Nan mit at wa Nan ben Ji bi suk-i, Nan mit at wai kadit Nan bi yesyim ne sino o ré.”

¹⁰Yefun Allah ki sukdu subot An bi Gan o do, “Pa o, Nan anato tepsu Yekwesu, su ketke Nan anato ut bur re kadit i-ke ne sor, Nan dakai anato ut gu nim ne dom ré.

¹¹Suk mwa mo bur re si gu nim ne sino bere ibit or ré, wo Nan dakai sor ete kem pe. Suk mwa mo bur re si gu nim ne sino bere ibit tepsu san bere ibit or ré.

¹²Suk mwa ne bere yo ndo o nde, bere Nan nai tepsu ye nai san gato ibit ete bare wé ré. Bere suk mwa ne, Nan win su dogato be o ré, tepsu ye win san ibit su san be. Sarewo Nan dakai sor anato kem pe, Nan ben Nan bi suk-i tara mo nde. Nan sor anato kem gesyos to kapyo mato kapyo, pe gato or mó, yo mo nde.”

¹³Yefun Allah yo ki sukdu tepsu sukdu re nai malaikat ge dik yo dom nde, wo Yefun ki sukdu re nai An bi Gan sor ré, sare do, “Nan kem tak Ji de syim ge, Nan si Ji tepsu Yekwesu sino mone sane sor Ji syo yeko gato iwa gu Nan mo Nan syim, subere án jammo Nan et.” Yefun Syogat malaikat mu ós nje gato bere kem ndo to kapyo mato kapyo

¹⁴Yefun yo ki sukdu bok ne subot malaikat nde, sane malaikat ne te suma gei ne? Malaikat ne anato suk gato da kridek yo mo nde, wo malaikat da gesyos sor ete mó. Yefun Allah yo bes malaikat tepsu An bi Gan gato Yekwesu si Yefun sino nde, wo Yefun syogat malaikat mu ós nje gato bere kem ndo to kapyo mato kapyo mo Yefun Allah bi nat-i ne sor ré.