Read Abun Ibrani 10 Bible Online

Ibrani 10 - Abun bible

Ibrani 10

¹Mo ye Yahudi bi sukduno-i ye krombot sukndo gato bere bor su kam sari ne ma. Mo sukdu ne yé konembot sukndo ne sor ré, we suk gato sangge kai yo bor nde tó. Wo suk gato ye Yahudi ben tepsu sukdu ne mo bur re yo tepsu suk gato Yefun ben mo gu kai nde. Sane anato kapre men iwa men karowa Yefun, sukdu ne yo nggiwa ós men ri nde. Kapre tahun dik wam dik men gwat suge wa yesu gato ben suk mo Yefun Allah bi nu gu kwop, orete yesu gwat suge dé ne wa tot suktot mo suk gato men ben siri kadit Musa bi sukduno-i ne yo, men benbot sukdu ne bere yo tep nde. Kapre yesu gwat suge dé mu tahun dik tahun dik sane sane petok sor, bere men bi sukjimnut yo kem not nde, wo men bi sukjimnut waiyu mo sukibit gato men ben ne tó.

²Sato men yé gato bi nggwa mo Yefun Allah wa ben An bi suk-i ne jam rer do, suge dé ne nggiwa tot suktot mo sukibit gato men ben ne or wé, ete sukibit ne yo ut mo men o nde, orete men bi sukjimnut yo waiyu mo sukibit ne o nde yo, bere yesu yo gwat suge de wa tot suktot ne o nde. {Sarewo suge dé ne yo nggiwa ós men mone nde.}

³Tahun dik wam dik men gwat suge wa yesu gu subere an gwat i-dé sye wa tot sukibit gato men ben ne, sarewo suk ne yo ós ben men bi sukjimnut kem not nde, wo mone men napawa sukibit gato men ben ne pe sor, ete men bi sukjimnut waiyu mone mwa wai o ré.

⁴We, sare, sapi si kambing ge ndi dé ne yo nggiwa tot sukibit gato men ben ne or wé kadit men nde. … sapi si kambing ge ndi dé ne yo nggiwa tot sukibit gato men ben ne or wé kadit men nde

⁵Sane anato Kristus ma mo bur re sa, An ki nai Yefun Allah sare do, “Yé gu suge ete i-dé sye wa tot suktot mo sukibit gato yetu ben ne yo, Nan yo iwa nde. Sane dom, Nan yo iwa yé syo suksom bok yo daret nai Nan wa yé som Nan su nde, wo Nan dakai fro Ji kaim tepsu suktot ne o ré.

⁶Nan yo iwa yé gre suge wa som Nan su dom nde. Sane dom, Nan bariwa yé dar suge dé tepsu suktot mo sukibit gato yetu ben ne.

⁷Orete Ji ki o do, ‘Yefun Allah o, Ji anare! Ji ma wa Ji benbot suk gato Nan mit iwa ne, tepsu ye krom subot Ji mo Nan bi sukdu ne.’ ”

⁸Suga nyim Kristus ki do, “Yé gu suge ete i-dé sye wa tot suktot mo sukibit gato yetu ben ne yo, Nan yo iwa nde. Sane dom, Nan yo iwa yé som Nan su suksom bok yo daret nde. Nan yo iwa yé gu suge ete gre suge wa som Nan su dom nde. Sane dom, Nan bariwa yé dar suge dé tepsu suktot mo sukibit gato yetu ben ne.” Yé da gu suge e, ye gre suge e, ye syo suksom e ne sino tepsu yé Yahudi bi sukduno-i ne, sarewo Kristus ki mo sukduno ne do, Yefun Allah bariwa ré. An bi nggwa subere tot sukibit gato men ben ne or wé kadit men sino, men bi sukjimnut waiyu mo sukibit gato men ben ne o nde

⁹Kristus ki sukdu ne, orete An ki o do, “Yefun Allah o, Ji anare! Ji ma wa Ji benbot suk gato Nan mit iwa ne.” Sane suk gato Yefun Allah mit iwa anato Yefun Allah rus sukdu subot yé gu suge tepsu suktot ne wé, ete Yefun Allah win suge ne su Kristus kaim ré. Sane yé gu suge kwop ne o nde, wo yé gu Kristus kwop tepsu suktot sor ré.

¹⁰Kristus benbot suk gato Yefun Allah mit iwa ne, sane anato Kristus bi An nggwa kwop wa men wam dik sor ré, tep wa kapyo mato kapyo. An bi nggwa subere tot sukibit gato men ben ne or wé kadit men sino, men bi sukjimnut waiyu mo sukibit gato men ben ne o nde, wo men onyar kwo it.

¹¹Suga nyim tuya, kamdik-kamdik ye Yahudi bi yesu gato ben suk mo Yefun Allah bi nu bok ne sino ben suk tepsu yegweswai wa Yefun Allah si ye Yahudi. Yesu ge bok ne gu suge ete dar i-dé, si suk bok yo o tepsu Musa bi sukduno-i. Yesu ben suk sane sane sor, yé gu suge wam dik sor nde, wo yé gu suge deyo-deyo gat petok sor, sarewo suge bok gato yé gu ne yo tep wa tot sukibit gato men yetu ben ne nde, yo karowa wokgan dom nde.

¹²Suge bok neya dé gato sye yo ós men nde, wo Kristus dakai bi nggwa kwop tepsu suktot wa men sa, tep mó ré, sane bere Yefun Allah yo maskwa men o nde, An yo nutbot sukibit gato men ben ne o nde. Kristus bi nggwa ne wam dik sor ré, tep wa kapyo mato kapyo. Kristus bi nggwa kwop or wé, ete An kem tak Yefun Allah de syim ge, An si Yefun Allah jom suk mwa neya mo gu ne it.

¹³Su re yo, Kristus eswa Yefun Allah syo yé gato bariket Kristus mo An syim, subere yé ne jammo Kristus et.

¹⁴Sane Kristus kwop wam dik wa men anato An kak os wa men. An kwop wam dik ne tep wa men to kapyo mato kapyo it. Kristus tot sukibit gato men ben ne or wé kadit men, sane anato men bi sukjimnut yo waiyu mo sukibit ne o nde, sukibit ne yo ut mo men o nde it.

¹⁵Yefun Allah Gen dom ki subot sukdu bok re nai men. Ketke An ki sare do,

¹⁶“Ji kak os be su ye Israel {gato tepsu Ji bi rus-i}, tepsu suk gato Ji tom ne. Yefun Allah ki do, su kam sari ne ma, ‘Bere Ji bok Ji bi sukduno-i mo nin mit ré. Bere Ji krom Ji bi sukduno-i mo nin bi sukjimnut dom ré.’ ”

¹⁷Or o, Yefun Allah Gen ki o do, “Bere Ji yo napawa sukibit si sukdaret mwa ne sino gato án ben ne o nde.”

¹⁸Sane Yefun Allah yo maskwa ket men mo sukibit si sukdaret mwa ne sino o nde it, Yefun Allah yo nutbot o nde. Sane men yo bi suktot mo sukibit ne o nde. Men yo gwat suge mu wa yesu gu ete ye dar i-dé mo gumwak fo mit ne o nde.

¹⁹Sane ji bi nji ji bi nyanggon, Yefun Yesus kwop ete dé sye wa men. Sane su re men karowa Yefun Allah mo gumwak fo mo Yefun Allah bi nu mo gu ne sor ré, men yo nokwa o nde.

²⁰Yefun Yesus bi An nggwa anato ben sato An dakai syik san det sye gato kewa gumwak fo ne, subere men ku os wa men ku Yefun Allah mone. An kak os be wa men sok mo Yefun Allah bi gumwak fo ne it. Sane bere men kwop mo men bi sukibit ne o nde, wo men mbau tepsu Yefun Yesus dakai mbau mone.

²¹Sane su re Yefun Yesus ben suk tepsu yegweswai wa men si Yefun Allah. Kristus ben suk tepsu yekwesu gato gum kok wai wa men mo Yefun Allah bi nu mo gu.

²²Sane men karowa Yefun Allah su men mit dik si men onyar dik et, men onyar kem pe mo Yesus Kristus et. Men karowa Yefun Allah yo, men bi sukjimnut mo men mit waiyu mo sukibit gato men ben suga nyim ne o nde, we men jam do, Kristus tot sukibit ne or wé kadit men it. Men karowa Yefun Allah yo, men onyar kwo, ben sato men kaim kwo tepsu ye mus men su syur kwo it.

²³Sane men jom suk gato Yefun tom su men subot os be ne pe et. Men mit brek mo suk yi yo kadit suk gato Yefun tom ne wokgan dom nde, we suk gato Yefun Allah tom subot os be su men, sangge bere An benbot sor, An yo kidar nde. … men nutbot os yo sa u subere men duno yu su wade men sino bi sukjimnut sye kas subot ye yi neya et. Men nutbot sisu ndo et

²⁴Sane men nutbot os yo sa u subere men duno yu su wade men sino bi sukjimnut sye kas subot ye yi neya et. Men nutbot sisu ndo et, men meret os ndo subere men bi os ndo nai yu wade men sino ben sukndo su ye yi dom et.

²⁵Men sum, men ku yu petok sor. Men bambrai wa men ku yu nde, sagato yé bok neya bambrai wa ne, wo men werwa men ku yu pe sor subere men bi os gato ndo nai yu mwa o et, we men jam do, yo nam nde ge, bere Yefun Yesus ma it.

²⁶Men da jam sukdu subot os be gato sangge, ye duno men su sukdu ne mó ré. Sarewo men dakai iwa ben suk siri kadit sukdu ne gat sor yo, bere or sor, men yo ku os o nde, Kristus bi nggwa wa tot suktot sukibit gato men ben ne yo ós men o nde it.

²⁷Ye gato jam sukdu gato sangge, ete ben suk siri kadit Yefun Allah mit gat sor yo, ye ne yo ku os o nde, wo an kwabom dek subot suk gato bere ri ma Yefun Allah ndobot an mone. Bere an kwabom dek subot Yefun Allah bi sukmaskwa gato tepsu bot gato ru sye. Bot sye ne bere git yé gato bariwa jammo Yefun or wé ré.

²⁸Suga nyim tuya, yetu ge we yo, ge gri yo ma ki sukdu tepsu yu subot suk gato yetu ge dik yo ben siri kadit Musa bi sukduno-i ne sa, bere yepasye mone nai sukjimnut do, ye gane ben suk siri it anane, ete ye gu ye ne kwop mone sor, yepasye ne yo jimnotku ye ne wokgan dom nde. … ye gato kamo su os gato Yefun Allah bi Gan kak ne, bere ye ne ku sukye wai

²⁹Sane ye gato kamo su os gato Yefun Allah bi Gan kak ne, bere ye ne ku sukye wai kadit ye gato ye gu kwop mo suk gato an ben siri kadit Musa bi sukduno-i ne o ré. Ye gato kamo su os gato Yefun Allah bi Gan kak ne yo bi sukjimnut kom mo Kristus dé gato sye wa os be bi sukdu-i ne kem su men ne nde. Ye ne da jam Kristus kwop wa tot sukibit gato an ben ne or wé kadit an, sarewo an ben an bi suk-i, an bi sukjimnut su do, Kristus dé sye dakai yi sane sor ré, ben sato an yo nutbot suk gato Yesus Kristus ben ne teker eta nde. Mone an kabor Yefun Allah Gen gato bi os ndo nai an ré. Sane ye gato kamo su os gato Kristus kak ne, bere ye ne ku sukye wai o ré,

³⁰we men jam Yefun Allah gato ki bi sukdu-i sare do, “Bere Ji dakai sor ete maskwa nje tepsu sukibit gato án ben ne. Bere Ji anato syo sukye nai án tepsu sukibit gato án ben ne.” Yefun bi sukdu kwa dik yo o sare do, “Ye gato gum sok mo Ji bi rus-i, ete brek dari tak Ji it yo, bere Ji syo sukye nai yé ne sor.”

³¹Ye gato ben suk siri kadit os be ne, do ges mo Yefun Allah syim-i it yo, bere ye ne kwabom dek subot sukye gato bere Yefun syo nai an ne.

³²Nin napawa tomgatu, nin jam sukdu subot Yesus Kristus sim sa, sukdu ne tepsu Yefun Allah bi sukru gato rer ku nin, ete mone nin onyar brek ete kem mo Yefun Yesus it. Tomgane nin ku sukye ndo nde, sarewo nin sa, nin wergat nin nggwa wade nin jom Yefun Allah bi sukdu ne pe sor, nin yo misyar nde. … nin brek kadit Yefun Yesus nde, we nin onyar kem pe mo Yefun Yesus it yo, bere nin ku suk mwa wai mo Yefun bi de-i

³³Yé kabor nin, yé ben nin damen mo yé mwa gwem mo sukdu ne mó ré. Wam bok yo nin sok to yé gato ku sukye ete nin si yé bok ne ku sukye sino.

³⁴Nin nutbot yé gato yé bok mo sel ndo nde, nin baoku yé mo sel ne ndo nde. Kapre yé nai nin bi suk mwa kadit nin o, nin yo maskwa nde, wo nin iwa, nin mit at wa sor, we nin jam do, nin bi suk mwa gato ndo wai mó ré. Suk mwa ne anato tepsu suk mwa gato Yefun Allah tom su nin. Suk ne kem ndo to kapyo mato kapyo, ye yo ku os wa nai suk gato Yefun Allah fro wa nin ne wé kadit nin nde.

³⁵Sane su re nin brek kadit Yefun Yesus nde, we nin onyar kem pe mo Yefun Yesus it yo, bere nin ku suk mwa wai mo Yefun bi de-i ne o ré.

³⁶Nin jom Yefun Allah bi sukdu-i ne pe sor, subere nin nggiwa ben suk tepsu Yefun Allah mit. Nin werwa nin ben suk tepsu Yefun Allah mit petok sor subere nin ku suk mwa gato An tom su nin ne.

³⁷We, ye krom mo Yefun Allah bi sukdu subot Kristus sare do, “Bergan sor ete Ye gato Yefun tom do, bere An ma ne yo, bere An ma ré; An yo eswa nam o nde.

³⁸Wo Ji bi rus-i gato ben bi suk-i tepsu Ji mit, bere án onyar kem mo Ji anato án kem ndo; sarewo án ge dik yo do brek dari tak Ji it yo, bere Ji yo iwa ye ne nde.”

³⁹Sarewo men anato tepsu yé gato brek kadit Yefun Allah ete ges mo bot gesyos nde, wo men anato tepsu yé gato onyar kem pe mo Yefun Allah, ete kem ndo to kapyo mato kapyo.