Read Abun Ibrani 11 Bible Online

Ibrani 11 - Abun bible

Ibrani 11

¹Men onyar kem mo suk yo, sane bi sukjimnut do, suk gato men bi sukjimnut kem mone, men jam do, sangge, bere suk ne bor mone tó, men jam ware. Kapre men yo me suk ne su men gro nde, men bi sukjimnut dik do, bere suk ne bor ré.

²Men bi amui onyar kem pe mo sukdu gato Yefun Allah ki ne anato Yefun Allah mit iwa án.

³Men onyar kem mo Yefun Allah, sane anato men jam do, Yefun Allah ki sukdu sor ete suk mwa mo gu nim si bur re ne sino dakai bor subot An bi sukdu-i ne mó ré. Sane suk gato men me su men gro gato bor re, ma kadit sukdu gato Yefun Allah ki ne sor ré, Yefun Allah yo nai suk yi neya wa An ut suk mwa su ne yo mo nde, wo An ki sukdu sor ré, ete suk mwa ne bor ré.

⁴Habel onyar kem mo Yefun Allah, sane anato Habel gwat suksom gato ndo wai kadit suk gato Kain gwat ma ne ete gre wa som Yefun su ne. Habel ben bi suk-i, an onyar kem mo Yefun, {wo Kain gwat bi suksom ne yi, an yo onyar kem mo Yefun su nde.} Sane anato Yefun Allah iwa suksom gato Habel gwat ma ne sor ré, ete Yefun Allah nut mo Habel ne do, an sa, tep wa Yefun nai sok mo Yefun bi rus-i. Habel ne kwop ré, sarewo sukdu subot suk gato an ben tepsu ye gato onyar kem mo Yefun Allah ne kem su men tó anare.

⁵Henokh onyar kem mo Yefun Allah, sane anato Henokh yo kwop nde, wo Yefun dakai gwat an it mu mo gu ré. Ye yo ku an mukri mo nde, we Yefun dakai gwat an su gro mbau it mu mo gu ré. Ye krom mo Yefun Allah bi sukdu do, Yefun yo gwat Henokh it mu mo gu nde tó, Henokh sa, an ben an bi suk-i tepsu Yefun Allah mit sor.

⁶Ye gato yo onyar kem mo Yefun Allah nde tó yo, bere ye ne yo ku os wa ben suk tepsu Yefun Allah mit nde. We, ye gato ma mo Yefun Allah it yo, an onyar kem mo sukdu sare do, Yefun Allah ne sa, mó ré, ete Yefun ben sukndo su ye gato meret An.

⁷Yenggras Nowak onyar kem mo suk gato Yefun Allah ki ne, sane anato Yefun Allah ki subot suk gato bere Yefun ben bor mo bur re nai Nowak jam nyim wé ré. Kapre Nowak yo me suk gato bere Yefun ben ne su an gro nde tó, Nowak onyar kem mo Yefun Allah. Nowak jammo suk gato Yefun ki ne, ete Nowak tem kapal sye. Ri ma an si an bi rus-i it mo kapal mit kadit syur syé. Sane Yefun Allah syo sukye nai nje mo bur re su syur syé. Syur syé gu nje kwop or, sarewo Nowak si bi rus-i kem ndo kadit syur ne. Nowak onyar kem mo suk gato Yefun ki ne, anato Yefun Allah nutbot do, Nowak sa, an tep wa Yefun nai an sok mo Yefun bi rus-i sor.

⁸Yenggras Abraham onyar kem mo Yefun Allah, sane anato Yefun Allah do kendo Abraham ete syogat Abraham mu mo bur yi sa, Abraham mu sor, an jam nde pe gato an mu mone, wo an mu sor. Abraham mu mo bur yi gato Yefun tom su do, bere Yefun syo bur det mone nai Abraham ré.

⁹Abraham onyar kem mo Yefun, sane an mu kem mo bur gato Yefun tom su an do, bere Yefun syo bur det ne nai an mone tó. An kem mone tepsu yemabe mo ye yi bi bur-i. Mo bur ne, Abraham nggo nu kemah wa an kem mó. Sane dom Isak si Yakub nggo nu kemah wa an we kem mó. Mone Yefun Allah tom su an we tepsu an we bi ai ne dom, sare do, bere Yefun syo bur det mone nai an we ré.

¹⁰Abraham kem mo bur det ne sa, an onyar kem mo Yefun, we an es ndek wa kota gato Yefun Allah dakai fro ete nggo ne bor et. Kota ne bere bi pondasi nggi, ete kem to kapyo mato kapyo sor.

¹¹Kapre Abraham ka yenggras rok si Sara nukwerit pe ré, Abraham onyar kem mo suk gato Yefun Allah ki ne, an yo nutbot an kaim nde, wo Abraham bi sukjimnut dik do, bere Yefun Allah benbot suk gato Yefun tom ne, sane anato kom mo rut sa, Sara ku pa wa Abraham it.

¹²Abraham yo ku pa nde tó, Abraham ka yenggras rok it, an yo nggi o nde, sarewo ri ma an bi wis-i ne mwa yé, ye yo nggiwa ne Abraham bi pa-i mwa ne sino or nde. Abraham bi wis-i mwa yé, tepsu bí mo gu ré. Sane dom, an bi pa-i mwa wai o ré, tepsu yen mo sem de it.

¹³Yenggras bok gato men krombot more onyar kem mo suk gato Yefun ki sane sor, án yo ku tepsu Yefun tom ne nde tó, án kwop kadit ré, wo án dakai jam do, ri ma, suk mwa ne bere bor mone tó. Yenggras bok ne yo me suk mwa ne sino su án gro nde, wo án bi sukjimnut sor ete kom mone ré. Án ki subot bur re do, bur re yo tepsu án bi nat-i nde, án tepsu yemabe gato muya-muma, án tepsu yedamok gato bergan sor ete mu kadit bur re ré.

¹⁴Ye gato ki bi sukdu-i sane, men jam rer do, án mit iwa meret bur yi yo o gato tepsu wa án kem mó, ete bere án kendo bur ne do, án dakai bi bur-i.

¹⁵Yenggras bok ne yo nutbot án bi bur det gato án ma kadit ne nde ré, we án da bi os bok yo wa án satu mu me bur det gane ware, án misyar ré.

¹⁶Sarewo án bi sukjimnut kem mo bur gato ndo wai o ré, án bi sukjimnut kem mo bur mo gu nim ne sor. Yefun fro kota dik yo wa án kem mone mó ré. Sane anato yenggras bok ne kendo Yefun Allah tepsu án bi yenggras gato jom án, Yefun Allah yo damen wa nde.

¹⁷Abraham onyar kem mo Yefun Allah, sane anato Abraham fro nggwa wa an gu an bi gan Isak, ete an gre wa som Yefun Allah su. Sugane Yefun Allah iwa me suk gato bere Abraham ben ne. Yefun Allah watbot sare do, “Bere Abraham jambot suk gato Ji syogat an ben ne, bado, nde, e?” anato Yefun syogat Abraham gwat an bi gan Isak mu gu, ete gre wa som Yefun Allah su. Abraham anato ye gato Yefun Allah tom su do, bere Abraham bi wis-i ne mwa yé. Abraham da jam suk gato Yefun Allah tom ne, sarewo Abraham fro nggwa wa gu an bi gan ge dik ne sor ete gre wa som Yefun su.

¹⁸Yefun Allah ki nai Abraham mó ré, sare do, “Kadit Isak re bere nan ku nan bi wis-i ne mwa sagato Ji tom su nan ne.”

¹⁹Sane Abraham bi sukjimnut dik do, Yefun Allah sa, nggiwa sun an bi gan Isak satu kadit sukkwop o ré. Sane Abraham yo nyuwa gwat pa ne gu kwop wa som Yefun su nde. Kom mo rut sa, kapre Abraham yo gu pa kwop nde ré, ben sato Yefun Allah sun pa ne ete top satu nai Abraham tepsu Abraham bi sukjimnut ne o ré.

²⁰Isak onyar kem mo Yefun Allah, sane anato Isak ki sukdu su Yefun Allah subot Yakub si Esau subere Yefun ben sukndo su an we, bere kam sari ne ma an we ku suk gato ndo kadit Yefun.

²¹Yakub onyar kem mo Yefun Allah, sane anato Yakub yo kwop nde tó, Yakub ki sukdu su Yefun Allah subot an bi dat we, gato Yusuf bi pa we ne, subere Yefun ben sukndo su pa we ne, bere pa we ne ku suk gato ndo kadit Yefun su kam sari ne ma. Orete Yakub jom bi kwepu ós an ti saresa, an som Yefun mone.

²²Yusuf onyar kem mo Yefun Allah, sane anato karowa Yusuf kwop rok, an ki sukdu subot kam sari ne ma do, bere ye Israel mu kadit bur Mesir. Orete an ki sukdu kwa dik yo o sare do, an tarubot nje mone do, su kam sari ne ma, ye Israel do mu kadit bur Mesir it yo, ye Israel ne gwat an dini mukri ne mu kadit pe ne dom et.

²³Musa bi yenggras onyar kem mo Yefun Allah, sane anato Musa bi im kem su Musa sa, Musa bi yenggras gurik Musa kadit ye Mesir ne sor kom mo aina gri. Musa bi yenggras me do pa kaim ne ndo, ete an we yo nyuwa ben suk wai mo yeraja mo bur Mesir bi sukdu-i nde. An we onyar kem mo Yefun Allah, sane an we yo jambot yeraja bi sukdu-i nde. {Yeraja ki do, ye Yahudi bi payebris mwa ne, bi im kem su it yo, ye gu kwop wé sor, sarewo Musa bi yenggras we gurik Musa kadit ré.} Ye Israel onyar kem mo Yefun Allah, sane anato án sino nggiwa mubot sem gato gum do, ‘Sem Er’ ne miten tok mo deta ne tepsu ye mubot bur ka sá

²⁴Musa onyar kem mo Yefun Allah, sane anato Musa sye tepsu yenggras sa, an bariwa ye kendo an do, yeraja Mesir bi mam bi pa mo an.

²⁵Musa iwa ku sukye sisu Yefun Allah bi rus-i kadit an si ye Mesir git sye mo os ibit sare ya nde.

²⁶Musa nut do, ye kabor an gum mo sukndo gato an ben anato ndo wai kadit an ku suk mwa mo bur Mesir ne sino, we an bi sukjimnut kas ko kom mo os ndo gato kam sari ne ma bere Kristus kak ne. An bi sukjimnut kas ko kom mo sukndo gato bere an ku mo Yefun bi nat-i.

²⁷Musa onyar kem mo suk gato Yefun Allah ki ne, sane anato an mu kadit bur Mesir. Musa da jam yeraja bere maskwa an mone, sarewo an yo nyuwa nde, an onyar kem mo Yefun Allah, sane an mu kadit sor. Musa werwa an mu sor, we kapre men yetu yo me Yefun Allah su men gro mo nde, Musa ben sato me Yefun Allah, anato an werwa an mu kadit bur Mesir ré.

²⁸Musa onyar kem mo Yefun Allah, sane anato Musa fro sukdu su nje wa konwa Kam Sye Waiket. Musa syogat ye Israel dar domba dé mo ye Israel bi nusyo de si nusyo napnim subere malaikat gato ma wa gu yé mwa ne sino bi pa doketke ne, yo gu pa mo nu ne nde, wo malaikat ne wai ket sor.

²⁹Ye Israel onyar kem mo Yefun Allah, sane anato án sino nggiwa mubot sem gato gum do, ‘Sem Er’ ne miten tok mo deta ne tepsu ye mubot bur ka sá. Sarewo ye Mesir gato syun bot ye Israel waii mubot sem miten ne sa, sem nap sye ma ndom wairi wa án sane sor, án sino rap or ré.

³⁰Ye Israel onyar kem mo suk gato Yefun Allah ki ne, sane anato án mu ndin wairi wa kota Yerikho sor kom mo kam mufit rek, ete kota ne bi ros gato kem krat wairi wa kota ne dakai krut o ré.

³¹Rahab, nggon gato ben siri mwa, mom onyar brek kem mo Yefun Allah, sane anato mom kendo ye Israel bok yo gato ndarwa kota Yerikho ne ma kem mo mom bi nu-i. Mom ben sukndo su yé bok ne, sane anato ye Israel do ma gu nje gato bariwa jammo Yefun Allah mo kota ne sa, ye yo gu nggon ne nde ré.

³²Ji ki subot suk sato suma o ne? Ji ki sukdu subot yetu ge bok yo o gato onyar kem mo Yefun Allah sarewo bere sukdu ne syu yé ré. Ji iwa ji ki sukdu subot nje sato Gideon e, Barak e, Simson e, Yefta e, Daud e, Samuel si yenabi bok neya, bere sukdu ne syu ndo nde.

³³Yé bok ne onyar kem mo Yefun Allah, sane anato yé bok ne nggiwa nai yeraja bok yo bi bur det kadit yeraja ne ré. Yé bok ne onyar kem mo Yefun Allah, sane anato án syo sukye nai ye gato ben sukibit ne sor, án ku suk gato Yefun Allah tom su án ne. Yé bok ne onyar kem mo Yefun Allah, sane anato Yefun Allah ben án nggiwa án ben suk sato re: án nggiwa jom suge sye gato gum do singa ne syokwet krat.

³⁴Án nggiwa te bot gato ru nggi ne wé. Ye yo ku os wa gu án su nyom gato ot de we ne nde, wo án titi fro kadit ré. Án kaim rere, sarewo bergan án kaim nggi o ré. Yé mwa gu yu yo, án sa nggi wai, án sa nggi wai kadit yewis yi neya bi yeko-i ne o ré.

³⁵Nggon ge bok yo onyar kem mo Yefun Allah, sane anato Yefun Allah sun nggon ge bok ne bi nje-i gato kwop ne kadit sukkwop o ré. Yé bok yo o gato onyar kem mo Yefun, ye ben sukye nai ndo nde, wo yé bok ne bariwa ye sombok án wé, wo án iwa án kwop mone sor, subere Yefun Allah sun án satu, ete bere án kem ndo wai mone o ré.

³⁶Ye deyo o, ye kabor ete ye kwam. Deyo o, ye rai su rantai ete ye sok mo sel.

³⁷Deyo o, ye am su jok sor kwop, deyo o ye kum su gergaji mo mit toko o ré, deyo o ye syek su nyom gato ot de we sor kwop. Deyo o muya-muma ete it san kadit domba si kambing da sor ré. Án yo ku suk nde, án ku sukye, ye ben sukibit nai án ket kwayo-kwayo ndo nde.

³⁸Bur re yo tep wa án kem mó o nde. Án muya-muma mo pe gato kwe yo kom mo nde sor. Án muya-muma mo banbo bok yo, án sem mo jokwak si bur wak mone ré.

³⁹Án yé bok ne sino gato men krombot ne sa, án onyar kem mo Yefun Allah ete Yefun Allah bes án gum kok mo suk gato án ben ne, sarewo án yo ku suk mwa gato Yefun Allah tom su án nde tó.

⁴⁰Án yo ku nde tó, we Yefun Allah fro os gato ndo wai wa men si án sino. Yefun Allah fro os subere án si men sino si Yefun kem ndo sino tepsu dik mo pe gato Yefun Allah fro ne.