Read Abun Ibrani 2 Bible Online

Ibrani 2 - Abun bible

Ibrani 2

¹Yesus Kristus gwat Yefun Allah bi suktaru gato be ne ma wa men ré, sane men werwa men jom sukduno subot Kristus gato ye duno men su ne krat o et, subere men mu brek kadit sukdu gato men onyar kem mone nde.

²Suktaru rok gato malaikat ki nai men bi amui {gato Musa krom ne}, suktaru rok ne sangge sor, men jam rer it. Sane ye gato yo simo Musa bi sukdu-i ne nde, ye gato yo benbot sukdu ne nde, án ku sukye mo suk gato án ben siri kadit suktaru rok gato malaikat ki ne, Yefun ben sukye nai án ré.

³Sane men misyar suktaru be gato ndo wai ne te, bere men titi fro kadit sukye mo bot gesyos sa u ne? Bere men yo ku os nde go! Ketke Yefun Yesus dakai ma kom mo bur re sa, An kibot suktaru ne nai nje jam. Or o ye gato jam sukdu gato Yefun Yesus ki ne, yé ne waii ki nai men jam o, ete men jam rer do, sukdu ne sangge it.

⁴Yé gato ki Yefun bi sukdu-i nai men, án ki bi sukdu-i sa, Yefun Allah kadum An bi suktinggi bor mone anato men jam rer do, sukdu ne sangge. Yefun Allah bi suktinggi bor sato ré, ye gato kwop ne, sun e, ye gro ndu, gro rek e, ye gato gwes út ne, mu e ne. Yé mwa ne yeket, ye nutbot ndo nde. Yefun Allah Gen syo An bi suktinggi subot yé gato ki Yefun bi sukdu tepsu pe gato Yefun Allah Gen dakai iwa fro ne.

⁵Men ki sukdu subot bur be gato bere Yefun Allah fro wa men yetu kem mó, bur ne bere bor su kam sari ne ma. Mo bur be ne bere Yefun Allah yo bes malaikat tepsu yesu wa jom men yetu nde.

⁶Sarewo bere men yetu anato jom yetu mo bur be ne tepsu ye krom mo Yefun Allah bi sukdu sare do, “Yefun Allah, suma ben anato Nan bi sukjimnut kas subot men yetu ne? Nan iwa Nan mewa yetu bi pa mwa ne sino wa suma ne?

⁷Nan is yetu mwa ne gum ga wokgan mo bur kadit malaikat, bergan sor ré, orete Nan bes yetu gum yekwesu gato gum kok sye wai o ré. Suk mwa neya sino un yetu gum ne or ré.

⁸Nan ben yetu nggiwa yetu jom suk mwa ne sino or ré, suk dik yo gato yetu jom yo mo nde.” Mo sukdu ne, ye ki do, Yefun Allah ben yetu nggiwa jom suk mwa ne sino or ré. Sane sukdu ne bi sukjimnut do, suk dik yo gato yetu yo jom nde, bere yo mo nde, suk yo gwet mo nde, bere suk mwa ne sino jammo yetu. Sarewo su re, men jam do, yetu yo jom suk mwa ne nde tó.

⁹Sarewo men me do, Yefun Yesus sa, jom suk mwa ne sino it. Yefun Allah is Yefun Yesus gum-i ga wokgan mo bur kadit malaikat gum-i ne bergan sor ré, subere Yefun Allah bi sukjimnut sye dakai kas subot men yetu anato An syogat Yefun Yesus ma ku sukye ete kwop wa men yetu sino. Sane su re Yefun Allah bes An gum kok tepsu Yekwesu, ete yé mwa un Yefun Yesus or ré.

¹⁰Yefun Allah sa, ben bi suk-i tep sino. Yefun gato ut suk mwa ne sino wa An dakai, An misyar yé ben sukye mwa nai Yefun Yesus subere kadum do, Yefun Yesus gum ndo wai o ré, kwa yo gwet mo nde, sane Yefun Allah bes Kristus wa kak os ndo wa men yetu. Yefun Yesus ku sukye ket kwayo-kwayo ete An bi An nggwa subere An kak os wa Yefun Allah kar bi pa mwa si Yefun Yesus sino kem mo bi nat gato ndo wai o ré.

¹¹Yefun Yesus gato tot sukibit gato men yetu ben ne or wé kadit men, An si men yé gato onyar kwo ne sino bi Ai dik sor. Sane anato Yefun Yesus nut mo men do, men tepsu An bi nji, An bi nyanggon, An yo damen wa men nde.

¹²Yefun Yesus ki nai Yefun Allah do, “Bere Ji ki sukdu subot Nan nai Ji bi nji, Ji bi nyanggon. Bere Ji kos, Ji badek un Nan gum. Ji si yé mwa ne sino gato sum wa un Nan gum ne, bere Ji si yé mwa ne un Nan gum sino.”

¹³Or o Yefun Yesus ki o do, “Ji dakai kwabom kam mo Yefun Allah do, bere Yefun Allah top pa mwa is Ji tepsu Ji bi nji, Ji bi nyanggon mone ré.” Or o Yefun Yesus ki o do, “Ji anare, Ji si pa mwa gato Yefun Allah top is Ji anare.”

¹⁴Pa mwa ne tepsu yetu gato da kridek. Sane anato Yefun Yesus dakai ben nggwa tepsu yetu gato da kridek mó dom. An ben nggwa tepsu yetu subere An kwop sa, An ku os wa An nai biris bi yekwesu bi suktinggi gato gwat sukkwop ma wa men yetu ne wé. Yefun Yesus ben biris bi yekwesu ibit it anare, Yefun syat suktinggi ibit ne wé ré.

¹⁵Yefun Yesus kwop wa ben biris bi yekwesu ibit sor nde, wo An kwop wa sombok men wé kadit suknyu dom. Ye gato nutbot sukkwop pe, ete nyuwa an kwop ne, bere ben an gum kwerut wa suknyu it. Sarewo su re Yefun Yesus ma wa sombok ye gato nyuwa sukkwop ne wé kadit suknyu ne it.

¹⁶Sane men jam rer do, Yefun Yesus yo ma wa ós malaikat nde, wo An ma wa ós Abraham bi yewis-i {men yé gato jammo Yefun bi sukdu-i.} An bi nggwa win men, subere Yefun Allah yo maskwa men mo sukibit gato men ben ne o nde

¹⁷Sane An ma tepsu yetu gato da kridek. Mo suk mwa ne sino An kaim tepsu men yé gato sok mo Yefun Allah bi rus-i. Sane bere An ku os wa An ben suk tepsu Yekwesu gato gum kok wai kadit yekwesu yi neya mo Yefun Allah bi nu. An sa, tepsu yegweswai gato ben bi suk-i ri-roi wa men si Yefun Allah, subere men si Yefun kem ndo. An dakai jimnotku yetu ndo nde. An kak os wa men yetu, An bi nggwa win men, subere Yefun Allah yo maskwa men mo sukibit gato men ben ne o nde, Yefun yo nutbot sukibit ne o nde.

¹⁸Biris bi yekwesu meret os wa Yefun Yesus subere Yefun ges mo os ibit mó ré. Yefun ku sukye mone, wo An yo ges mo os ibit nde. Sane anato An nggiwa os men yé gato biris bi yekwesu werwa ben kidar ges mo os ibit ne dom. Yefun Yesus sa, nggiwa mewa men kadit sukye gato men ku mone.