Read Abun Ibrani 3 Bible Online

Ibrani 3 - Abun bible

Ibrani 3

¹Sane ji bi nji, ji bi nyanggon, nin si men sino anato yé gato Yefun Allah nai sok mo An bi rus-i. Sane men nutbot Yefun Yesus sisu ndo o et. Yefun Allah syogat Yesus Kristus gwat Yefun bi sukdu ne ma wa men tepsu Yekwesu gato gum kok wai mo Yefun Allah bi nu. An sa, tepsu yegweswai wa men si Yefun Allah gato men onyar kem mó.

²Yefun Allah bes Yesus Kristus wa ben Yefun Allah bi suk-i ne sino. Yesus Kristus ben suk mwa ne sisu ri-roi sor, tepsu suga nyim tuya Musa dom ben bi suk-i ri-roi sor. Yefun Allah bes Musa wa an fro suk mwa ne sino gato yesu ben mo Yefun Allah bi nu. Yesus Kristus si Musa, an we ka we ne sino jammo Yefun Allah. Yesus Kristus sa, ben suk ndo wai kadit Musa anato Yefun Allah bes Yesus Kristus gum-i kok wai kadit Musa gum-i. Yefun Allah un Yesus Kristus gum-i kok wai kadit Musa gum-i

³Sarewo Yesus Kristus sa, ben suk ndo wai kadit Musa anato Yefun Allah bes Yesus Kristus gum-i kok wai kadit Musa gum-i. Yefun Allah un Yesus Kristus gum-i kok wai kadit Musa gum-i, tepsu yé un ye gato nggo nu sye ne gum kok wai kadit yé un nu sye ne kaim.

⁴Men un ye gato nggo nu ne gum anato ndo, we yé gato nggo nu mwa ne sino mó ré. Wo men nutbot sisu ndo sa, bere men jam do, Yefun Allah ut suk mwa mo bur re sino, sane Yefun Allah gum kok sye wai kadit yé gato nggo nu mwa ne mo bur re sor.

⁵Musa re, an ben suk mo Yefun Allah bi nu-i sisu ri-roi sor, tepsu Yefun Allah imo ne. Musa tepsu Yefun Allah bi pakwerut mo nu ne. Musa ki sukdu nai nje mone subot sukdu gato bere Yefun Allah dakai ki bor wa yé mwa jam su kam sari ne ma.

⁶Sarewo Kristus, An tepsu pakwerut sato Musa nde, wo An ben suk tepsu Yefun Allah dakai bi Gan. An ben An bi suk-i mo Yefun Allah bi nu sisu ri-roi sor. Kristus jom suk mwa mo nu ne tepsu Yefun Allah mit. Men anato tepsu yé gato Kristus jom mo Yefun Allah bi nu, wo men bi sukjimnut kem krat mo An, men jammo An su men mit dik si men onyar dik sor.

⁷Sane men ben suk tepsu ye Israel nde, wo men jammo Yefun Allah bi sukdu-i pe sagato Yefun Allah Gen ki sare do, “Su kam re nin do jam Yefun Allah ki sukdu nai nin it yo,

⁸nin su krat wa nde, sagato nin bi amui bariket sukdu gato Yefun Allah ki nai án tomgatu án kem mo pe gato kwe yo kom mo nde. Tomgane nin bi amui bariket sukdu gato Yefun Allah ki ne, án su krat ndo nde wade bergan Yefun Allah yo jimnotku án o nde.

⁹Yefun Allah ki do, ‘Nin bi amui da me sukndo mwa gato Ji ben kom mo tahun musyu at su án mo pe ne mó ré, sarewo án bariket Ji ket kwayo-kwayo sane sor bergan Ji yo jimnotku án o nde.’

¹⁰Sane anato tomgane Ji maskwa ket án it. Ji ki do, ‘Yé mwa ne bariket Ji, án bariwa jammo Ji bi sukdu-i o ré.’

¹¹Sane Ji maskwa ket án, ete Ji tom su án do, ‘Mara! Nat gato Ji fro wa Ji si án kem not mone yo, bere án yo kom mone nde go!’ ”

¹²Sane ji bi nji, ji bi nyanggon, men kadik-kadik mewa men nggwa sisu ndo subere men bi sukjimnut ibit nde. Men mewa men nggwa subere men yo bariwa men jammo Yefun Allah nde. Men mewa men nggwa sane subere men mu brek wé kadit Yefun Allah gato gesyos ne bi os-i nde.

¹³Wo men duno yu su sukdu gato ndo kamdik-kamdik petok sor, sawe suk yo gato ibit tik men mit ete ben kidar men bariket Yefun Allah o ré. Sane men duno yu tepsu bi kam-i gato Yefun Allah syo nai men wa men kem mo bur re sane sor kam dik yo gwet mo nde.

¹⁴Tepsu men onyar kem pe mo Yefun Yesus su ketke ne, men waii werwa men onyar kem pe mo Yefun sane sor kom mo pe gato or mó. Sane bere men sino si Yesus Kristus tepsu dik mo suk mwa gato An ben ne.

¹⁵Ye krom sukdu re mo Yefun Allah bi sukdu do, “Su kam re nin do jam Yefun Allah ki sukdu nai nin it yo, nin su krat wa nde, sagato nin bi amui bariket sukdu gato Yefun Allah ki nai án tomgatu án kem mo pe gato kwe yo kom mo nde. Tomgane nin bi amui bariket sukdu gato Yefun Allah ki ne.”

¹⁶Sane, je u anato jam sukdu gato Yefun Allah ki ne, ete bariket Yefun Allah mone ne? Yé mwa ne sino gato Musa gwat syesyar kadit bur Mesir anato jam sukdu gato Yefun Allah ki ne, bado, ye yi sor ete jam sukdu ne e? Ye gato Musa gwat kadit bur Mesir jam sukdu ne fe!

¹⁷Je u anato Yefun Allah maskwa ket sor kom mo tahun musyu at ne? Yefun Allah maskwa ket ye gato ben sukibit, gato ri ma kwop mo pe gato kwe yo kom mo nde, bado, Yefun Allah maskwa ket ye yi e? Yefun maskwa ket ye gato ben sukibit mo pe gato kwe yo kom mo nde fe!

¹⁸Yefun Allah tom su do, “Mara! Nat gato Ji fro wa Ji si nin kem not mone yo, bere nin yo kom mone nde go!” Sane, Yefun Allah tom su je u mone ne? Yefun Allah tom su ye gato bariket An bi sukdu-i ne, bado, Yefun Allah tom su ye yi e? Yefun tom su ye gato bariket An bi sukdu-i fe!

¹⁹Su re men jam it, men bi amui gato bariket Yefun Allah bi sukdu-i ne yo sok mo nat gato Yefun Allah fro wa án nde, we án yo onyar kem mo Yefun Allah nde.