Read Abun Ibrani 9 Bible Online

Ibrani 9 - Abun bible

Ibrani 9

¹Os gato Yefun Allah kak wa men yetu si An kem ndo suga nyim ne, bi sukduno-i mó ré. Musa krom sukduno subot suk gato yé ben wa yé som Yefun Allah su ne. Sane dom, mo os gato nyim ne, yé nggo nu wa yé som Yefun mone.

²Yé bes Yefun Allah bi nu kemah dik yo ti. Nu ne bi gumwak we, tak de gwem bi gumwak dik yo gato ye kendo do, “Yefun Allah bi gumwak.” Mo gumwak ne sukbo wa sukru ti kwop mone. Meja dik yo gato ye grem roti wa som Yefun Allah su ne kwop mone dom.

³Mo Yefun Allah bi nu ne mit, gumwak we, san det dik yo kewa gumwak de gwem syo. Or o san det dik yo o kok yawa mit kewa gumwak gato tak tun tuya, gato ye kendo do, “Yefun Allah bi gumwak fo.”

⁴Mo Yefun Allah bi gumwak fo mit ne, yé grem meja gato ye nggo su emas mone. Mo meja ne yé gre suk gato i-bu basni grik ndo wa som Yefun Allah su. Mo gumwak ne dom, peti dik yo kwop mone. Mo peti ne, ye ut emas wairi wa. Mo peti mit ne yé bok sukbo emas su sugit napyo gato gum do manna. {Suga nyim tuya, Yefun Allah ben bí ro subere krat tepsu roti wa ye Israel git, sugit ne ye kendo gum do manna.} Mo peti mit ne dom, yé bok Harun bi kwepu gato nyim tuya kwana kom mó ré. Sane dom, yé bok jok det we gato Yefun Allah krom sukduno kwa musyu dik ne kwop mone dom ré. {Ye grem peti mone subere tik nje bi sukjimnut subere yé napawa os gato Yefun kak suga nyim tuya ne.}

⁵Ye ut suge we kadit emas gato i mó, suge we ne kwop mo peti ne yu. Mo suge we ndet ne Yefun Allah kadum An nggwa mó. Suge we ne ye kendo gum do Kerub. Mo peti yu ne, yesu gato ben suk mo Yefun Allah bi nu ne dar suge dé mone tepsu suktot wa tot sukibit gato ye Israel ben ne wé. Sarewo su re, men yo ki subot sukdu mwa ne rek kom mo mit nde tó ré.

⁶Sane ye fro suk mwa ne mo nu kemah or wé, kamdik-kamdik ye Israel bi yesu gato ben suk mo Yefun Allah bi nu ge bok yo sok mo gumwak mo nu kemah ne de gwem. Yesu ge bok ne ben bi suk-i gato Yefun syogat án ben mo gumwak ne.

⁷Wo yekwesu gato gum kok wai mo Yefun Allah bi nu sor ete sok mo gumwak fo mo nu kemah de dari. Yekwesu ne, an sok mo gumwak fo ne tahun dik, wam dik sor. Yekwesu ne sok mo gumwak fo ne yo, yekwesu ne sok yi nde, wo an gwat suge dé tepsu suktot wa tot sukibit gato an dakai si ye Israel ne sino ben ket jam nde.

⁸Sane men nutbot suk mwa gato yekwesu mwa neya ben mo nu ne sa, bere men jam suk gato Yefun Allah Gen kadum rer nai men jam do, yesu ben suk mo gumwak de gwem ne do kas tó it yo, bere men yo ku os wa men mu ku Yefun Allah mo An bi gumwak fo nde tó.

⁹Suk gato yesu ben ne tepsu sukamno wa men su kam re, men nutbot sisu ndo et. Bere men jam rer do, suk gato yesu ben suga nyim ne yo kak os ndo wa men ku Yefun nde, we sare, suksom si suge dé gato yé som Yefun su ne, yo nggiwa ben yé gato som Yefun Allah ne bi sukjimnut mo án mit ne kem not nde, wo bere án bi sukjimnut waiyu mo sukibit gato án ben ne tó.

¹⁰Sane os nyim gato Musa krombot ne bi sukduno-i kom mo men de nden sor ré. Yé sibot sukduno subot sugit si syur e, yé de syur mo suk yo tepsu bi acara bok yo mone. Sarewo yé ben suk bok ne mo de nden sor ré. Suk bok ne Yefun Allah syogat men benbot sane sor kas kom mo kam gato Kristus ma wa kak os be ne sor ré.

¹¹Suga nyim ne ye fro suk mwa mo nu kemah ne, sarewo su re, Kristus ma tepsu Yekwesu gato gum kok wai mo nu kemah gato tara o ré. Nu kemah gato Kristus ben suk mone, yo tepsu nu gato yetu nggo nde. Nu ne yo sok mo suk mwa gato Yefun Allah ut mo bur re nde. Nu ne ndo wai kadit nu kemah nyim gato mo bur re ré. Nu ne ndo wai o ré, pe yo gwet mo nde. Kristus tepsu Yekwesu gato gum kok wai mo Yefun Allah bi nu mo gu ne o ré. Kristus gwat os ndo wa men it.

¹²An sok mo Yefun Allah dakai bi gumwak fo mo nu ne mit mo gu ré. Kristus sok mone An ben suk wa men wam dik sor ré, tep it, wam dik ne tep wa kapyo mato kapyo. An yo sok mone o nde. An sok mone sa, An yo gwat suge sato kambing si sapi gan ne dé-i nde, wo An gwat An dakai dé-i. An gwat An dé-i mone anato An tot suktot mo sukibit gato men yetu ben ne wé ré, sane sukibit ne yo ut mo men o nde sor to kapyo mato kapyo.

¹³Suga nyim yesu gato ben suk mo Yefun Allah bi nu nai kambing si sapi ge ndi dé-i. Yesu ne dar i-dé ne mo yé gato Yefun Allah bariwa ne mo suk gato án ben siri kadit Yefun Allah bi sukduno-i. Yesu ne dar suge dé mo án subere Yefun Allah yo bariwa án o nde. Sane dom, sapi gan gato yesu gre wa som Yefun su ne bi bofuf-i, yesu nai ete krer mo nje gato Yefun Allah bariwa ne, subere Yefun yo bariwa yé ne o nde.

¹⁴Sane kambing si sapi dé-i, si sapi gato ye gre ne bi bofuf-i ne do nggiwa ós nje subere yé ne si Yefun Allah kem ndo su yu satu o it yo, bere Kristus dé-i ne te, sa u ne? Kristus dé-i nggiwa ós men wai kadit sapi dé-i ne o ré fe! Yefun Allah Gen gato gesyos ne ben Kristus nggiwa Kristus dakai bi An nggwa mo Yefun Allah, An dé sye tepsu suktot win men. Kristus ben sukibit wokgan yo dom nde, sane suktot ne tep mó ré. Kristus dé sye anato sombok men bi sukjimnut mo men mit ne wé kadit os gato nyim ne bi sukdu-i, subere men nutbot suk mone o nde, wo men bi sukjimnut sye mo suk gato Yefun Allah gato gesyos ne iwa men ben ne sor.

¹⁵Kristus dé sye wa men, sane anato Kristus ma gwat os be gato Yefun Allah tom su men ne, subere yé gato Yefun Allah nai sok mo An bi rus-i, bere ku suk gato ndo wai mo gu, gato Yefun Allah tom su án ne. Suk gato ndo wai ne anato gesyos. Kristus kwop wa men yetu anato bere men ku suk mwa mone. Men yetu gato ben suk siri kadit os nyim bi sukduno-i ku sukye mone. Sane Kristus kwop wa An tik men yetu syim wé kadit sukye gato men ku mone.

¹⁶Sato yetu ge dik yo, an kwop nde tó, an duno pa dik yo su an bi sukrok do, ri ma an do kwop it yo, bere pa ne wat an bi sukrok subot yé gato an tom su ne tepsu sukdu gato an ki ne. Sane yé jam do, an kwop it yo, sukdu ne kem su nje wa yé benbot it anane.

¹⁷An mbau tó yo, yé yo benbot suk gato an tom su pa ne nde tó, wo an do kwop it yo, sukdu ne kem su nje it. Kadit kam ne, yé benbot an bi suk gato an tom ne it anane.

¹⁸Sane dom, sukdu subot os nyim gato Yefun Allah tom su nje ne, yo kem su nje nde tó, wo suk yo kwop dé sye wa, ete sukdu ne kem su nje it. Kadit kam ne yé benbot it anane.

¹⁹Suga nyim tuya Musa kibot Yefun Allah bi os nyim ne bi sukduno-i mwa ne sino nai ye Israel jam. Orete Musa nai sapi gan si kambing ge ndi dé ete fros su syur. Musa nai es mis gato gum do hisop gato ye far domba go er mone, ete ras mo suge dé su syur ne. Musa jom es ne sa, an dar suge dé mo kertas gato ye rum su os nyim ne bi sukdu-i gato ye krom mo mit ne. An dar suge dé mo ye Israel mwa ne sino dom.

²⁰Musa dar suge dé ne saresa, an ki do, “Ji dar suge dé mo men re, bi sukjimnut do, su re os gato Yefun Allah tom su men bi sukdu-i, kem su men it anare. Kadit kam re, Yefun Allah syaugat men benbot, men jom pe sor.”

²¹Sane dom, Musa dar suge dé ne mo nu kemah si bi suk mwa ne sino gato yesú bok ne ben suk su wa som Yefun mo nu ne.

²²Sane tepsu os nyim ne bi sukdu-i do, men gu suge kwop, suge ne dé sye, ete ye dar i-dé mo suk bok neya subere suk bok ne bi sukibit ne or wé kadit ré. Sane suge dé sye sa, bere men ku os wa sukibit mwa gato men ben ne or wé kadit men ré.

²³Suk mwa mo nu kemah mit mo bur re, tepsu sukkran subot suk mwa gato mo nu mo gu nim ne mit dom. Yé dar suge dé mo suk mwa gato mo nu kemah mo bur re mit subere suk mwa ne tep wa ye ben Yefun bi suk-i su ré, wo nu gato mo gu bi suk mwa ne, ye dar suge dé sane mó yo, bere yo tep nde, wo Yefun Allah mitmo suk gato ndo wai kadit ne o ré.

²⁴Kristus dé anato win suge dé mo nu mo gu ne ré. Sane anato Kristus yo sok mo nu kemah gato yetu nggo mo bur re nde. Nu mo bur re tepsu sukkran subot nu gato sangge mo gu ne sor ré. Sane Kristus yo sok mo nu mo bur re nde, wo Kristus dakai sok mo nu mo gu ne, anato su re, An ki suk tepsu yegweswai su Yefun Allah wa men yetu mone. Men yetu kwop wam dik or wé, eteyo Yefun ndobot men mo suk gato men ben mo bur re

²⁵Suga nyim, tahun dik wam dik ete yekwesu gato gum kok wai mo Yefun Allah bi nu sok mo gumwak fo mo nu kemah mo bur re. Yekwesu ne gwat suge dé sok mone, an dakai dé-i nde. Sarewo Kristus sok mo gu sa, An gwat An dakai dé-i. Kristus yo bi nggwa ete An dé sye mone tahun dik wam dik sagato yekwesu gwat suge dé-i ne nde ré.

²⁶Ben sato Kristus gwat An dé-i sok mo gu ne gat, tahun dik wam dik tepsu yekwesu gwat suge dé-i ne yo, sane tepsu An bi nggwa wa ku sukye tahun dik wam dik petok sor wa men kadit ketke Yefun Allah ut bur re, sane sor kom mo pe gato or mó. Kristus yo gwat An dé-i sok mo gu gat sane nde, wo An sok mone wam dik sor ré, tep wa men yetu mwa ne sino. Su kam gato karowa bur re kru it yo, An sok mone, An bi An nggwa, An kwop wa men yetu subere An tot sukibit gato men yetu ben ne or wé.

²⁷Men yetu kwop wam dik sor, sagato Yefun Allah fro ne. Men yetu kwop wam dik or wé, eteyo Yefun ndobot men mo suk gato men ben mo bur re.

²⁸Sane dom, Kristus bi nggwa kwop wam dik wa men yetu mwa ne tepsu suktot wa tot sukibit gato men ben or wé ré. Or o, bere Kristus ma wam kedowe o. An ma o yo, An kwop wa tot men bi sukibit ne o nde, wo bere An ma wa nai men yé gato eswa An ma ne, ete An gwat men mu sok mo An bi nat-i.