Read Abun 1 Petrus 2 Bible Online

1 Petrus 2 - Abun bible

1 Petrus 2

¹Men ki Yefun Allah bi sukdu gato kem gesyos nai nin jam it. Sane nin bare sukibit gato nin ben nai ye yi ne or wé kadit nin et. Nin kidar ye yi o nde. Nin ben suk tara kadit suk gato nin ki ne o nde. Nin on sa ket ye yi mo suk mwa gato an ku wai kadit nin ne nde. Nin ki ye yi gum ibit ket kwayo-kwayo o nde.

²Sarewo nin mit iwa Yefun Allah bi sukdu ne tepsu pabom er sosa wa da bi im sus et. Sane bere nin nggiwa nin ben nin bi suk-i tepsu Yefun Allah mit nggi wai kadit nyim ne, ete Yefun nai nin sok mo An bi rus-i.

³Ye krom mo Yefun Allah bi sukdu sare do, “Men bi Yekwesu ben An bi suk-i ndo wai su nin, nin dakai jam ré.”

⁴Sane nin karowa Kristus et. An anato tepsu jok gato mbau, wo yetu nut do, jok ne ibit, ete yé misyar An ré. Wo Yefun Allah nai An tepsu jok gato ndo wai wa nggo Yefun bi nu su ne ré.

⁵Nin dom, nin tepsu jok mwa gato mbau. Ben sato yé nggo Yefun Allah bi nu su nin. Sane nin tepsu yesu gato ben Yefun Allah bi suk-i mo An bi nu ne. Yesus Kristus kak os wa nin subere nin syo suksom gato tepsu Yefun Allah mit mo nu ne.

⁶Yesus Kristus tepsu jok gato mbau, we ye krom mo Yefun Allah bi sukdu sare do, “Nin me more et! Ji nai jok gum dik yo gato ndo wai, ete Ji grem jok ne mo kota Sion. Jok ne nggi wai o ré. Ye gato kwabom kam mo jok ne yo, bere ye ne damen nde, wo ye ne jam do, suk gato jok ne fro bere bor mone sor.”

⁷Nin yé gato onyar kem pe mo jok ne yo, bere jok ne ndo wai wa nin. Wo ye gato yo onyar kem mo jok ne nde yo, Yefun Allah bi sukdu ki nai do, “Jok gato ye nggo nu su ne, ketke yé bariwa, yé nut do, jok ne ibit ré, wo ri ma sa, yé nai jok ne tepsu jok gato ndo wai wa yé nggo nu su ne o ré.”

⁸Sane dom, “Bere yé gwes ti mo jok ne, bere jok ne wai nje, ete yé ges mone.” Yé gato kwabom kam mo jok ne nde, án yo jambot Yefun Allah bi sukdu-i nde anato án gwes ti mo jok ne. Án ku sukye mone tepsu pe gato Yefun Allah dakai fro wa án ré.

⁹Wo nin sa, Yefun Allah nai nin tepsu An dakai bi rus-i it. Nin anato tepsu yewis gato Yefun Allah bes tepsu yesu mo Yefun Allah bi nu wa nin ben suk wa Yefun gato gum kok wai o ré. Nin anato yewis gato Yefun Allah fro tepsu An bi rus-i wa nin ben An bi suk-i sor. Yefun Allah kiwa nin mu kadit pe gato ndendu ma mo An bi pe gato rer ndo yé. Sane nin ki subot suk gato An ben ndo wai ne nai ye yi jam.

¹⁰Suga nyim nin yo tepsu Yefun Allah bi rus-i nde, wo su re sa, nin tepsu An bi rus-i it. Suga nyim Yefun Allah dakai jimnotku nin ndo nde, sarewo nin jam nde ré. Wo su re sa, nin jam rer it. Yefun Allah dakai jimnotku nin anato An nai nin sok mo An bi rus-i it.

¹¹Ji bi nji ji bi nyanggon gato ji jimnotku, nin tepsu yedamok gato muya-muma mo bur re. Sane nin jammo suk gato ji krom re et, nin ben suk ket nin í ne o nde. Suk gato nin ben ket nin i ben sato ben sukndi su nin bi sukjimnut gato ndo mo nin mit ne.

¹²Nin si yé gato jam nde Yefun Allah kem mo bur re yo, nin werwa nin ben nin bi suk-i ne ndo wai, subere kapre án iwa ki nin gum ibit yo, án yo ku os wa án ki nin gum ibit mó nde, wo án me do, nin sa, ben sukndo. Sane bere su kam gato Yefun ma wa ndobot men yetu mo bur re, bere án bes Yefun Allah gum kok sye wai mo sukndo gato nin ben ne.

¹³Nin jammo yesu mwa neya mo bur re et, subere án un Kristus gum mo suk gato nin ben ne. Nin jammo pemerintah bi yekwesu gato gum kok wai kadit yesu yi neya dom et. … nin bi nin nggwa mo Yefun Allah tepsu Yefun Allah bi pakwerut wa ben Yefun bi suk-i sor

¹⁴Nin jammo yesu mwa ne sino gato yekwesu bes ne dom et. Yekwesu ne bes bi yesu ne subere yesu ben sukye nai yé gato ben sukibit, ete yesu bes yé gato ben sukndo ne gum kok.

¹⁵Yefun Allah iwa nin ben nin bi suk-i ndo sor, subere yé gato ki nin gum ibit daret ne yo ku os nde, wo nin ben nin bi suk-i ndo subere yé bok ne not sor.

¹⁶Nin kem mo bur re yo, Yefun Allah nai nin wé kadit sukibit jom nin o nde. Sane nin tepsu pakwerut wa sukibit nde. Sarewo nin ki do, “Sukibit yo jom ji o nde, sane ji dakai ben sukibit wokgan ket ji í ne sor ré,” yo, sukjimnut sane bere siri ré. Nin nai sukjimnut sane nde, wo sukibit yo jom nin o nde, sane nin bi nin nggwa mo Yefun Allah tepsu Yefun Allah bi pakwerut wa ben Yefun bi suk-i sor.

¹⁷Nin ben sukndo su yetu mwa ne sino sor. Yé gato onyar kem mo Yesus Kristus, án si nin tepsu yedik mo Yefun Allah bi rus-i, sane nin bi sukjimnut sye kas subot án et. Nin jammo Yefun Allah. Nin jammo suk gato pemerintah bi padosye ki ne dom.

¹⁸Nin yé gato gum pakwerut, nin jammo nin bi yenggras mo suk mwa ne sino sisu ndo et. Nin jammo yenggras gato ben bi suk-i ne ndo si njep su nin sor nde, wo nin jammo yenggras gato ben sukot su nin dom et.

¹⁹Nin bi sukjimnut kem pe mo suk gato Yefun Allah iwa nin ben ne anato nin misyar sukot gato yenggras ben nai nin ne yo, bere Yefun Allah un nin gum o ré.

²⁰Sarewo nin do ben sukibit, ye kwam nin mone, ete nin misyar yo, bere je u anato un nin gum mone ne? Bere yo mo nde, wo nin ben sukndo, ete nin do ku sukye mone ete nin misyar it yo, bere Yefun Allah un nin gum mone ré.

²¹Yefun Allah fro nin wa nin ku sukye, we Yesus Kristus dakai ku sukye wa nin mó ré. Sane sukye gato nin ku ne, nin misyar tepsu Yesus Kristus misyar ré. Mone An kadum os wa nin, subere nin waii ben nin bi suk-i tepsu An ben ne. An da ku sukye, sarewo

²²An yo ben sukibit yo mo nde. An yo kidar ye yi yo mo nde.

²³Yé kabor An sa, An yo kabor yé ne satu nde. An ku sukye sa, An yo ki nai yé gato ben sukye ne do, bere An waii ben sukye néi yé ne satu o nde, wo An bi An nggwa mo Yefun Allah sor. An jam do, Yefun Allah watbot suk mwa ne sisu ndo, orete bere Yefun syo sukye nai nje ne tepsu sukibit gato án ben ne. Wo Yesus Kristus dakai yo ben sukye satu nai ye ne mo nde.

²⁴Sukibit mwa ne sino gato men yetu ben ne tepsu sukde gato Yesus Kristus sam wa men. Ben sato Kristus sam men bi sukde ne mo An kaim mu kom mo kwesukwin. An kwop wa men, An tot suktot mo sukibit mwa gato men ben ne or wé mone, subere men gum pakwerut wa ben sukibit o nde, wo men ben men bi suk-i ndo tepsu Yefun Allah mit sor. Yé sap Kristus wip e, yé mban An mo kwesukwin e, yé ben sukye nai Kristus ket kwayo-kwayo e ne, anato nin ku os wa nin ge kadit nin bi suki mwa ne, orete nin kem ndo mone it.

²⁵Suga nyim neya nin jam nde os gato sangge sato domba gan gato muri, wo su re sa, Yefun Allah kar nin satu, subere nin jammo Yefun Yesus gato mewa nin, tepsu suksi jammo ye gato mewa suksi ne sisu ndo ne. Yefun Allah kar nin satu ma mo Kristus subere Kristus uttok nin petok sor.