Read Abun 1 Petrus 4 Bible Online

1 Petrus 4 - Abun bible

1 Petrus 4

¹Yesus Kristus ku sukye mo An kaim mó ré. Sane nin dom, nin nai sukjimnut tepsu An. Nin fro nin nggwa wa nin ku sukye mo nin kaim tepsu An et. Nin nai sukjimnut sane, we nin ku sukye saga Kristus ku mo An kaim ne yo, bere nin yo ben sukibit ket nin í ne o nde.

²Sane nin kem mo bur re yo, nin benbot suk gato Yefun Allah mit iwa ne kadit suk gato yetu iwa ne nde.

³Nin ben suk tepsu ye gato jam nde Yefun iwa ben ne o nde, tep it, tut mo suk gato nin ben suga nyim ne sor. Suga nyim nin ben suk siri dakai daret bu e, nin da bro wa nggon e, nin yenau bu e, nin iwa nin kamo noru nombrak, nin yenau su, nin ben siri mwa su e; nin si yé sum wa da nau mwa bu e, nin som sukdaret gato Yefun duyawa e ne.

⁴Wo su re, yé gato jam nde Yefun yeket nin, án jam do, nin yo si án ben sukibit mwa ket nin í saga nyim ne o nde. Nin yo si án ben sukibit mwa ne o nde anato án kabor nin ndo nde.

⁵Wo yo nam nde ge, Yefun Allah ndobot yé gato mbau si yé gato kwop ne sino. Bere Yefun Allah ndobot án mo suk gato án kiket nin mone, ete Yefun syo sukye nai án o ré.

⁶Sane anato, yé ki subot os ndo gato Yesus Kristus kak ne, suga nyim tuya yé ki nai yé gato su re kwop ré, subere kapre án da kridek kwop tepsu yetu kaim kwop ne, bere án ku os wa án kem gesyos tepsu pe gato Yefun Allah imo ne.

⁷Karowa bur re kru it, sane nin mewa nin nggwa, nin kem su nin fra, subere nin nggiwa nin ki suk su Yefun Allah sisu ndo et.

⁸Kwa gato ndo wai anato nin bi sukjimnut sye kas subot yu, nin mewa yu sisu nin mit dik si nin onyar dik et. Nin ben sane, we nin bi sukjimnut sye do kas subot yu it yo, bere nin yo nutbot sukibit mwa gato nin ben nai yu ne o nde.

⁹Nin deyo ma ku nin yo, nin ketik yu ma, nin si git sugit sino e, nin nuk sukdu su yu e, nin kendo ma si nin sem mo nin bi nu et. Ye ne ma si nin kem mone yo, nin ki et su nde.

¹⁰Yefun Allah syo suktinggi mo nin kadik-kadik tara kadit yu wa ben nin nggiwa nin ben nin bi suk-i wa ós nje. Sane suktinggi gato Yefun Allah syo nai nin yi ne, nin ben suk su suktinggi ne sisu ri-roi wa ós ye yi et.

¹¹Ye gato ku suktinggi wa ki subot Yefun bi suktaru it yo, ye ne nutbot suktaru ne do, suktaru ne ma kadit Yefun Allah dakai, orete án ki suktaru ne sisu suktinggi ne sor. Ye gato ós ye yi yo, án ós ye yi su suktinggi ne et. Nin ben suk sane subere yé bes Yefun Allah gum kok mo suk mwa gato nin ben tepsu Yesus Kristus bi yetuge-i ne. Yefun Allah sa, bi suktinggi nggi wai o ré. Yefun anato gum kok wai su re sor to kapyo mato kapyo. Sangge.

¹²Ji bi nji ji bi nyanggon gato ji jimnotku, su re nin ku sukye ndo nde. Nin yeket sukye gato nin ku nde, wo nin ku sukye subere Yefun kak nin bi sukjimnut. Sukye ben nin ndobot nin dakai sare do, nin onyar kem ri mo Yefun Allah bado, nde, e? Nin yeket teker mo sukye gato nin ku ne nde. Nin wadigan yo ku sukye sane nde, yé mwa gato onyar kem mo Yefun ne sino ku sukye sane dom.

¹³Nin nutbot sukye ne teker eta nde, wo nin mit at wa sor, we ben sato nin si Kristus ku sukye ne sino. Sane bere su kam gato Kristus kadum An bi suktinggi bor mo bur re, nin mit at wa wai o ré.

¹⁴Yé kabor nin mo suk gato nin ben tepsu Yesus Kristus bi yetuge-i ne yo, bere Yefun ben sukndo su nin mone. Sane nin mit at wa sor, we Yefun Allah Gen gato nggi wai ne sisu nin mone petok sor.

¹⁵Nin ku sukye it yo, nin ku sukye mo suk gato nin ben sato re nde, nin gu yetu ge dik yo kwop e, nin syimsi suk e, nin ben sukibit nai ye yi e, nin duwer ye yi mo suk gato an ben e ne. Nin ku sukye mo sukibit sane nde,

¹⁶wo nin ku sukye mo sukndo gato nin ben tepsu ye Kristen ne yo, nin damen wa nde, wo nin un Yefun Allah gum, we yé jam do, nin anato sok mo Kristus bi yetuge-i.

¹⁷Yo nam nde ge, Yefun Allah ndobot yetu mwa mo bur re mo sukibit gato án ben it anare. Yefun Allah ndobot An dakai bi rus-i nyim. Sane An ndobot men yé gato sok mo An bi rus-i ne yo, bere yé gato bariwa simo os ndo gato Yesus Kristus kak ne te, An ben suma su ne? Bere An syo sukye wai nai yé ne o ré.

¹⁸Mo Yefun Allah bi sukdu, ye krom sare do, “Ye gato ben sukndo tepsu Yefun Allah mit ne titi fro wé kadit sukye kom mo pe gato ndo ne yo ndaf nde, wo os ne yé ré; sane ye gato bariket Yefun, ete ben sukibit mwa ne te, bere sa u ne? Bere án ku sukye wai kadit ne o ré.”

¹⁹Sane ye gato ku sukye tepsu pe gato Yefun Allah fro ne yo, ndo sa, án ben bi suk-i ne ri-roi sor. Án nai sukjimnut dik do, án onyar kem mo Yefun Allah gato ut án ne et. Yefun ne sa, benbot suk gato An tom ne petok sor.