Read Abun 1 Petrus 5 Bible Online

1 Petrus 5 - Abun bible

1 Petrus 5

¹Ji re anato tepsu yekwesu mo nu ari dik yo. Ji dakai me sukye gato Kristus ku su ji gro ré. Bere mo Yefun Allah bi nat-i ji sisu Kristus ku suk gato ndo wai o mone. Sane ji kiwa nin, yekwesu mo nu ari, nin jammo suk gato ji ki re et, sare,

²nin mewa Yefun Allah bi rus-i gato An syo nai nin sisu ndo et. Yefun Allah iwa nin mewa An bi rus-i sisu nin mit iwa sor, nin bariwa nde. Nin mewa Yefun bi rus-i, nin gro sye wa nin ku suk mwa wa nin dakai sor nde, wo nin dakai mit iwa nin ós Yefun bi rus-i ne, ete nin mewa Yefun bi rus-i mone sor.

³Nin mewa án yo, nin bes nin nggwa kok tepsu nin gum yepasye gato jom án nde, wo nin ben nin bi suk-i ndo subere nin kadum os ndo wa án benbot et.

⁴Sane bere, Kristus gato gum kok sye wai kadit yekwesu mwa ne sino ma ne, Kristus gato mewa Yefun Allah bi rus-i sisu ndo ne do bor mo bur re it yo, bere An syo suk gato ndo wai nai nin yekwesu mo nu ari mo suk gato nin ben ne o ré. Bere, ri ma, suk gato nin ku ne, kem ndo gesyos sor, suk yo ben ibit wokgan dom nde.

⁵Sane dom, nin yemsok si nggonnak, nin jammo ye gato ka yenggras et. Nin sino ben suk njep nai yu et. Nin bes nin nggwa kok dom nde, we mo Yefun Allah bi sukdu, ye krom sare do, “Yefun Allah bariket ye gato bes nggwa kok, wo An ben An bi suk-i ndo su ye gato ben an nggwa ga tepsu pa wokgan.”

⁶Sane nin ben nin nggwa ga tepsu pa wokgan mo Yefun Allah gwem et. Nin ben nin nggwa ga mo Yefun gato nggiwa mewa nin sisu ndo wai ne. Bere An dakai bes nin gum kok tepsu bi kam gato An fro ne.

⁷Yefun Allah iwa mewa nin, sane suk gato nin nutbot teker eta, nin nutbot teker wade nin bi sukjimnut waiyu nde, wo nin ki subot sukjimnut mwa ne sino nai Yefun Allah jam subere Yefun nai sukjimnut ne wé kadit nin et.

⁸Nin kem su nin fra et. Nin fro nin nggwa petok sor. Biris bi yekwesu iwa ben sukibit nai nin. Biris bi yekwesu muya-muma sato suge krok gato mise, gato gum do singa. Yekwesu ne meret yetu ge dik yo wa ben sukye nai, tepsu suge singa sok suge dik yo wa gu kwop, ete git.

⁹Nin onyar kem pe mo Kristus, ete nin bariket biris bi yekwesu si bi suk-i subere sukye gato an iwa ben nai nin ne yo kas nde. Nin bariket biris bi yekwesu si bi suk-i, we nin jam do, yé mwa ne sino gato si nin onyar kem mo Yefun Yesus mo bur re iwedewe ku sukye sagato nin ku ne dom.

¹⁰Nin ku sukye mone bergan sor ré, orete yo, Yefun Allah dakai nai nin wé kadit sukye subere nin kem ndo kadit sukye gato nin ku ne o ré. Yefun Allah ben An bi suk-i ndo su men dakai yi sor, sane bere Yefun ben nin onyar kem mo An nggi wai o. Bere Yefun ben nin bi sukjimnut kem mo An nggi wai o. Bere Yefun ben nin bi sukjimnut yo kas ram kadit An o nde, wo kem pe mo An sor. Nin tepsu Kristus bi yetuge-i ne anato Yefun Allah fro nin subere nin ku suk gato ndo wai mo Yefun bi nat-i to kapyo mato kapyo.

¹¹Yefun Allah ete nggiwa jowa men to kapyo mato kapyo. Sangge.

¹²Silas anato ós ji krom surat wokgan re wa nin. Ji nut do, an sa, ye Kristen gato ben an bi suk-i ri-roi tepsu Kristus mit. Ji iwa ji frot sukdu bok re subere nin jam do, sangge, kapre nin yo ben suk yo nyim wa Yefun Allah nde, An dakai bi sukjimnut sye kas subot nin sor. Ji krom sukdu subot sukndo gato Yefun Allah ben dakai yi su nin subere nin bi sukjimnut kem pe mo An. Sane nin bi sukjimnut ut krat mo sukdu ne {tepsu jam biro kom krat mo kweguk et}.

¹³Yé gato onyar kem mo Yefun Yesus mo kota Babilon, yé gato Yefun nai sok mo An bi rus-i tepsu Yefun nai nin ne yo, yé mwa ne ki ndo mo nin. Sane dom, Markus, gato ji jimnotku tepsu ji bi pa ne, an ki ndo mo nin.

¹⁴Nin ku yu yo, nin kambrut yu e, nin i yu tepsu nin yedik mo Kristus. Nin yé gato tepsu Kristus bi yetuge-i ne, Yefun Allah ete uttok nin sino sor. Ndo mo nin sor, kadit Petrus