Read Abun 2 Petrus 1 Bible Online

2 Petrus 1 - Abun bible

2 Petrus 1

¹Ji gato gum do Simon Petrus anato krom surat re wa nin. Ji anato tepsu Yesus Kristus bi pakwerut. Yesus Kristus bes ji gum yerasul. Ji krom sukdu re wa nin yé gato si men sino onyar kem mo Yesus Kristus. Yesus Kristus gato kak os wa men kem ndo kadit bot gesyos ne, Yesus Kristus gato tepsu Yefun Allah gato jom men ne, An ben An bi suk-i ri-roi su men sino anato nin onyar kem mo An tepsu men ré.

²Nin jam Yefun Allah si men bi Yekwesu Yesus Kristus kom mo mit anato Yefun Allah mewa nin tep yi sor nde, wo An mewa nin sisu ndo wai kadit ne o ré. Sane dom, Yefun Allah ete uttok nin mo suk mwa ne sino petok sor.

³Yefun Allah dakai ben sukndo su men. Yefun ben An bi suk-i ndo wai o ré anato An nai men tepsu An bi pá-i subere men jam An kom mo mit. Men jam An kom mo mit sane anato An ben men nggi su An dakai bi suktinggi, subere men ku suktinggi wa men kem not mo bur re. Men ku suktinggi wa men ben Yefun bi suk-i mo suk mwa ne sino sor.

⁴Yefun gato gum kok ne ben bi suk-i ndo su men anato An tom suk bok yo su men gato ndo yé ré. Suk gato An tom ne ndo wai o ré. Suk bok gato Yefun tom su men ne, An kak os wa men subere men sombok kadit sukibit gato jom men mo bur re. Sukibit gato men iwa ben ne ben men ibit ré, wo men jom suk bok yo gato An tom su men ne yo, bere men nggiwa men ben men bi suk-i tepsu Yefun mit it.

⁵An syo suk mwa nai men ne, sane yo, men onyar kem mo Yesus Kristus sor nde, wo men werwa men ben sukndo dom et. Men ben sukndo sor nde, wo men werwa men jam suk mwa kom mo mit dom et.

⁶Men jam suk mwa sor nde, wo men werwa men mewa men nggwa kadit men ben sukdaret nde. Men mewa men nggwa sor nde, wo men do ku sukye yo, men misyar Yefun nde, wo men werwa men jom An bi sukdu ne krat dom et. Men werwa men jom An bi sukdu krat mo sukye gato men ku ne sor nde, wo men werwa men ben Yefun Allah bi suk-i dom et.

⁷Men ben Yefun Allah bi suk-i sor nde, wo men werwa men jimnotku Yefun bi yetuge-i tepsu yedik jimnotku yu dom et. Men jimnotku Yefun bi yetuge-i tepsu yedik jimnotku yu ne sor nde, wo men werwa men jimnotku yé mwa ne sino dom et.

⁸Men ben men bi suk-i sane et. Men ben men bi suk-i sane mwa o yo, bere men jam men bi Yekwesu Yesus Kristus sisu ndo, ete bere suk mwa gato men ben ne kas sisu ndo, orete men nggiwa men ós ye yi dom.

⁹Sarewo men yo ben men bi suk-i sane nde yo, bere men tepsu ye gato gro ndu, men yo me suk sisu ndo nde, ete men mbrinket do, sukibit gato men ben suga nyim ne, Yefun Yesus tot or wé kadit men ré.

¹⁰Sane, ji bi nji bi nyanggon gato onyar kem mo Yefun Yesus, men wergat men nggwa nggi o et, subere suk gato Yefun Allah iwa men ben ne, men ben pe sor. Sane dom, men yé gato Yefun Allah fro suga nyim wa An nai sok mo An bi rus-i, An jam nyim wé ré, sane men werwa men ben men bi suk-i tepsu Yefun Allah bi pá-i petok sor. Men ben sane it yo, bere men yo mu brek kadit Yefun Allah bi os-i nde.

¹¹Sane bere men bi Yekwesu Yesus Kristus kak An mit wa men sok mo pe gato gesyos, ete men si An kem mone. Men bi Yekwesu Yesus Kristus gato kak os wa men sok mo Yefun Allah bi rus-i ne, bere An jom yé mwa ne sino mo pe ne.

¹²Sane anato ji ki suknapa wa nin subere nin simo sukdu gato ji krom more petok sor. Nin da jam sukduno ne kom mo mit, ete nin onyar kem mo sukduno ne, sarewo ji ki suknapa wa nin petok sor.

¹³Sane ji kem mo bur re tó yo, ji nut do, ndo sa, ji wergat nin, ji ki suknapa subere nin nutbot sukdu gato nin jam ne mwa o et.

¹⁴Ji ki suknapa sane, we ji jam do, yo nam nde ge, bere ji kwop ré. Men bi Yekwesu Yesus Kristus ki nai ji jam rer it.

¹⁵Sane ji werwa ji ben sa u, subere, ji do kwop it yo, nin ku os wa nin napawa sukdu gato ji krom more petok sor.

¹⁶Yesus Kristus kem mo bur re sa, men dakai me An bi suktinggi ne bor su men gro ré. Men bi Yekwesu gato men me su men gro re, men ki sukdu subot An nai nin jam mó ré. Sane sukdu gato men ki re ma kadit sukdu suski gato yetu ki wa kidar nje nde, wo men dakai me Yefun Allah bes Yesus Kristus gum kok wai o ré, men me su men gro, orete men waii ki subot sukdu ne nai nin jam ré.

¹⁷Su kam gato men bi Ai, Yefun Allah un Yesus Kristus ete bes An gum kok wai o ré, men tiwa nden dom. Men jam Yefun Allah gato gum kok wai ne, ki sukdu kadit gu nai Yesus Kristus do, “Ji bi Gan gato Ji jimnotku anare. Suk gato An ben ne Ji mit iwa.”

¹⁸Men dakai jam sukdu kadit gu nim ne tomgato men sisu Yefun Yesus mo banbo gato men bes gum kok ne.

¹⁹Men dakai jam sukdu ne mo banbo anato men jam do, suktaru gato Yefun Allah tarubot yenabi ne sangge it. Sa ndo sa, men jom suktaru ne pe, we suktaru ne tepsu sukru gato rer ku pe gato ndendu sor kom mo nden rer mone. Men jammo suktaru ne sor kom mo kam gato Kristus satu ma ete An waii ru nggi o sor kom mo men mit, tepsu men me bí ik it, bergan nyot rer ku men it.

²⁰Sukdu kwa yo gato sye wa nin napawa anare: men wadigan yo nggiwa men ki rer subot sukdu gato Yefun Allah tarubot yenabi ne nde, wo Yefun Allah Gen kak men bi sukjimnut sa, bere men ku os wa men jam,

²¹we sukdu ne yo ma kadit yetu bi sukjimnut-i nde, wo ye gato Yefun Allah Gen bok nggwa mó anato ki suktaru ne ma kadit Yefun Allah dakai.