Read Abun 2 Petrus 2 Bible Online

2 Petrus 2 - Abun bible

2 Petrus 2

¹Suga nyim tuya yenabi gato kidar Yefun Allah bi yetuge-i mó ré. Sane, yeguru gato kidar suk bere bor mo nin bi nat-i ne dom. Yeguru gane iwa ki bi sukduno-i gato yo sangge nde. Yeguru bi sukduno-i ne napyo sye sangge wa tik yé mit, sarewo án bok sukduno siri fros Yefun bi sukduno-i gato sangge mone. Men jammo yeguru bi sukduno-i ne yo, bere sukduno ne ben men dakai ibit mo koirut. Men bi Yekwesu Yesus Kristus tot suktot wa men ré, An nai men wé kadit sukibit subere sukibit yo jom men o nde, sarewo yeguru ne rewa Yefun Yesus. Yeguru bariket An o ré. Yeguru kidar nje ket kwayo-kwayo, sane bergan sor ré án dakai ben án dakai ibit mone ré.

²Yeguru bok ne ben án dakai ibit mone, sarewo bere yé mwa simo yeguru bi os-i. Bere yé mwa iwa ben siri su nggon e, yé mwa ben sukibit ket kwayo-kwayo e ne tepsu yeguru ben ne. Sane bere ye yi neya kiket Yefun Allah bi sukduno-i gato sangge ne do, sukduno ne ibit o ré.

³Yeguru ne gro sye wa án ku suk mwa wa án dakai. Sane án kidar nin su sukdu gato án dakai fro subere nin syo suk nai án. Sarewo nam it, Yefun Allah gato bere ndobot án fro wa syo sukye nai án. Yefun Allah fro wa bare án mo bot gesyos, Yefun Allah es ndek mo os koirut wa án ré.

⁴Bere Yefun Allah syo sukye nai án mo sukibit gato án ben ne, we suga nyim tuya Yefun syo sukye nai malaikat si nje mwa neya mo sukibit gato yé ben ne ré. Malaikat gato ben sukibit, Yefun Allah yo misyar nde, wo Yefun syo sukye nai malaikat ne it. Yefun bare malaikat ne mo pe gato yé wai o ré. Yefun Allah rai án ete bok án mo pe gato ndendu yut mo bur desnak kret kam gato Yesus Kristus satu ma ndobot men yetu si malaikat sino. Tepsu kam gane bere An syo sukye nai malaikat ne dom.

⁵Sane dom, tomga nyim tuya Yefun Allah yo misyar yetu gato ben sukibit mo bur re nde, wo sugane Yefun Allah ben syur syé sye gu nje gato bariket Yefun Allah mo bur re wé. Nowak si bi rus ge mufit sor ré anato Yefun Allah ós kem ndo kadit syur syé ne, we Nowak anato duno nje subere yé ben sukndo tepsu Yefun Allah mit.

⁶Sane dom tomga nyim tuya Yefun Allah syo sukye nai nje mo kota Sodom si kota Gomora. An syo bot git kota we ne or wé. Yefun Allah syo sukye subere An kadum do, bere An syo sukye nai yé gato bariket Yefun Allah digane.

⁷Sarewo Yefun Allah nai Lot wé kadit bot ne, we Lot ben bi suk-i ndo tepsu Yefun Allah mit sor. Lot jimnutbot yé gato ben sukibit mwa mone teker wade Lot kaim rere su, we yé mwa ne iwa ben siri su yu petok sor.

⁸Lot gato ben sukndo ne, an si yé mwa ne kem sino mo kota Sodom. Kamdik-kamdik Lot dakai me sukibit mwa gato yé ben ne, ete an jam yé deyo ma nukbot sukibit yo o mone, sane an nutbot ware, sukibit mwa gato yé ben ne ben an suwar waiyu ndo nde.

⁹Sane men me mone do, ye gato ben suk tepsu Yefun Allah mit do ku sukye yo, Yefun sa, owa nai yé ne wé kadit sukye ne ré. Sane dom, Yefun Allah owa syo sukye nai yé gato ben sukibit ne sor kom mo kam gato An ndobot men yetu mo bur re. Yefun rai yé gato bariwa ben suk tepsu Yefun mit ne yei, Yefun syo sukye nai yé ne sane sor kom mo kam gato An ndobot yetu mwa ne sino, bere An syo sukye mwa wai nai yé gane o ré.

¹⁰Yé gato ku sukye wai anato yé gato sibot sukjimnut gato tik án mit wa ben sukibit bu ne. Yé ne iwa ben sukibit ket kwayo-kwayo petok sor, án bariwa Yefun Allah jom án ré. Án bariwa jammo Yefun ré. Án bariwa jammo yekwesu mwa neya sino ré. Yeguru gato kidar suk gane, án mise. Án bes án nggwa kok. Án bes án nggwa kok anato án kiket suk mwa neya gato gesyos mo gu gato gum kok ne, án yo nyuwa dom nde.

¹¹Sarewo malaikat gato nggi wai kadit yeguru gato kidar suk ne, án da bi suktinggi mwa wai kadit yeguru ne, sarewo án yo kiket suk mwa neya gato gesyos ne mo Yefun Allah gwem mo gu ne nde.

¹²Yeguru gato kidar suk ne yo, án tepsu suge krok gato kem mo bur re. Bere ye but suge krok, ete ye gu kwop wé sor ré. Sane dom bere Yefun ben sukye nai yeguru mone tó. Yeguru ne yo nutbot suk sisu ndo nde, wo án ben suk tepsu sukjimnut gato kem mo án mit ne. Sane anato suk gato án jam nde, án ma duwer nje mó, ete án kabor nje mó dom. Sane kadit sukibit gato án ben ne, bere Yefun Allah gu án kwop wé tepsu ye gu suge krok ne wé.

¹³Án ben sukye nai yé mwa, sane bere Yefun Allah waii ben sukye nai án dom. Án bi sukjimnut do, ndo sa, án kem mo bur re wa án ben suk mwa ket án í sor, ete án iwa ben suk sane bor wa yé mwa jam. Án ma kem njepbot nin e, git sugit sino su nin yo, bere án ben nin gum ibit, we án ben sukibit ket án í sor.

¹⁴Kamdik-kamdik yeguru ne da bro wa ben siri bu. Nggon gato iwa ben siri mwa ne, yeguru iwa án mu ku petok sor. Án werwa ben kidar yé gato yo onyar kem ri mo Yefun nde tó ne, subere án gwat mu ges mo os ibit o ré. Án sa, owa án ku suk mwa gato án gro sye wa ne. Bere Yefun Allah ben sukye nai yeguru gane sino mo sukibit mwa gato án ben ne o ré,

¹⁵we án mu yak yi kadit os gato ndo ne, sane án bi sukjimnut yo ndo o nde. Án simo yenggras Beor bi pa, gato gum do Bileam ne bi os-i. Bileam re iwa ben sukibit subere an ku sugum mone.

¹⁶Sarewo Yefun Allah syo suktinggi nai keledai ge dik yo, ete keledai ne ki suk tepsu yetu ndantom Bileam mo sukibit gato Bileam mitwa bere an ben ne. Sane keledai duyawa yenabi Bileam, ete Bileam yo ben sukibit daret ne o nde.

¹⁷Yeguru gato kidar suk anato tepsu syur nggrup gato sá ré. Men nut do, án syo suk gato men mitmo nai men ne ware, án yo ós men wokgan yo dom nde. Yeguru ne tepsu nyotem gato ndu gato gwat nogi ma ware, nofuf krat gwat mu ré. Men nut do, án ós men su sukduno gato ndo wa men ware, án yo ós men mo nde, suk yo mo nde. Yefun Allah fro nat gato ndendu yut wa bere yé ne kem mó.

¹⁸Yeguru ne ki suk su án syokwet wik, án ki án bi sukdu-i, án dakai bes án nggwa kok. Sane yé gato sombok kadit os ibit sim ne, yeguru ne duno sare do, “Men da bro wa ben siri su nggon anato ndo.” Yé gato re ete sim titi fro kadit yé bok yo gato simo os ibit ne, yeguru duno án su sukduno daret bok yo digare, ete yeguru tik yé ne mit, subere án ges mo os ibit satu o ré.

¹⁹Yeguru ne tom su án do, “Su re bur re bi suk-i yo jom men o nde, sane sukduno gato nyim ne, men jambot o nde, men ben ket men í sor, bere Yefun Allah iwa men ré.” Sarewo bur re bi suk-i gato ben yetu ibit mo koirut ne jom yeguru ne tepsu pakwerut, we suk gato nggi wai kadit men do jom men it yo, men tepsu pakwerut wa suk ne.

²⁰Yé gato jammo men bi Yekwesu Yesus Kristus gato ós men kem ndo to kapyo mato kapyo ne, Yesus Kristus ne sombok án kadit suktinggi mwa gato ben án ibit mo bur re ré. Sarewo suktinggi mwa gane do rai án satu, ete jom án tepsu bi pakwerut ne o yo, bere ri ma án ibit wai kadit nyim neya o ré.

²¹Sa ndo sa, án jam nde Yefun Allah bi os-i gato ri-roi ne anato ndo wai kadit án jam Yefun bi os-i, orete ri ma án brek án dari ket Yefun Allah bi sukdu-i gato yé duno án su ne. Ye gato jam Yefun bi os-i, orete an brek an dari ket Yefun it yo, bere an ku sukye wai o ré.

²²Ye ne do brek an dari ket Yefun it yo, tepsu sukamno kwa we gato ye ki do, “Ndar gwi or, ndar satu ma git ndar gwi ne o ré,” si “Ye mus jot kwo ré, orete jot ne satu ma ngga mo budat o ré.”