Read Abun 2 Petrus 3 Bible Online

2 Petrus 3 - Abun bible

2 Petrus 3

¹Ji bi nji ji bi nyanggon gato ji jimnotku, ji bi surat kedowe wa nin anare. Ji krom surat we ne sino tepsu suknapa wa wergat nin subere nin bi sukjimnut ne ndo sor.

²Ji iwa nin napawa sukduno gato nyim neya Yefun Allah tarubot An bi yenabi wa nin ne. Sane dom ji iwa nin napawa sukduno gato Kristus men bi Yekwesu gato kak os wa men kem ndo to kapyo mato kapyo ne tarubot yerasul wa nin ne.

³Sukdu ketke nin jamwa nyim anare, karowa kam gato Yesus Kristus satu ma mo bur re yo, bere yé mwa neya gato iwa ben suksiri bu ne, bere yé mwa bor o mone o ré. Yé mwa ne ben sukibit ket án í ne sor. Yé ne bere ki nin gum ibit, ete sa nin.

⁴Yé ne sa nin ete ki do, “Yefun Yesus tom do, An ma, sarewo An kaim ana u ne? Yesus Kristus yo bor mo nde tó! Kadit kam gato men bi amui kwop ne sor kom mo kam re, suk mwa ne kas sagato ketke Yefun Allah ut ne.”

⁵Sarewo yé gane dakai bariwa nutbot sukdu gato ki do, Yefun Allah benbot sukdu gato An ki ne. Suga nyim tuya Yefun Allah ut gu nim ne si bur re, Yefun Allah ki su syokwet sor ré ete suk mwa ne dakai bor tepsu sukdu gato An ki ne. Yefun Allah wat bur kadit syur, ete bur re kem dor kadit syur ré.

⁶Yetu mwa gato kem mo bur suga nyim neya, Yefun Allah ki su syokwet sor ré, ete syur syé ma gu yé mwa ne kwop or.

⁷Sarewo su re Yefun Allah ki sukdu subere mewa gu nim si bur re sane sor kom mo kam gato An syo bot git suk mwa gato kem mo bur re si gu nim ne wé ré. Sane su re, An mewa gu nim si bur re sane sor kom mo kam gato An syo sukye nai yé gato bariket Yefun, ete bere An ben yé ne ibit mo koirut or ré.

⁸Sarewo ji bi nji ji bi nyanggon, nin napawa sukdu gato ji krom re et, Yefun Allah bi sukjimnut mo kam dik do, kam dik ne tepsu tahun ribu dik sor ré. Sane dom, Yefun Allah bi sukjimnut mo tahun ribu dik do, tahun ribu dik ne tepsu kam dik sor ré. … kam gato Yesus Kristus ma ne, bere An ma tepsu yegitsi gato ma wa syimsi suk ne, bere men gensu sor ré

⁹Yetu ge bok yo nut do, suk gato Yefun Allah tom ne, An yo benbot kekro nde. Sarewo Yefun yo ben bi suk-i yó nde, wo An yo ma kekro nde, we An eswa men yetu kwet kadit sukibit gato men ben ne, ete men jammo An. An bariwa men yetu ge dik yo ges mo bot gesyos dom nde.

¹⁰Sarewo kam gato Yesus Kristus ma ne, bere An ma tepsu yegitsi gato ma wa syimsi suk ne, bere men gensu sor ré. Tepsu kam ne, ben sato suk yo pu mo gu, ete sugane gu ne fres ré. Ete suk mwa gato kem mo gu nim ne bot git or ré. Sane dom bur re si suk mwa gato mo bur re fres or ré.

¹¹Bere Yefun Allah ben suk mwa re ibit or ré, sane men yé gato kem mo bur re yo, men ben men bi suk-i sa u ne? Men ben sare, men ben Yefun Allah bi suk-i su men mit dik si men onyar dik, men bi men nggwa mo Yefun wa men ben An bi suk-i sor.

¹²Men ben Yefun bi suk-i, men eswa kam gato Yefun Allah tom su men ne, men mit iwa kam ne ma kekro et. Su kam ne, bot git gu nim ne or ré. Suk mwa gato kem mo gu nim ne, bere bot kam is nju or ré.

¹³Sarewo men eswa gu be si bur be gato Yefun Allah tom su men ne. Mone yé mwa ne sino ben sukndo tepsu Yefun Allah mit sor.

¹⁴Sane it yo, ji bi nji ji bi nganggon gato ji jimnotku, men eswa kam gato Yefun Yesus tom re it yo, men kamo nde, wo men wergat men nggwa, subere men ben suk mwa ne ndo sor, kwa yo gato ibit mo An gwem mo nde. Sane dom, men werwa men si Yefun Allah kem ndo su yu petok sor.

¹⁵Men nut do, men bi Yekwesu Yefun Yesus yo ma kekro nde, we Yefun eswa yei, subere yetu ge bok yo o ku os wa brek kadit os ibit, ete jammo Yefun Yesus subere án kem ndo to kapyo mato kapyo mo Yefun Allah bi nat-i. Men bi nji, Paulus gato men jimnotku ne krom bi sukdu-i digane dom ré. Yefun Allah kak Paulus bi sukjimnut ko anato Paulus krom sukdu ne.

¹⁶Surat mwa gato Paulus krom ne, an krom sukdu subot kam gato bere Yesus Kristus satu ma ne. An wergat men ben men bi suk-i mwa ne ndo sino. Sukdu bok yo mo an bi surat ne sukye wa men jam rer kom mo mit. Yé gato yo onyar kem ri mo Yefun nde, ete jam suk ri nde tó, yé ne ki subot Paulus bi sukdu-i siri kadit Paulus bi sukjimnut-i gato an krom mo bi surat ne ré. Yé gato jam suk ri nde ki subot Yefun Allah bi sukdu gato ye yi krom mo surat yi neya siri dom ré. Kom mo rut yo, bere Yefun Allah bare ye gane mo bot gesyos ré.

¹⁷Sarewo ji bi nji ji bi nyanggon gato ji jimnotku, nin dakai jam do, yé bok ne ki subot Yefun Allah bi sukdu siri mó ré. Sane it yo, nin mewa nin nggwa subere yé gato ki bi sukdu-i daret ne yo ku os wa gwat nin mu mo án bi os-i gato siri kadit Yefun Allah bi sukdu-i ne nde. Nin mewa nin nggwa kadit yé gato ki bi sukdu-i daret sane, subere nin jom Yefun Allah bi sukdu-i gato sangge ne pe sor.

¹⁸Men bi Yekwesu Yesus Kristus gato nai men kadit sukye ete jowa men yetu ne, An ben sukndo su men yetu dakai yi. Sane nin dom ben nin bi suk-i ne ndo mwa wai o kadit nyim ne sor. Nin jam Yesus Kristus sisu ndo o et. Men bes An gum kok su re sor to kapyo mato kapyo. Sangge. Ndo mo nin sor, kadit Petrus