Read Abun 1 Yohanes 2 Bible Online

1 Yohanes 2 - Abun bible

1 Yohanes 2

¹Ji krom surat re wa nin, ji bi pá mo Kristus bi de-i ne subere nin yo ben sukibit yo o nde. Sarewo ye do ben sukibit mó yo, men bi yegweswai mó. Men bi yegweswai anato Yesus Kristus gato ben bi suk-i ri-roi. An ki sukndo wa men mo men bi Ai, Yefun Allah gwem.

²Yesus Kristus bi nggwa kwop wa tot men bi suktot mo sukibit gato men ben ne wé ré. An tepsu suksom gato totwa sukibit gato men ben ne sor nde, wo An totwa sukibit gato men yetu mwa mo bur re iwedewe ne sino ben ne or ré.

³Men benbot Yefun Allah bi sukduno-i ne yo, bere men jam mone do, men si Yefun Allah mit kem mo yu it.

⁴Ye gato ki do, an sa, an si Yefun Allah mit kem mo yu, sarewo an yo benbot Yefun Allah bi sukduno-i nde yo, ye ne kidar, Yefun Allah bi sukdu gato sangge yo kem mo an mit nde.

⁵Ye gato benbot Yefun Allah bi sukduno-i ne yo, ye ne bi sukjimnut sye kas subot Yefun Allah sisu sangge it. Men ben suk sane anato men jam do, men si Yefun Allah tepsu dik it.

⁶Ye to ki do, an sa, si Yefun Allah tepsu dik it yo, bere an ben an bi suk-i tepsu Yesus Kristus ben ne et.

⁷Ji bi nji, ji bi nyanggon gato ji jimnotku, sukduno gato ji krom re, sukduno be nde, wo sukduno rok gato nin jam kadit ketke nin mit si nin onyar kem mo Yesus Kristus. Yefun Allah bi sukduno re nin dakai jam mó ré.

⁸Nin da jam, sarewo sukduno gato ji krombot re anato sukduno gato be dom. Sukduno be re bor mo suk gato Yesus Kristus ben ne. Or o sukduno be bor mo nin dakai dom. Sane ndendu bi suk-i ne titi wé, ete sukru gato sangge rer ku men it. {Nin ben sukibit mo ndendu ne o nde, wo nin ben suk gato ndo mo pe gato rer mwa wai o.}

⁹Ye gato ki do, an sa, ben suk gato ndo, an kem mo pe gato rer. Sarewo ye gato bariket an bi nji ne yo, ye ne tepsu ye gato kem mo ndendu tó, an ben an bi suk-i ibit anane.

¹⁰Ye to bi sukjimnut sye kas subot an bi nji, an ben sukndo tepsu ye gato kem mo pe gato rer ré. Sane an yo ben suk gato ben nje ges mo os ibit mo nde.

¹¹Sarewo ye to bariket an bi nji ne, an tepsu ye gato kem mo ndendu tó, an ben sukibit petok sor. An gro ndu mo ndendu ne, sane an jam nde pe gato an mu mone ware, an ben an bi suk-i daret sor.

¹²Ji krom sukdu re wa nin, ji bi pá, we men jam do, Yefun Allah yo maskwa nin mo sukibit gato nin ben ne o nde. An yo nutbot sukibit ne o nde, we Yesus Kristus tot wé ré.

¹³Ji krom surat re wa nin, ji bi yenggrás, we nin mit kem mo Yefun Yesus gato kem kadit ketke ne it. Ji krom surat re wa nin, ji bi yemsok ji bi nggónnak, we nin sa, nin nggi wai kadit biris bi yekwesu ré.

¹⁴Ji krom surat re wa nin, ji bi pá, we nin mit kem mo men bi Ai, Yefun Allah it. Ji krom surat re wa nin, ji bi yenggrás, we nin mit kem mo Yefun Yesus gato kem kadit ketke ne it. Ji krom surat re wa nin, ji bi yemsok ji bi nggónnak, we nin bi sukjimnut nggi, nin grem Yefun Allah bi sukduno mo nin mit si nin onyar, nin nggi wai kadit biris bi yekwesu ré. … ye gato ben bi suk-i tepsu Yefun Allah mit yo, bere ye ne kem ndo to kapyo mato kapyo

¹⁵Nin mit iwa sukibit mo bur re nde. Suk mwa ne sino gato ibit mo bur re, nin bariwa. Ye gato iwa sukibit mo bur re, ye ne bariwa men bi Ai, Yefun Allah it anane.

¹⁶Sukibit mwa gato mo bur re sato, ye bi sukjimnut sye wa benbot sukjimnut gato tik ye mit wa ben sukibit ket ye í ne e, ye gro sye wa suk e, ye dakai un ye dakai mo suk gato ye ku e, ye ben e ne. Sukibit mwa ne yo ma kadit men bi Ai mo gu nde, wo suk mwa ne ma kadit yetu mo bur re kaii.

¹⁷Sukibit mwa gato mo bur re si sukibit gato ye iwa ye ben ne, yo nam nde ge, bere or ré. Sarewo ye gato ben bi suk-i tepsu Yefun Allah mit yo, bere ye ne kem ndo to kapyo mato kapyo.

¹⁸Ji bi pá, karowa bur re kru it. Ye ki sukdu re nai nin jam suga nyim sare do, karowa bur re kru yo, yekwesu mo yeko wa Kristus ma. Re ne biris bi yekwesu bi yeko wa Kristus ne deyo ma mó ré. Sane men jam do, karowa bur re kru it.

¹⁹Suga nyim ye gato sok mo yeko ne, án sisu men, orge án mu kadit men ré. Ye gare da si men, sarewo án yo mit dik su men nde. Sato án mit dik su men yo, bere án yo mu kadit men nde, sarewo án mu kadit men, ete mone men jam do, án yo mit dik su men mo nde.

²⁰Sarewo Yesus Kristus syo Yefun Allah Gen bok nggwa mo nin ré. Sane anato nin yé mwa ne sino jam sukduno gato sangge it.

²¹Sane ji krom surat re, we nin jam nde sukduno gato sangge nde. Sane nde, wo nin jam sukduno gato sangge ne it. Nin jam do, sukduno gato sangge ne, sukdu mone mwa ne sino sangge sor, kwa yo gato sukkidar yo mo nde.

²²Je u anato kidar suk ne? Ye gato kidar suk bere ki sato re do, Yefun Allah yo bes Yefun Yesus gum Kristus nde. Yefun Allah yo syogat Yefun Yesus ma mo bur re wa ós men yetu nde. Ye gato ki sukdu sane anato tepsu yekwesu mo yeko wa Kristus. Ye ne bariket men bi Ai, Yefun Allah si Yefun Allah bi Gan ne sino.

²³Ye gato bariket Yefun Allah bi Gan, bere ye ne si Yefun Allah yo tepsu dik nde. Sarewo ye to ki do, an onyar kem mo Yefun Allah bi Gan yo, bere ye ne si Yefun Allah tepsu dik dom.

²⁴Sane yo, sukduno gato nin jam kadit kam gato nin onyar kem mo Yefun su ketke ne, nin napawa pe. Nin do mewa sukduno ne sisu ndo yo, bere nin si nin bi Ai Yefun Allah si Yefun Allah bi Gan ne tepsu dik petok sor. … nin jam o do, ye gato ben suk tepsu Yefun Allah mit ne anato tepsu Yefun Allah bi pá-i anane

²⁵Sane Yesus Kristus dakai tom su men do, bere men kem ndo to kapyo mato kapyo.

²⁶Ji krom sukdu re wa nin subot ye gato werwa ben kidar nin su sukduno gato siri.

²⁷Yesus Kristus syo Yefun Allah Gen bok nggwa mo nin dakai mo ré. Yefun Allah Gen kem mo nin mit si nin onyar sane yo, nin yo mitwa ye yi ma duno nin nde, we Yefun Allah Gen mo nin mit ne dakai duno nin subot suk mwa ne sino. Sukduno gato Yefun Allah Gen duno nin su ne sangge, yo siri mo nde. Sane nin jambot sukduno ne, nin si Yesus Kristus tepsu dik mo suk mwa gato nin ben mo bur re sor.

²⁸Sane ji kiwa nin, ji bi pá do, nin si Kristus tepsu dik petok sor, subere su kam gato An satu ma ne yo, bere nin ku An tepsu nin bi yesyim, bere nin damen wa An nde.

²⁹Nin dakai jam do, Kristus ben An bi suk-i tepsu Yefun Allah mit. Sane nin jam o do, ye gato ben suk tepsu Yefun Allah mit ne anato tepsu Yefun Allah bi pá-i anane.