Read Abun 1 Yohanes 3 Bible Online

1 Yohanes 3 - Abun bible

1 Yohanes 3

¹Yefun Allah bi sukjimnut kas subot men sye teker anato An kendo men do, An bi pá-i. Sangge, men anato Yefun Allah bi pá-i. Yé gato ben sukibit mo bur re jam nde Yefun, sane anato án jam nde men dom.

²Ji bi nji ji bi nyanggon gato ji jimnotku, su re men anato Yefun Allah bi pá-i it, sarewo suk gato bere bor mo men su kam sari ne ma, men jam ri nde tó. Yesus Kristus do satu ma it yo, bere men ku An kaim-i, ete bere men kaim-i ne tepsu An kaim-i ne ré.

³Ye gato mit kem mo suk gato bere bor ne, bere an mewa an nggwa subere an yo ben sukibit o nde, wo an ben an bi suk-i ne ndo sor, tepsu Yesus Kristus dakai ben ne.

⁴Ye gato ben sukibit bu, an ben suk siri kadit Yefun Allah bi sukduno, we ye gato bariket Yefun Allah bi sukduno ne, bere an ben sukibit.

⁵Sarewo sukibit mwa gato men ben ne, Yesus Kristus ma mo bur re wa tot wé kadit men ré, nin dakai jam ré. Sane dom, nin jam do, Kristus dakai yo ben sukibit yo mo nde.

⁶Sane ye gato si Yesus Kristus tepsu dik it yo, ye ne yo ben bi suk-i ibit gat o nde. Ye gato ben bi suk-i ibit gat yo, ye ne jam nde Yefun, ye gane yo jam Yefun wokgan yo dom nde.

⁷Ji bi pa, nin jammo ye gato werwa ben kidar nin su sukduno gato siri ne nde. Sukdu gato sangge anare, ye gato ben bi suk-i ndo tepsu Yefun Allah mit, ye ne anato Yefun Allah nai sok mo An bi rus-i, tepsu Yesus Kristus sok mo Yefun Allah bi rus-i ré.

⁸Sarewo ye gato ben sukibit bu anato sok mo biris bi yekwesu bi rus-i, we biris bi yekwesu ben sukibit sane kadit ketke ne it. Sane anato Yefun Allah bi Gan ma mo bur re subere An ben biris bi yekwesu bi os-i ibit or ré.

⁹Ye gato sok mo Yefun Allah bi rus-i, án yo ben bi suk-i ibit gat o nde, we Yefun Allah Gen kem pe mo án mit si án onyar it. Yefun Allah anato tepsu án bi Ai, sane án yo ben bi suk-i ibit gat o nde.

¹⁰Sane men jam Yefun Allah bi rus-i tara kadit biris bi yekwesu bi rus-i sato re do, ye to bariwa ben suk tepsu Yefun Allah mit ne yo, ye ne yo sok mo Yefun Allah bi rus-i nde. Sane dom ye to bariwa bi sukjimnut sye kas subot ye yi ne yo, ye gane yo sok mo Yefun Allah bi rus-i dom nde.

¹¹Kadit ketke men duno nin do, men bi sukjimnut sye kas subot yu et.

¹²Men ben suk tepsu Kain nde. Kain ne sok mo biris bi rus-i. An gu an dakai bi nji dowok kwop ré. Suma ben anato Kain gu an bi nji dowok kwop ne? Kain bariket an bi nji dowok mo gato an bi nji dowok ne ben bi suk-i ndo, wo Kain ben bi suk-i ne ibit.

¹³Sane ji bi ji nji bi nyanggon, ye gato ben sukibit mo bur re, bere bariket nin tepsu Kain bariket an bi nji dowok ne, nin yeket suk sane nde.

¹⁴Men bi sukjimnut sye kas subot men bi nji mo Kristus bi rus-i anato men jam do, men tepsu ye gato bere kwop o nde, men sok mo biris bi yekwesu bi de-i o nde, wo men sok mo Yefun bi de-i o ré, men tepsu ye gato kem ndo to kapyo mato kapyo it. Sarewo ye gato bi sukjimnut sye yo kas subot ye yi nde, bere ye ne yo kem gesyos nde, wo bere an kwop rut ré.

¹⁵Ye gato bariket ye yi ne yo, an tepsu ye gato gu ye yi kwop. Nin jam do, ye gato gu nje kwop daret, bere an yo kem ndo to kapyo mato kapyo nde.

¹⁶Men me mo Yesus Kristus sa, bere men jam suk gato men ben tepsu ye gato bi sukjimnut sye kas subot ye yi. An bi nggwa wa kwop win men. Sane dom, men waii bi nggwa wa men bi nji mo Kristus bi rus-i dom et.

¹⁷Sane ye gato ku suk mwa mo bur re, ete an me an bi nji mo Kristus bi rus-i deyo gato yewa suk, wo an yo jimnotku ye ne nde, ete an yo ós ye ne su suk yo mo nde, or an ki do, an bi sukjimnut sye kas subot Yefun Allah, sane yo, men jam do, ye ne kidar ko ne.

¹⁸Ji bi pa, men ki su men syokwet do, men bi sukjimnut sye kas subot ye yi sane sor nde, wo men bi sukjimnut kas subot ye yi sisu sangge et, men ben suk yo bor mone.

¹⁹Men bi sukjimnut sye kas subot ye yi sisu sangge sane yo, men jam do, sangge, men sok mo Yefun Allah bi rus-i it anane. Sane dom, bere men yo nokwa Yefun Allah o nde, men yo kwabom dek bot suk yo o nde.

²⁰Sane kapre men bi sukjimnut mwa mo men mit gato ben men nokwa Yefun ne yo, men yo kwabom dek subot suk ne nde, we men jam do, Yefun Allah bi sukjimnut-i ne ko wai kadit men bi sukjimnut-i ne o ré. Men jam do, Yefun jam suk mwa ne kom mo mit ré.

²¹Sane ji bi nji ji bi nyanggon gato ji jimnotku, men bi sukjimnut mwa gato ben men nokwa Yefun mo nde yo, bere men yo nyuwa men karowa Yefun Allah nde.

²²Men do benbot An bi sukduno, ete men ben suk gato An iwa men ben ne yo, bere An syo suk gato men ndek mo An nai men ne sor.

²³Yefun Allah duno men sare do, men mit si men onyar kem mo An bi Gan, Yesus Kristus, ete men bi sukjimnut sye kas subot yu, tepsu suk gato Yesus Kristus duno men su ne.

²⁴Ye gato benbot Yefun Allah bi sukduno ne yo, bere ye ne si Yefun Allah tepsu dik. Sane dom Yefun Allah si ye ne tepsu dik. Men jam do, Yefun Allah si men tepsu dik, we An syo An Gen bok nggwa mo men it.