Read Abun 1 Yohanes 5 Bible Online

1 Yohanes 5 - Abun bible

1 Yohanes 5

¹Ye gato nai sukjimnut do, sangge, Yefun Yesus anato Yekwesu gato Yefun Allah syogat ma mo bur re kak os ndo wa men yetu tepsu Yefun Allah tom ne yo, ye ne sok mo Yefun Allah bi rus-i it. Sane ye gato bi sukjimnut sye kas subot an bi Ai mo gu bere bi sukjimnut sye kas subot bi Ai ne bi pá-i mwa ne sino dom.

²Men jam men bi sukjimnut sye kas subot Yefun Allah bi pá mwa ne sare, men bi sukjimnut sye kas subot Yefun Allah, ete men benbot An bi sukduno ne sor,

³we sare, men bi sukjimnut sye kas subot Yefun Allah, sane bere men benbot An bi sukduno ne sor. Men benbot Yefun Allah bi sukduno ne yo yé teker eta nde,

⁴we Yefun Allah bi rus-i sa, nggi wai kadit biris bi rus-i gato ben sukibit mo bur re. Men onyar kem mo Yefun Yesus, sane anato men nggi wai kadit biris bi rus-i ne o ré.

⁵Je u anato nggi wai kadit biris bi rus-i ne? Ye gato nai sukjimnut do, sangge, Yefun Yesus anato Yefun Allah bi Gan ne.

⁶Yesus Kristus anato Yefun Allah bi Gan. An ku syur, ete Yefun Allah ki sane. An dé sye, ete Yefun Allah ki sane. An ma mo bur re wa An ku syur sor nde, wo An ma wa An kwop An dé sye dom. Yefun Allah Gen anato ki rer wa men jam do, Yefun Yesus anato Yefun Allah bi Gan dom. Sane men jam do, sukdu ne sangge we Yefun Allah Gen yo kidar men nde.

⁷Suk kwa gri gato kadum rer wa men jam do, Yesus Kristus anato Yefun Allah bi Gan ne anare,

⁸Yefun Allah Gen ki rer nai men jam. Kedowe o, tomgato Yohanes ras Yefun Yesus mo syur ye jam sukdu subot An mone. Si kedogri o Yefun Yesus dé gato sye wa men anato men jam do, sangge, Yefun Yesus ne anato Yefun Allah bi Gan. Kwa gri gane bi sukdu tepsu yu ré.

⁹Yetu dakai ki bi sukdu-i sa, men jammo. Sarewo Yefun bi sukdu-i ne ndo wai wa men onyar kem mó, sane men jammo ete ndo wai. Yefun Allah ki bi sukdu subot An bi Gan ne rer wa men jam ré, sane men jammo et.

¹⁰Ye gato nai sukjimnut do, sangge, Yefun Yesus anato Yefun Allah bi Gan, ye ne onyar kem mo sukdu gato Yefun Allah ki ne ré. Sarewo ye gato nai sukjimnut do, an bariwa sukdu gato Yefun Allah ki ne, tepsu an ki do, Yefun Allah kidar ko ne, we án nut do sukdu gato Yefun Allah ki subot An bi Gan ne yo sangge nde.

¹¹Yefun Allah bi sukdu-i anare, An fro os wa men kem ndo to kapyo mato kapyo ré. Yefun Allah syogat An bi Gan, Yefun Yesus ma mo bur re kak os wa men yetu subere men kem gesyos ré.

¹²Sane men kak men mit wa Yefun Allah bi Gan it yo, men kem nde to kapyo mato kapyo it anane, wo men yo kak men mit wa Yefun Yesus ndo yo, men yo kem ndo to kapyo mato kapyo nde.

¹³Ji krom surat re wa nin yé gato onyar kem mo Yefun Allah bi Gan subere nin jam do, nin kem ndo to kapyo mato kapyo it.

¹⁴Men yo damen wa men ki suk su Yefun Allah nde, we men jam do, men ndek suk gato tepsu Yefun Allah mit it yo, bere An jam men bi sukdu ré.

¹⁵Yefun Allah jam men bi sukdu subot suk gato men ndek mo An ne yo, sane men jam do, bere Yefun Allah syo suk ne nai men ré.

¹⁶Men do me ye Kristen ge dik yo ben sukibit, ete sukibit ne yo ben os yewa mit wa an si Yefun Allah nde yo, nin benadi wa, nin ndek mo Yefun Allah subere Yefun Allah ós ye ne kem ndo satu. Sarewo sukibit gato ben os yewa mit wa an si Yefun Allah, we an bariket Yefun Allah it yo, men ndek mo Yefun Allah wa ós ye gato ben sukibit sane nde.

¹⁷Suk mwa gato men ben siri kadit Yefun Allah mit anato sukibit, wo sukibit mwa ne sino yo ben os yewa mit wa men si Yefun Allah nde.

¹⁸Men jam do, Yefun Allah bi pá-i, án yo ben sukibit gat o nde, we Yefun Allah bi Gan mewa án ré. Biris bi yekwesu yo ku os wa ben sukye nai án nde.

¹⁹Biris bi yekwesu jowa yetu mwa ne sino gato ben sukibit mo bur re, sarewo men jam do, men re anato sok mo Yefun Allah bi rus-i.

²⁰Men jam o do, Yefun Allah bi Gan ma mo bur re ré, An ós men, An kak men bi sukjimnut, subere men jam Yefun Allah gato sangge ne. Men si Yefun Allah gato sangge ne tepsu dik. Men si An bi Gan Yesus Kristus tepsu dik it. An sor anato Yefun gato sangge ré. An sor anato ós men kem ndo to kapyo mato kapyo ré.

²¹Ji bi pa, nin mewa nin nggwa subere nin som sukdaret win Yefun Yesus nde.