Read Abun Yudas 1 Bible Online

Yudas 1 - Abun bible

Yudas 1

¹Ji gato gum do Yudas, gato Yesus Kristus bi pakwerut, gato bi nji mo Yakobus, ji anato krom surat re wa nin yé gato men bi Ai, Yefun Allah nai sok mo An bi rus-i. Yefun Allah bi sukjimnut sye kas subot nin. Yesus Kristus mewa nin.

²Yefun Allah ete dakai jimnotku nin sye teker. Yefun Allah ete uttok nin petok sor. Yefun Allah ete bi sukjimnut sye kas subot nin petok sor.

³Ji bi nji ji bi nyanggon gato ji jimnotku, sangge ji da iwa krom surat wa nin subot os ndo gato Yefun Yesus kak wa men kem ndo to kapyo mato kapyo ne. Ji da iwa krom subot sukdu ne gato men sino jammo mó ré, sarewo suk yo ben sato tik ji mit wa ji krom sukduno wa nin subere nin bes sukdu subot Yesus Kristus ne kok o et. Nin jammo suk gato ji krom re et. Yefun Allah bi sukduno subot Yesus Kristus ne, An grem kem wam dik su men yé gato onyar kem mo Yesus Kristus. Sukdu ne kwa yo gwet mo nde. Sane nin werwa nin bes sukdu ne kok wai kadit sukdu yi neya et. Sane dom nin duwer yé gato ma wa duwer nin mo sukdu ne et. Ji syogat nin ben sane,

⁴we, su re ji jam do, yetu ge bok yo gato misyar Yefun Allah da ma fros men mo nu ari ré, sarewo men jam nde án si men mone. Yefun Allah bi sukdu-i subot os ndo gato An fro wa men ne, yé ne brek sukdu ne tara kadit bi sukjimnut gato sangge ne or ré, subere án ku os wa án dakai ben siri su nggon ket án í sor. Án bariket men bi Yekwesu ka dik ne sor. Án misyar Yesus Kristus gato gum kok sye wai o ré. Sane kam sari ne ma án ku sukye tepsu ye krombot mo Yefun Allah bi sukdu suga nyim tuya ré.

⁵Sukdu mwa re, nin dakai jam ré, sarewo nin nutbot suk gato ji krom re sisu ndo et, Yefun Allah da nai ye Israel wé kadit sukye mwa gato án ku mo bur Mesir ne, sarewo ri ma, yé Israel gato misyar An ne, An gu kwop wé ré.

⁶Sane dom, suga nyim tuya, malaikat gato ben bi suk-i tara kadit suk gato Yefun Allah fro wa án ben ne sor wade án mu kadit án bi nat-i ne sa, Yefun Allah rai án su bus gato kem krat to kapyo mato kapyo, ete Yefun Allah grem án mo pe gato ndu mo bur desnak ré. Án kem mone sor kom mo kam sye gato Yefun Allah ma ndobot yetu mwa ne sino, ete su kam ne bere Yefun Allah bare malaikat gane mo bot gesyos ré. … yé gato misyar Yefun re, án jam nde Yefun bi suk-i, sane án kabor nje daret subot Yefun bi suk-i mwa neya

⁷Sane dom, suga nyim tuya yé gato kem mo kota Sodom si kota Gomora si kota bok yo gato karo mone, án ben án bi suk-i ne ibit sato malaikat gane ben bi suk-i ne ibit dom. Ye Sodom si ye Gomora ne da bro wa ben siri su nggon e, yebris da bro wa ben siri su yu e, nggon da bro wa ben siri su yu e ne. Sane anato Yefun Allah syo bot git án sino or wé mone. Án sino ku sukye ne subere men sino me mone, ete men nyuwa bot gesyos git men tepsu bot git ye Sodom si ye Gomora mo sukibit gato án ben ne.

⁸Sane dom, yeguru gato misyar Yefun gato ji krombot re, yé ne bi sukjimnut-i kas muya-muma, án ben siri daret, án dakai ben án kaim ibit su ne, án bariwa jammo Yefun Allah bi sukdu-i, ete án kiket suk mwa neya gato gesyos mo gu gato gum kok ne.

⁹Án ben sane, sarewo malaikat bi yekwesu dik yo gato gum do Mikhael yo kiket malaikat saga yeguru bok ne kiket nde. Suga nyim ne Mikhael si biris bi yekwesu duwer yu mo Musa mukri. Biris bi yekwesu ki do, “Ji wa nai et,” wo Mikhael ki do, “Nde ré, ji wa nai et.” Sugane Mikhael yo nai sukjimnut wa kiket biris bi yekwesu nde, wo Mikhael ki sare do, “Bere Yefun sor ete ki nan gum ibit mo sukibit gato nan ben re.”

¹⁰Wo yé gato misyar Yefun re, án jam nde Yefun bi suk-i, sane án kabor nje daret subot Yefun bi suk-i mwa neya. Án ben bi suk-i tepsu suge krok, án yo nutbot suk gato án ben ne nde, wo án ben sukdaret tepsu sukjimnut gato kem mo án, orete ri ma án dakai ben án dakai ibit mo suk gato án ben ne.

¹¹Bere Yefun Allah syo sukye nai án sor. Án gu nje kwop daret tepsu Kain ben ne. {Kain anato gu an bi nje, Abel ne, kwop.} Yeguru gane gro sye wa ku sugum anato án syi suk mo Yefun bi rus-i sato Bileam ben ne. {Bileam re syi sukfo mo ye Israel wa ku sugum.} Yeguru gane duwer suk nggi tepsu Korah ben ne. {Korah si bi det-i anato duwer Musa si Harun mo pe gato yé ne.} Sane bere Yefun Allah gu án kwop wé tepsu Yefun gu Korah kwop wé mo gato án duwer nje subot Yefun bi os-i ne nggi.

¹²Yé gato ben bi suk-i sato yé bok ne, án si nin sum wa git sugit sino sa, án ben nin sino gum ibit mo sukdaret gato án ben ket án í mone sor, tepsu án jam nde án nggwa ré, án yo damen dom nde. Án nutbot án dakai sor ré, án yo nutbot ye yi nde ré, tepsu ye gato mewa suksi, wo án dakai nai sugit wa án dakai sor, án yo syo sugit nai suksi ne nde, wokgan yo dom nde. Án tepsu nyotem gato nofuf sam ma, ndendu, men nut do bere nogi, sarewo nogi yo mo nde. Men nut do, bere án ós men tepsu nogi os men, sarewo suk yo mo nde. Án tepsu kwe gato bi aina tep wa bo, sarewo kwe ne yo bo mo nde. Men nut do, bere án syo suk gato ndo nai men, wo suk yo mo nde. Án tepsu kwe gato yé tik i-brot buk kadit bur ré, sane bere kwe ne te ré, yo kom o nde it. Án tepsu suk gato men nut do ndo wa ós men, ondewo suk yo mo nde. Yé gato ben sukibit re, án iwa kibot suk gato ibit bu, án duwer yé yi daret, án ki suk gato ndo mo nde

¹³Án tepsu sem nap sye wai gato sam sukkwik si i-bre mu bare mo nden. Sukkwik ne tepsu sukibit gato án ben ne, án nutbot sisu ndo yo, bere án damen mone, wo án yo nutbot sukibit gato án ben ne nde. Án tepsu bí gato waiyu muya-muma mo gu nim ne, sarewo án mu siri kadit pe gato Yefun Allah fro wa án muket ne. Sane anato bere Yefun Allah fro nat gato ndendu yut wa án kem mó to kapyo mato kapyo.

¹⁴Henokh kibot yé bok gane kadit nyim tuya wé ré. Henokh anato Adam bi dat. Adam ku bi pa-i, or o bi pa-i ne ku bi pa-i sor kom mo wam mumat anato pe Henokh ré. Henokh ki do, “Bere men bi Yekwesu si malaikat mwa ndo nde gato ben Yefun bi suk-i ne ma. Malaikat ne, men yo ne ndo nde, mwa teker ware. Yefun si malaikat mwa ne ma.

¹⁵wa ndobot yetu mwa ne sino yo, bere Yefun ndobot yé gato bariket Yefun mo sukibit gato án ben ne. Bere Yefun ndobot án mo sukdu mwa gato án kiket Yefun ne, eteyo bere Yefun bare án mo bot gesyos or ré.”

¹⁶Yé gato ben sukibit re, án iwa kibot suk gato ibit bu, án duwer yé yi daret, án ki suk gato ndo mo nde, án ki et su, án ki kom mo sukibit gato yé yi ben ne petok sor. Án ben sukibit ket án í sor. Án ki án bi sukdu-i, án dakai bes án nggwa kok. Án ki án bi sukdu-i, án bes ye yi gum kok subere meret os wa án ku suk kadit ye ne sor.

¹⁷Sarewo ji bi nji ji bi nyanggon gato ji jimnotku, men bi Yekwesu Yesus Kristus bi yerasul bi sukdu-i gato yerasul bok ne ki suga nyim ne yo, nin jammo, nin napawa pe et.

¹⁸Yerasul bok ne ki nai men do, “Karowa kam gato Yesus Kristus satu ma mo bur re it yo, yé mwa gato ki nin gum ibit e, sa nin mo Yefun bi sukdu-i e ne, bere mó ré. Yé gane ben si suk-i ibit ket án í sor.”

¹⁹Yé mwa gane bere meret os wa ben men dakai maskwa ket yu. Yé mwa ne, Yefun Allah Gen yo kem mo án mit nde, wo sukjimnut gato ibit anato jom án sor. … men bi Yekwesu Yesus Kristus bi yerasul bi sukdu-i gato yerasul bok ne ki suga nyim ne yo, nin jammo, nin napawa pe et

²⁰Sarewo sukdu subot Yesus Kristus anato ma kadit Yefun Allah dakai. Sukdu ne yo ma kadit yetu bi sukjimnut-i nde. Sane ji bi nji ji bi nyanggon, nin ós yu, nin duno yu su sukduno gato ndo wai subot Yesus Kristus ne petok sor, subere nin onyar kem mo Yesus Kristus nggi wai o et. Nin ku suk su Yefun su suktinggi gato Yefun Allah Gen syo nai nin ne et.

²¹Nin eswa men bi Yekwesu Yesus Kristus ma ben bi suk-i ne ndo bor su in sor. Bere An yo ben suk su nin tepsu sukibit gato nin ben ne nde, wo bere An gwat nin mu mo pe gato ndo wa nin si An kem ndo mone to kapyo mato kapyo. Nin eswa suk ne bor yo, nin ben nin bi suk-i, nin napawa pe do, Yefun Allah bi sukjimnut sye kas subot nin sor.

²²Ye gato bi sukjimnut we subot Yefun ne tó yo, nin dakai jimnotku ye ne.

²³Nin ós ye gato ku sukye subere án ges mo bot gesyos nde, ete án kem ndo to kapyo mato kapyo. Yé deyo o, nin dakai jimnotku án, nin ben suk su án tepsu sukibit gato án ben ne nde, wo nin ben suk gato ndo su yé ne sor. Nin mewa nin nggwa, sawe nin waii ges mo án bi os-i gato ibit ne. Nin bariket sukibit gato án ben ne, tepsu nin bariket án bi san dum gato án it ne. Nin nut mo sukibit mwa gato án ben ne tepsu án bi san gato dum teker ne, sane nin nai nde, nin syimtok dom nde.

²⁴Yesus Kristus ete nggiwa mewa nin kadit nin ges mo os ibit. An ete nggiwa gwat nin ma kem mo Yefun Allah gato gum kok ne gwem. Mo An bi nat-i gato ndo wai ne sukibit yo ut mo nin o nde, bere nin mit at wa sor.

²⁵Yefun wadigan anato gum kok sisu sangge sor. An anato fro os ndo wa men subere men kem ndo to kapyo mato kapyo. An syogat men bi Yekwesu Yesus Kristus ma kak os ne subere men si An kem ndo. An anato gum kok wai o ré. An anato gum sye wai o ré. An sa, bi suktinggi gato sye wai. An sor anato gum kok wai kadit yekwesu mwa ne sino kadit ketke sor, su re, to kapyo mato kapyo. Sangge.