Read Abun Suk Gato Yohanes Me Ne 12 Bible Online

Suk Gato Yohanes Me Ne 12 - Abun bible

Suk Gato Yohanes Me Ne 12

¹Orete suk yo gato ben yé yeket ndo nde bor mo gu. Suk ne ben sato tepsu sukamno. Nggon ge dik yo pis kam su tepsu nggon pis san pis. Nggon ne ak gwes tak we mo aina. Nggon ne bom yekwesu bi topi mo mom su. Topi ne bi bí musyu dik sop we mone.

²Nggon ne syim far, mom nukwe i su pa, mom saiye su.

³Or o suk dik yo o tepsu sukamno bor mo gu. Suge sye gato ka sato nggor bin gato ye kendo do naga bor mone. Naga ne ge er ete kaim sye yé. Naga ne su mufit mó. Naga suti musyu dik dom mó. Naga bom yekwesu bi topi wokgan mo naga su mufit ne, topi dik mo su dik.

⁴Naga nyo gwa bí napyo ges or kadit gu. Naga gwa bí ne sor bí ges gwa mo bur ré. Naga ti mo nggon gato nukwe i su pa ne gwem es ndek wa nggon kem su pa. Naga eswa subere nggon do kem su pa-i, naga kuk-i.

⁵Orete nggon kem su pa yebris. Naga yo kuk pa ne nde, wo malaikat ge dik yo ma nai pa kekro wé kadit naga, ete gwat mu mo Yefun Allah mo An bi kursi sye ne. Pa ne bere jom yetu wis mwa ne sino mo bur re. Pa ne ben sukye nai nje su nggarmom pu wade yetu mo bur re iwedewe ne sino jammo An sor.

⁶Sane nggon ne titi mu mo pe gato kwe yo kom mo nde. Nggon titi kom mo nat gato Yefun Allah fro wa mom kem mone. Bere yé mewa mom mo nat ne sor kom mo kam 1.260 rek.

⁷Orete suk mwa neya mo gu ne gu yu, suk mwa ne ben sukndi su yu mone. Malaikat bi yekwesu ge dik yo gato gum do Mikhael si bi malaikat-i ben sukndi su naga ne. Naga si bi malaikat-i waii futma wa gu Mikhael si bi malaikat-i.

⁸Sarewo naga yo nggi nde. Sane naga si bi malaikat-i yo ku os wa kem mo gu o nde.

⁹Mikhael si bi malaikat-i am naga sye ne wé kadit gu ré. Naga gane anato tepsu kwis kadit nyim tuya gato gum do biris bi yekwesu. Yé kendo biris bi yekwesu ne gum do Iblis dom. Naga gane ben kidar yetu mwa mo bur re ges mo os ibit. Orete Mikhael si bi malaikat-i am naga sye ne si bi malaikat-i sino mu is kadit gu ma mo bur re ré.

¹⁰Orete ji jam ye yo saiye mo gu, an ki do, “Re ne Yefun Allah nai An bi rus-i wé kadit sukye subere men kem ndo it. Re ne Yefun Allah gato jom men ne bi suktinggi bor it. Sane anato bere An jom men mo nat gato An fro ne it. Re ne Kristus gato Yefun bes wa kak os ndo wa yetu kem ndo bi suktinggi bor anato Kristus jom men yetu mo bur re ré. Men si Yefun kem ndo mo bi nat-i it, we su re biris bi yekwesu gato ndak men bi nji mo Yefun bi rus-i ne gum mo Yefun Allah gwem noru nombrak ne, biris bi yekwesu yo ti mone o nde, we yé am biris bi yekwesu wé kadit nat ne or ré.

¹¹Domba Gan dé sye wa men yetu anato men bi nji mo Yefun bi rus-i ne nggi wai kadit biris bi yekwesu o ré. Án ki subot Yefun Allah bi sukdu-i anato án nggi wai kadit biris bi yekwesu o ré. Án yo nutbot án dakai nde, án bi án nggwa mo Yefun wa ben Yefun bi suk-i. Kapre án kwop o, án mbau o, án kibot suk gato Yefun ben ne sor.

¹²Sane, nin yé mwa gato kem mo gu ne sino, nin mit at wa et. Sarewo nin yé gato kem mo bur re si sem mit ne, bere nin ku sukye ndo nde, we biris bi yekwesu is mu kom mo nin bi nat-i ré. Biris bi yekwesu maskwa ndo nde, we an jam do, yo nam nde, bere an yo ku os wa ben kidar yetu ges mo os ibit o nde.”

¹³Naga gane me do, Mikhael si bi malaikat-i am an is mu kom mo bur re sa, an syunbot nggon gato kem su pa yebris ne.

¹⁴Nggon ne ku ndam syap tu ge sye i we, subere nggon ne ok mu mo bi nat-i mo pe gato kwe yo kom mo nde. Mone, yé mewa nggon ne kadit naga ne sor kom mo tahun gri nap.

¹⁵Orete naga sukut tepsu syur sye kadit an syokwet subere syur ne sye mu pet mo nggon ne, ete gwat nggon mu daret

¹⁶ware, bur ós nggon. Bur ben sato kak tepsu yé kak syokwet subere bur kuk syur sye gato sye kadit naga syokwet ne sa wé kadit nggon ré.

¹⁷Sane naga maskwa ket nggon ne ndo nde. Sane naga mu me nggon bi pa yi neya wa ben sukndi su. Nggon bi pá-i anato ye gato jammo Yefun Allah bi sukdu-i, ete jom Yefun Yesus bi sukdu-i ne pe.

¹⁸Orete naga ne mu ti mo sem de.