Read Abun Suk Gato Yohanes Me Ne 13 Bible Online

Suk Gato Yohanes Me Ne 13 - Abun bible

Suk Gato Yohanes Me Ne 13

¹Orete ji sokme suge krok ge dik yo gato sye. Suge ne syesyar kadit sem ma nden. Suge ne su mufit mó. Suge ne suti musyu dik mó. Mo an suti musyu dik ne sino yekwesu bi topi mó. Mo an su mufit ne sino ye krom gumyo-gumyo gato bi sukjimnut wa kabor Yefun Allah gum.

²Suge gato ji sokme ne ka sato mau sye gato krok. Suge ne gwes tak-i sye yé tepsu beruang gwes tak-i. An syokwet-i sye yé tepsu singa syokwet-i. Ete naga ne syo an dakai bi suktinggi nai suge krok ne. Yekwesu bi kursi gato naga kem mone, naga syo nai suge ne, ete naga bes suge ne gum yekwesu gato gum kok wai mone o ré.

³Suge ne su dik yo ben sato wip sye gato rok mó. Yé nut do, wip sye ne bere ben suge ne kwop, sarewo suge ne yo kwop nde, wo wip ne ge or ré. Sane yetu mwa mo bur re yeket ndo nde, ete yé jammo suge ne ré.

⁴Naga bes suge ne gum yekwesu. Sane yetu mwa ne sino som naga ne. Yé som suge ne dom, ete ye ki do, “Suge u anato nggi tepsu suge krok re ne? Je u anato nggiwa futma ete gu suge re ne?” Suk yo mo nde, wo suge ne nggi wai kadit suk mwa ne o ré.

⁵Suge krok ne ku suktinggi wa an ki suk, an bes an nggwa kok su sukdu ne, ete an kabor Yefun Allah gum. Suge krok ne ku suktinggi wa ben suk tepsu yekwesu. Yetu mwa ne jammo an sor kom mo aina musyu at sop we.

⁶An ki bi sukdu-i, an kabor Yefun Allah, an kiket Yefun Allah gum ibit, an ki Yefun Allah bi nat-i ibit, an kabor yé mwa ne sino gato kem mo gu nim ne or ré.

⁷An ku suktinggi wa futma gu yé gato onyar kem mo Yefun Yesus mo bur re kwop wé. An nggi wai kadit yé mwa ne ré. Yetu mwa ne sino mo buryo-buryo e, wisyo-wisyo e, yeyo-yeyo e, ayo-ayo e ne, yetu mwa ne sino jammo an sor.

⁸Yetu mwa ne sino gato kem mo bur re bere bes suge ne gum kok, wo yetu bok gato Yefun Allah krom gum mo Domba Gan gato ye gu kwop wé ne bi Buku Yegesyos suga nyim tuya Yefun ut bur re nde tó, bere yé bok ne yo bes suge krok ne gum kok nde.

⁹Men brek men dabe muya-muma kadit nde, wo men jam suk gato Yefun Allah Gen ki nai men ne et, sare:

¹⁰“Yé gato Yefun Allah fro wa ye but yo, bere ye but yé ne ré. Yé gato Yefun Allah fro wa ye gu su nyom kwop wé yo, bere ye gu yé ne su nyom kwop wé ré. Sane men yé gato onyar kem mo Yefun Yesus mo bur re, men ku sukye it yo, men misyar Yefun nde, wo men simo An pe sor, men werwa men jom Yefun Allah bi sukdu-i sane sor kom mo pe gato or mó et!”

¹¹Orete ji sokme suge krok ge dik yo o it kadit bur re. Suge kedowe re suti we mó, tepsu domba suti-i. Suge re ki bi sukdu-i tepsu naga ki bi sukdu-i ré.

¹²Suge kedowe re gum kok tepsu yekwesu. Suge kedowe re win suge doketke ne. Yetu mwa neya bes suge kedowe gum kok mo suk mwa ne sino. Suge kedowe syaugat yetu mwa mo bur re bes suge doketke ne gum kok. Suge kedowe ne su dik yo wip sye gato ye nut do bergan suge ne kwop mone, sarewo wip ne ge kadit or ré.

¹³Suge kedowe ben suk gato ben yetu yeket an. An ben suk mwa subere yetu me an bi suktinggi ne bor ré. An ben bot is kadit gu ma kom mo bur re, yetu mwa dakai me su gro ré.

¹⁴Suge kedowe re ben suk win suge doketke ne. Suge kedowe ben yetu yeket an. Yetu mwa ne me suge ne bi suktinggi bor mone anato an ku os wa ben kidar yetu mwa ne sino mo bur re. Suge kedowe re syaugat yetu mwa ne ut suk yo ka sato suge doketke ne gato ye sap su nyom, sarewo suge ne yo kwop nde. Suge kedowe syaugat ye ut suk yo ka sato suge doketke subere ye bes suge doketke gum kok mone. {An ben kidar yetu sane subere ye yo jammo Yefun o nde.}

¹⁵Suge kedowe ku suktinggi wa an fuf mas mo suk gato ye ut ka sato suge doketke ne, subere suk ne nggiwa ki suk ete gu yetu mwa ne sino gato bariwa som suk ne kwop wé.

¹⁶Suge kedowe syaugat yetu mwa ne sino, ye gato gum sye e, ye gato gum wok e, yemambot e, yebaut e, pakwerut e, ye gato dakai ti mo an dakai e, yetu mwa ne sino mo bur re subere ye syat ja mo ye syim rut tak de syim ge, ondeyo mo ye git det.

¹⁷Yé gato ye syat ja wa nde yo, bere yé ne yo ku os wa so suk o nde. Yé gato ye syat ja wa sor ete ku os wa bijual ete so suk sor ré. Ja ne anato tepsu suge kedowe ne gum, ondeyo, ja ne anato tepsu suge doketke ne gum bi nomor.

¹⁸Ye gato bi sukjimnut ko bere jam suge doketke ne gum bi nomor. Suge doketke ne gum bi nomor tepsu yetu ge dik yo gum. Sane ye gato jam suk mwa it yo, an nutbot suge doketke ne gum bi nomor bi sukjimnut et. Huruf mwa ne sino mo suge doketke ne gum ye krom bi nomor mó, orete yo, ye sum nomor bok ne sino tepsu dik, ye newa sino kom mo 666.