Read Abun Suk Gato Yohanes Me Ne 14 Bible Online

Suk Gato Yohanes Me Ne 14 - Abun bible

Suk Gato Yohanes Me Ne 14

¹Orete ji sokme Domba Gan ti mo banbo Sion. Yetu ge 144.000 si Domba Gan ti mone sino. Ye krom Domba Gan si bi Ai gum mo yé mwa ne git det ré.

²Orete ji jam ye yo ki sukdu kadit gu ne ma. Ye ne ki bi sukdu sa, an ba sye tepsu syur gato sye ú mo tú, an ba syo-i sye tepsu nogu pu sye. An ki bi sukdu-i sa, an ba syo-i ndo tepsu ye kamo kecapi.

³Yetu ge 144.000 ti mo yekwesu bi kursi ne gwem. Suge at si yenggras ge musyu we sop at ne sino ti mo kursi gwem ne dom. Yetu ge 144.000 ti mone ba sukbadek dobe. Yetu mwa ne sor ete jam ba sukbadek ne, ye yi yo nggiwa jam sukbadek ne nde. Yetu mwa ne anato yetu mo bur re gato Yesus Kristus tot suktot mo sukibit gato án ben ne wé ré ne.

⁴Yé mwa ne yo sem su nggon yo mo nde. Án mewa án nggwa kadit nggon ré. Mo pe mwa ne sino gato Domba Gan mu mone, án si Domba Gan mu sino sor. Yesus Kristus bi nggwa wa tot suktot mo sukibit gato án ben ne wé. Yé mwa ne anato yé gato sok mo Yefun Allah si Domba Gan bi rus-i nyim kadit ye yi. Ben sato án tepsu sugit napyo gato kri nyim, gato yé syo nai Yefun.

⁵Án yo kidar suk wam dik yo dom nde. Sukibit yo ut mo án wokgan yo dom nde.

⁶Orete ji sokme malaikat ge dik yo o ok mo gu nim ne. Malaikat ne gwat suktaru subot os ndo gato Yesus Kristus kak wa men yetu gato kem mo bur re. Suktaru ne kak os ndo wa men subere men ku os wa men kem ndo to kapyo mato kapyo sor. Malaikat gwat suktaru ne wa an ki nai yetu mwa ne sino, yetu mwa mo buryo-buryo e, wisyo-wisyo e, yeyo-yeyo e, ayo-ayo e ne sino.

⁷Malaikat ne saiye do, “Re yo, kam tepsu Yefun Allah ndobot men yetu mwa ne sino mo bur re it, sane nin kwabom dek subot Yefun Allah et! Nin bes An gum kok sye wai et! Nin jammo An gato ut gu nim ne e, bur re e, sem e, syur e ne sino et!”

⁸Malaikat kedowe boribot malaikat doketke. Malaikat kedowe ké do, “Kota Babel gato yé bes gum kok ne ibit or ré, ye yo kem mo nat ne o nde. Yé mo kota ne gwat os ibit wa yetu mwa mo buryo-buryo ne sino. Yé mo kota ne gwat os ibit wade yetu mwa misyar Yefun tepsu yekra misyar bi nggon ne ete mu ben siri su nggon yi yo o ré. Yé mo kota ne gwat os ibit. Ben sato ye syo nau nai yé mwa da wade yé mwa neya yenau su. Sane Yefun Allah ben kota ne ibit or ré.”

⁹Malaikat kedogri waii boribot malaikat ge we ne, ete saiye do, “Yé gato som suge doketke si suk gato ka sa suge ne, ete ye syat ja mo án git de, ondeyo ye syat ja mo án syim rut de nden ne yo,

¹⁰bere án ku sukye ndo nde. Bere Yefun Allah maskwa ket án ndo nde, ete syo sukye nai án, tepsu Yefun Allah sye nau gato nggi mo bi mok, ete syo nai án da. Bere án ku sukye ndo nde mo nau ne. Bere bot ru sye basmi kwik su belerang ne kam is án ndo nde, ete án dipa su. Bere án dipa ndo nde mo Yefun Allah dakai bi malaikat si Domba Gan gwem.

¹¹Bot bu it kadit bot gato kam is án. Bot bu ben án dipa ne. Bot bu ne it sane sor to kapyo mato kapyo. Án, yé gato som suge doketke si suk gato ye ut ka sa suge ne ku sukye sor noru nombrak. Sane dom, yé bok gato suge ne syat bi ja wa, bere ku sukye sor noru nombrak.”

¹²Sane men yé gato onyar kem mo Yesus Kristus, gato jammo Yefun Allah bi sukdu-i, men do ku sukye it yo, men misyar Yefun Yesus nde, wo men simo An pe sor.

¹³Orete ji jam sukdu kadit gu ne sare do, “Nan krom sare do: Kadit kam re yo, yé gato ben Yesus Kristus bi suk-i, ete kwop mone, yé ne sa, mit at wa, we bere Yefun ben sukndo su án.” Yefun Allah Gen ki do, “Sangge, yé ne ku suk mwa gato ndo mo suk gato án ben ne. Sane yé ne yo mitwa ben suk mwa o nde, wo án kem not kadit ré.”

¹⁴Orete ji sokme nyotem kwo dik yo. Ji sokme suk yo ka sa yetu kem mo nyotem ne yu. Ye ne bom yekwesu bi topi emas mo an su. An jom nyom ot syu gato ot.

¹⁵Orete malaikat ge dik yo syesyar kadit Yefun Allah bi nu mo gu. Malaikat ne saiye nai ye gato kem mo nyotem ne do, “Nan nai nan bi nyom, nan tot sugit su, we su re yetu mo bur fro wa nan mu nai án, tepsu sugit gato kri mo nggwe fro wa ye mu tot ete nai ma ne.”

¹⁶Sane ye gato kem mo nyotem ne tot sugit su an bi nyom mo bur re. Malaikat ne nai yetu ma tepsu ye tot sugit gato kri mo nggwe, ete nai ma.

¹⁷Malaikat ge dik yo o syesyar kadit Yefun Allah bi nu mo gu. Malaikat re jom nyom gato ot dom.

¹⁸Or o malaikat ge dik yo o ma kadit meja gato ye grem suksom mone wa ye som Yefun Allah su mo gu ne. Malaikat ne mewa bot mo meja ne. Malaikat ne ma an saiye nai malaikat gato jom nyom gato ot ne do, “Nan gwat nan bi nyom gato ot ne mu, nan tot anggur bo mo kwe anggur mwa mo bur re, nan nai bo ne nan gwat ma, we anggur bo ne um it.”

¹⁹Malaikat ne mu tot anggur bo mwa ne mo bur re, sum i-bo, ete gwat ma bare mo jokwak sye gato Yefun Allah fro wa ne. Mo jokwak ne yé jomuk anggur bo wade i-rom ne syesyar. Yé jomuk anggur bo tepsu Yefun Allah syo sukye nai yé gato bariket Yefun, Yefun bi sukmaskwa bor mone.

²⁰Yé jomuk anggur bo mo jokwak mo kota de nden, tepsu ye gu nje ete yetu dé sye kadit jokwak ne. Yetu dé sye sane sor, yetu dé sye kom mo kilometer wotin gri ete yetu dé sye kru karowa meter we.