Read Abun Suk Gato Yohanes Me Ne 15 Bible Online

Suk Gato Yohanes Me Ne 15 - Abun bible

Suk Gato Yohanes Me Ne 15

¹Orete ji sokme suk yo mo gu gato ben ji yeket, ji nutbot ndo nde. Ji sokme malaikat ge mufit gato gwat sukye mufit wa nje ma mo bur re. Sukye mufit ne anato sukye gato wari, we sukye mufit ne bor yo, Yefun Allah bi sukmaskwa or mone it.

²Orete ji sokme suk gato ka sa kaca mwa tepsu sem si bot fros yu. Ji sokme yetu mwa gato Yesus Kristus nai kadit bur re tepsu An bi rus-i ne ti mo sem de. Yé mwa ne nggi wai kadit suge doketke ne ré. Suge doketke si suk gato ye ut ka sa suge ne yo nggiwa jom yé mwa ne nde, wo yé mwa ne nggi wai kadit suge doketke gato ku gum tepsu nomor ne. Yé mwa gane jom kecapi gato Yefun Allah syo nai án ne.

³Án kamo kecapi ete án ba sukbadek dik yo. Yé mwa ne sino badekbot Musa gato Yefun Allah bi pakwerut ne, si Domba Gan bi sukbadek-i sare do, “Yefun ga nggi wai ne e, Yefun ga sye wai ne e, Nan gum kok wai ‘dit men ne o, Nan yesu ga nggi wai ne o. Yefun ga nggi wai ne e, Yefun ga sye wai ne e, Nan ben suk ga ndo yé, Nan man suk ga ndo wai. Yefun ga yesu wa men yetu ne e, Yefun ga yesu mo bur re e, Nan ben Nan bi suk-i ri-roi ne o, Nan ben Nan bi suk-i sangge ne o.

⁴Yé mwa ne sino nyuwa Nan we, Yé mwa ne bes Nan gum kok we, Nan sor ete tara kadit men yetu ne o Nan sor ete gum kok wai ne o. Yetu mo buryo-buryo sino som Nan we, Yetu ma bes Nan gum kok we, Sukndo ga Nan ben ne bor sino o, Yé mwa ne me sino o.”

⁵Yé mwa ne ba sukbadek ne. Orete ji sokme Yefun Allah bi nu mo gu ne kak, ete ji sokme Yefun bi gumwak fo mo mit ne dom.

⁶Malaikat ge mufit gato gwat sukye mufit syesyar kadit Yefun Allah bi nu mo gu. Malaikat gane it san kwo gato nggren, án far san emas mo án tunap.

⁷Orete suge at mone ge dik yo syo mbem mufit ses su Yefun Allah gato gesyos ne bi sukmaskwa nai malaikat ge mufit ne gwat mu.

⁸Sugane Yefun Allah bi gumwak fo mo bi nu mo gu ses su suk gato ka sa bot bu gato it kadit Yefun Allah kaim gato rer-rik su bi suktinggi gato ru sye ne. Ye yo ku os wa sok mo gumwak mit ne nde, sane sor, malaikat ge mufit gwat sukye mufit mu farket yetu mo bur or wé et. Malaikat ne gwat sukye mufit ne or wé, ete yé ku os wa sok mo gumwak fo ne.