Read Abun Suk Gato Yohanes Me Ne 16 Bible Online

Suk Gato Yohanes Me Ne 16 - Abun bible

Suk Gato Yohanes Me Ne 16

¹Orete ji jam ye mo Yefun Allah bi nu mo gu saiye nai malaikat ge mufit sare do, “Nin gwat mbem mufit gato ses su Yefun Allah bi sukmaskwa ne mu, nin sye mo nje mo bur ne et.”

²Malaikat doketke gwat Yefun Allah bi sukmaskwa mo mbem ne mu ete sye mo nje mo bur re. Sane kos sye si wip mok sye git yé mwa gato ye syat suge doketke bi ja mó. Kos sye si wip mok sye git yé mwa gato som suk gato ye ut ka sa suge ne.

³Malaikat kedowe gwat Yefun Allah bi sukmaskwa mo mbem ne mu ete sye mo sem. Sane sem rom er tepsu ye gato kwop ne dé. Boge si suk mwa gato mbau mo sem ne kwop or ré.

⁴Malaikat kedogri gwat Yefun Allah bi sukmaskwa mo mbem ne mu ete sye mo syur si syur nggrup. Sane syur rom er tepsu yetu dé.

⁵Orete ji jam malaikat gato mewa syur mwa ne sino ki nai Yefun Allah do, “Kadit ketke Nan sor anato Yefun gato gum kok tara wai kadit men yetu. Nan anato gum kok sane sor to kapyo mato kapyo. Nan ben Nan bi suk-i ri-roi anato Nan syo sukye bok yo mu mo bur re ré.

⁶Yetu gu yé gato onyar kem mo Yefun Yesus si Nan bi yenabi ne kwop ete dé sye, sane anato Nan syo yetu dé wa án da win sukibit gato án ben ne.”

⁷Orete ji jam ye gato ti karowa meja gato ye grem suksom mone wa ye som Yefun Allah su mo gu ne ki do, “Nan, Yefun Allah gato nggi wai o ré. Nan sa, jom suk mwa ne sino tepsu Yekwesu. Nan sa, syo sukye bok yo nai yetu mo bur. Nan ben Nan bi suk-i ne ri-roi, Nan ben suk su nje tepsu suk gato yé ben ne.”

⁸Malaikat kedoat gwat Yefun Allah bi sukmaskwa mo mbem ne mu ete sye mo kam su. Sane kam su ne ku suktinggi wa ru nggi sye o, ete kam yor gat nje mo bur tepsu bot wade yé da yó yé ré.

⁹Kam yor gat nggi wade git yetu da napyo nggom ré. Yetu jam do, Yefun Allah anato nggiwa was sukye gato yé ku ne wé. Sane yé dufo mo Yefun gum tepsu sukye ne. Yetu da ku sukye mo sukibit gato án ben ne, sarewo yetu bariwa kwet kadit sukibit ne. Án bariwa bes Yefun Allah gum kok dom ré.

¹⁰Malaikat kedomumek gwat Yefun Allah bi sukmaskwa mo mbem ne mu ete sye mo suge doketke gato gum yekwesu, gato kem mo yekwesu bi kursi ne. Sane mo nat gato suge doketke jom bi rus-i ne ri im kewa bi rus-i mone. Sane suge ne yo ku os wa jom an bi rus-i o nde. Mone yetu gato sok mo suge ne bi rus-i ne dipa ndo nde. Yetu ne ot án brip mo sukye gato án ku ne.

¹¹Án dufo mo Yefun Allah gato mo gu ne gum mo kos sye e, wip mok sye e, sukye bok gato án ku e ne, sarewo án bariwa án kwet kadit sukibit gato án ben ne ré.

¹²Malaikat kedomumat gwat Yefun Allah bi sukmaskwa mo mbem ne mu ete sye mo syur sye gato gum do Syur Efrat. Syur ne sá ré. Sane yeraja ge bok yo kadit nobu nim ku os wa án muket nat gato syur sá kadit ne ma mo ye Yahudi bi bur-i.

¹³Orete ji sokme malaikat ibit ge gri gato ka sa gre, dik yo syesyar kadit naga syokwet-i, dik yo o syesyar kadit suge doketke syokwet-i, dik yo o syesyar kadit suge kedowe gato tepsu yenabi gato kidar nje ne syokwet-i.

¹⁴Malaikat ibit ge gri ne kadum bi suktinggi bor mo suk gato án ge gri ben anato yetu yeket. Malaikat ge gri ne mubot yesu mwa mo bur re iwedewe subere án ge gri ne sum yesu mwa ne sino wa gu yu tepsu kam sye gato Yefun Allah fro ne. Su kam sye ne, Yefun Allah gato nggi wai ne bere ndobot yetu mwa ne sino ré.

¹⁵Yesus Kristus ki sukdu subot kam sye ne do, “Nin jammo suk gato Ji ki re et. Bere Ji ma tepsu yegitsi. Jam gato Ji ma su ne, nin jam nde ré, bere nin gensu sor. Ye gato frawa nggwa pe sor, ete fro bi san ndek, subere án mu yo, án kawarun nde, án damen dom nde, yé ne sa, mit at wa, we bere Yefun ben sukndo su yé ne ré.”

¹⁶Sane malaikat ibit ge gri ne mubot bur re iwedewe. Malaikat ge gri ne sum yesu mwa mo bur re iwedewe ma mo nat gato ye ki su a Ibrani ne gum do, Harmagedon mo ye Yahudi bi bur-i.

¹⁷Malaikat kedomufit gwat Yefun Allah bi sukmaskwa mo mbem ne mu ete sye mo nyot. Sugane ji jam ye yo saiye mo yekwesu bi kursi mo Yefun Allah bi nu mo gu sare do, “Sukye bok ne or it!”

¹⁸Orete nowarek e, sukyo-sukyo pu e, nogu pu e, sui juwai bur ndo nde. Sui juwai bur re rom-ram ndo nde. Sui juwai bur gare nggi wai kadit do yi neya kadit kam gato Yefun Allah ut yetu ne sor kom more ré.

¹⁹Kota sye gato ye bes gum kok ne sui juwai det gri. Kota mo buryo-buryo, mwa ne sino ibit or ré. Yefun Allah yo mbrinket kota Babel gato sye ne nde. Yefun maskwa ket nje mone ndo nde. Sane An syo sukye tepsu An wergat nje mone da nau mo An bi mok — nau ne tepsu Yefun Allah bi sukmaskwa.

²⁰Sui juwai ef mwa ne sino, sui dun ef mwa ne mu or ré. Banbo mwa ne fres or ré.

²¹Sugane dom, nogi es gato krat sa jok gato sye, bo dik de kom mo kilogram musyu mek. Nogi es ne gwa nje mo bur re. Yé ku sukye ndo nde, sane yé dufo mo Yefun Allah tepsu sukye gato yé ku mo nogi es ne.