Read Abun Suk Gato Yohanes Me Ne 18 Bible Online

Suk Gato Yohanes Me Ne 18 - Abun bible

Suk Gato Yohanes Me Ne 18

¹Orete ji sokme malaikat ge dik yo o is kadit gu ne ma. Malaikat re bi suktinggi sye wai. Ben sato an nggren tepsu sukru, ete an rer ku bur re ré.

²Malaikat ne saiye sare do, “Ibit it! Kota Babel gato ye bes gum kok ne ibit it. Yetu yo kem mone o nde. Su re, kota ne tepsu nat fo gato malaikat ibit mwa kem mó sor. Kota ne ses su ndam gato ye Israel fowa git si ndam gato yé bariwa ne dom.

³Kota ne ibit, we yé mo kota ne kadum os siri nai yetu mo buryo-buryo, ete yé simo, tepsu ye syo nau nai nje, ete yé da wade yé yenau su. Kota ne bi suk-i tik yeraja mwa neya mo bur re mit ete án sino ges mo os ibit, tepsu nggon tik yebris mit, ete yebris ne mit nggri wa ben suk siri su nggon ne. Ye gato so suk mo bur re ku sugum mwa kadit sukibit mwa gato yé ben mo kota ne ré.”

⁴Orete ji jam ye yo ki sukdu ma kadit gu sare do, “Ji bi rus-i, nin mu kadit kota ne et. Nin syesyar wé kadit kota ne, subere nin waii ben suksiri sato án ben ne nde. Nin mu kadit, subere sukye gato yé ku mone, bere yo tok nin nde.

⁵Bere yé mone ku sukye, we suksiri gato yé ben ne mwa ndo nde. Yé tat suksiri ne bu sor kom mo gu ré. Yefun Allah napawa sukibit mwa gato án ben ne ré.

⁶Nin ben sukye su nje mo kota ne win sukye gato yé ne ben su nje et. Yé mo kota ne ben sukye nai nje wam dik it yo, nin waii ben sukye wam we satu nai án et, tepsu nin sye nau krat mo án bi mok ses wam we wa án da et, tepsu án fro wa ben sukye nai nin, nin ben sukye nai án wan we sor.

⁷Nin ben sukye nai án wade án dipa, ete án wo án nderku án dakai, nin ben sukye mwa nai án tepsu suk mwa gato án dakai nai wa án dakai, ete án bes án nggwa kok su ne. Yé mo kota ne dakai nut mo án dakai tepsu nggon pasye sare do, ‘Ji re sa, tepsu nggon pasye. Ji nggonna nde. Bere ji yo nderku nggwa wokgan yo dom nde.’

⁸Sane kam no dik sor, ete án ku sukye bok yo sato: yé kwop suki e, yé wo nderku nggwa e, yé ku sukonde sye e ne. Yefun Allah gato gum Yekwesu gato kok wai ne, bere An fro os wa syo sukye nai nje mo kota ne. Bere Yefun syo bot git kota ne si bi nje ne wé or ré.”

⁹Yeraja mo bur re dogato da bro wa kota ne bi suk-i tepsu ye gato da bro wa ben suk siri su nggon. Yeraja mwa gato sibot nje mo kota ne bi os-i, ete nai suk mwa ket án í, bere yeraja ne sokme bot gato git kota ne bu it mu mo gu, bere yeraja mwa ne wo ete nderku nje mo kota ne.

¹⁰Yeraja nyu mo sukye gato nje ku mo kota ne. Sane yeraja ti ko kadit kota ne ete ki do, “Kamapa! Yé mo kota Babel gato ye bes gum kok ku sukye ndo nde anare go! Kota gato gwat os nggi wa yetu mwa ne sino simo ne, su re ku sukye kom mo jam dik sane sor, ibit or ré.”

¹¹Bere yé mwa gato so suk mo bur re wo dom, án nderku nje mo kota ne, we nje mo kota ne yo so suk gato án gwat mu mone o nde.

¹²Yé mo kota ne yo so suk mo án o nde. Suk sato emas e, perak e, jok gato bi sugum sye e, mutiara e ne, yé yo so mo án o nde. Suk sato san kwo gato gum do lenan e, san te gato bi sugum sye e, san dek gato gum do san sutera e, san er e ne, yé yo so mo án o nde. Suk sato kwe gato grik ndo sato kwe nggon nak e, suk gato yé ben su kwe gato bi sugum sye e, suk gato ye ben su gading e, tembaga e, besi e, pualam e ne, yé yo so mo án o nde.

¹³Suk sato kwe gato da wik e, es wo e, es kru e, es gato grik ndo gato ye kon sugit su e, suk gato grik ndo sato setanggi e, mur e, kemenyan e ne, yé yo so mo án o nde. Suk sato nau e, manik e, tepung e, gandum e, sapi e, domba e, kuda si bi kereta e, pakwerut e, yetu e ne, yé yo so mo án o nde.

¹⁴Ye gato gwat suk mu wa so ne ki nai nje mo kota ne do, “Suk mwa gato ndo, gato nin mit iwa ne, nin yo ku o nde. Suk mwa gato nin mbrau nin nggwa ndo su mo bur re sisu nin bi suk mwa gato bi sugum sye ne, ges or kadit nin ré, bere nin yo ku o nde.”

¹⁵Yé gato gwat suk mu wa so mo nje mo kota ne, ete ku sugum mwa mone, bere ti ko kadit ré. Bere yé ne nyu mo sukye gato nje mo kota ku ne. Bere án wo, án nderku nggwa,

¹⁶ete án ki do, “Kamapa! Yé mo kota Babel gato ye bes gum kok ku sukye ndo nde go! Yé mone it san kwo ndo gato ye kendo gum do lenan. Án it san te si san er gato bi sugum sye. Yé mbrau án nggwa su emas e, jok gato bi sugum sye sisu mutiara.

¹⁷Sarewo kom mo jam dik sane sor, suk mwa ne ibit or ré.” Yesu mo kapal e, ye gato simo kapal e, ye gato gwat kapal ne si ye gato gwat bi suk su kapal mu wa so mo ye yi ne sino ti ko kadit kota ne.

¹⁸Án sino sokme bot gato git kota bu it mu mo gu ne, bere án saiye do, “Kota u anato gum kok sato kota re ne?”

¹⁹Bere án wo, án nderku nggwa, án nutbot ndo nde wade án krer bofuf mo án su, ete án saiye do, “Kamapa! Yé mo kota Babel gato ye bes gum kok ku sukye ndo nde go! Yé mwa gato bi kapal ma mo kota ne, ete ku suk mwa mo kota ne. Sarewo kom mo jam dik sane sor, kota ne ibit or ré.”

²⁰Nin yé mwa ne sino gato kem mo gu ne, nin mit at, we Yefun syo sukye nai kota Babel, kota ne ibit it. Nin yé gato onyar kem mo Yefun Yesus e, nin yerasul e, nin yenabi e ne, nin sino mit at, we Yefun Allah syo sukye nai nje mo kota ne tepsu sukibit gato yé mone ben ket nin ré.

²¹Orete malaikat ge dik yo gato nggi nai jok gato sye wai ete am mo sem mit. Ete malaikat ne ki do, “Kota Babel gato ye bes gum kok, bere Yefun Allah am nggi sato ji am jok sye re. Sane bere kota ne yé yo ku o nde.

²²Bere yé jam musik gato yé kamo mone o nde. Ye gato ba sukbadek e, kamo kecapi e, seruling e, trompet e ne, bere yé yo jam bi musik ba mo kota ne o nde. Ye gato ben kerja mo sukyo-sukyo, yé yo ku mo kota ne o nde. Bere ye yo jam suk nggra sagato yé krut gandum mone o nde.

²³Sukru yo ru rer ku kota ne o nde. Yé yo konwa ete kamowa ye gato kra yu mone o nde. Suga nyim ne sa, yé mo kota ne gato so suk nai ye yi neya ye bes gum yepasye ré. Sane dom, suga nyim ben sato yé mo kota ne kwa syua wa ben kidar nje mo buryo-buryo ges mo os ibit ne ré.”

²⁴Yé mo kota Babel gu yenabi. Yé gu yé gato onyar kem mo Yefun Yesus ne kwop e. Yé gu yetu ge bok yo sino mo bur re mone. Yé mwa ne dé sye mo kota ne, sane Yefun Allah waii ben sukye nai nje mo kota ne win suk gato án ben ne.