Read Abun Suk Gato Yohanes Me Ne 19 Bible Online

Suk Gato Yohanes Me Ne 19 - Abun bible

Suk Gato Yohanes Me Ne 19

¹Malaikat ne ki bi sukdu ne or sa, ji jam suk yo ba sye tepsu yetu mwa yé mo gu saiye sare do, “Men un Yefun Allah et. Yefun ne sa, nggi, Yefun Allah sa, gum kok wai o ré. An sa, nai men wé kadit sukye subere men kem ndo to kapyo mato kapyo.

²An ndobot nje mo bur re sa, An ndobot An bi suk-i ne ri-roi sor, An syo sukye nai yetu mo bur re tepsu sukibit gato yé ben ne. Yé mo kota gato ben suk sato nggon gato ben siri mwa ne, Yefun syo sukye nai ré. Ben sato yé mo kota ne tik yé mwa mo bur re mit anato yé mwa ne simo os ibit tepsu nggon gato ben siri mwa tik yé mit wa ben suksiri. Ben sato nggon ne gu Yefun Allah bi pakwerut kwop wé mone, sane Yefun Allah waii gu nggon ne wé win sukibit gato nggon ne ben ré.”

³Orete yetu mwa mo gu ne saiye wam dik yo o sare do, “Men un Yefun Allah et. Bot gato git kota ne bu it mu mo gu to kapyo mato kapyo.”

⁴Yenggras ge musyu we sop at sisu suge at bare nggwa ete som Yefun Allah gato kem mo yekwesu bi kursi sye ne. Án sino ki do, “Sangge, men un Yefun Allah et.”

⁵Orete yé jam ye yo ki sukdu mo yekwesu bi kursi ne sare do, “Men un Yefun Allah et. Men yé gato tepsu An bi pakwerut e, men yé gato gum wok e, gum sye e, yé mwa ne sino gato jammo An ne, men sino un Yefun Allah et.”

⁶Orete ji jam suk yo ba syo-i ne tepsu yetu mwa yé ba. Yé mwa ne ba syo-i ne tepsu syur sye ú mo tú. Yé mwa ne ba syo-i ne tepsu nogu pu gato nggi ne. Yé mwa ne saiye sare do, “Men un Yefun Allah et. Yefun Allah gato jom men ne anato nggi wai o ré, An jowa yé mwa ne sino.

⁷Men wi men ambre, men bes An gum kok et, we su kam re yo, Domba Gan bi kam-i wa An kra it anare. Nggon gato Domba Gan kra ne fro nggwa it.

⁸Nggon ne ku san gato kwo ndo wa nggon it ré.” (San kwo ndo ne bi sukjimnut do, sukndo gato yé gato onyar kem mo Yefun Yesus mo bur re ben tepsu Yefun mit ne.)

⁹Orete malaikat ne ki nai ji do, “Nan krom sukdu gato ji ki re et: Ye gato ye kendo ma simo Domba Gan bi sukra gato ye konwa ne, ye ne sa, mit at wa.” Orete malaikat ne ki o do, “Sukdu gato ji ki ne, Yefun Allah bi sukdu gato sangge anane.”

¹⁰Ji jam sukdu ne sa, ji bare ji nggwa mo malaikat gwem wa ji bes malaikat ne gum kok, sarewo malaikat ki nai ji do, “Nan bes ji gum kok nde. Ji si nan tepsu yu, men ka we Yefun Allah bi pakwerut sino. Men ka we si nan bi nji mo Yefun bi rus-i, gato jom Yefun Yesus bi sukdu-i ne pe, men sino tepsu Yefun Allah bi pakwerut. Sane nan bes ji gum kok nde, wo nan bes Yefun Allah gum kok sor ré.” We sare, ye gato jom Yefun Yesus bi sukdu-i ne bere Yefun syo suktinggi nai ye ne, subere ye ne nggiwa kibot Yefun Allah bi suktaru-i rer nai ye yi jam.

¹¹Orete ji sokme Yefun Allah bi nu mo gu kak sa, ji me kuda kwo ge dik yo ti mo ji gwem. Ye gato it mo kuda ne gum do, “Ri-roi si Sangge.” Ye ne syo sukye nai yetu sisu ri-roi tepsu sukibit gato yetu ben ne sor. Ye ne ndobot suk gato yetu ben ne sisu sangge, sane anato An futma gu nje kwop win sukibit gato yé ben ne.

¹²Ye ne gro gan tepsu bot ru. An bom yekwesu bi topi mwa mo An su. Ye krom gum dik yo mo An kaim. Ye yi ne jam nde ré, wo An dakai sa, jam gum ne ré.

¹³An it san gato ye ras mo yetu dé. An gum do, “Yefun Allah bi Sukdu.”

¹⁴Yefun Allah bi yesukmise mo gu boribot An. Yé mwa ne it mo kuda kwo, yé mwa ne it san gato kwo ndo.

¹⁵Nyom gato ot de we syesyar kadit An syokwet. Bere An ben sukye nai nje mo buryo-buryo su nyom ne. Bere An ben sukye nai nje su nggarmom pu wade yé mwa ne sino jammo An petok sor. An gwat os wa Yefun Allah gato nggi wai ne bi sukmaskwa bor mo bur re. An ben yetu mwa dé sye, tepsu ye yakos anggur bo, bere i-rom ne syesyar ré.

¹⁶Mo An bi san gato kewa An gwes muk ne, ye krom An gum sare do, “Yeraja re gum kok wai kadit yeraja mwa neya o ré. Yekwesu re gum kok wai o kadit yekwesu mwa neya o ré.”

¹⁷Orete ji sokme malaikat ge dik yo o gato ti mo kam su. Malaikat ne saiye kendo ndam mwa gato ok mo gu nim ne sare do, “Nin ma, nin sum wa nin git sugit mo Yefun Allah bi pesta sino et.

¹⁸Nin ma git yekri ku sato re, nin git yeraja ku e, yesukmise bi padosye ku e, yesukmise ku e, kuda ku e, ye gato it mo kuda ne ku e, yetu mwa ne sino ku e, ye gato gum pakwerut ku e, ye gato dakai ti mo an dakai ku e, ye gato gum sye ku e, ye gato gum wok ku e ne. Nin ma nin git yekri mwa ne sino ku et.”

¹⁹Orete ji sokme suge doketke si yeraja mo bur re si bi yesukmise-i sum wa futma ben sukndi su Ye gato it mo kuda kwo si bi yesukmise-i ne.

²⁰Yefun but suge doketke ne si suge kedowe gato ye kendo do yenabi gato ben kidar nje. Yenabi ne kadum bi suktinggi, an ben suk gato ben nje yeket mo suge doketke ne gwem. (Yenabi ne ben suk gato ben nje yeket, an ben kidar yé mwa gato suge doketke syogat ye syat ja wa ne. Yenabi ne ben kidar yé mwa gato som suk gato ye ut ka sa suge doketke ne.) Suge doketke ne sisu yenabi gato kidar nje ne, an we ne mbau tó, ete Yefun am an we mu ngga mo bot sye gato tepsu em, gato ru sye basmi kwik su belerang.

²¹An we bi yeko yé gu kwop su nyom gato syesyar kadit Ye gato it mo kuda kwo ne syokwet. Orete ndam mwa ne sino ma git yekri ne ku sor, ndam git woksugat, ndam git sane sor, ndam on ge su yekri ku ne.