Read Abun Suk Gato Yohanes Me Ne 2 Bible Online

Suk Gato Yohanes Me Ne 2 - Abun bible

Suk Gato Yohanes Me Ne 2

¹Yefun Allah bi Gan ki nai ji do, “Nan krom sukdu wa malaikat gato mewa yé gato onyar kem mo Yefun Yesus mo nu ari mo kota Efesus sare do: Ji gato jom bí mufit mo Ji syim ge, ete mubot suk gato ka sa dem sor gato ye dum sukru bo mufit mone, Ji bi sukdu-i sare do:

²Ji jam subot suk mwa gato nin ben ne. Ji jam do, nin ben nin bi suk-i, nin samok. Kapre nin ku sukye, nin misyar Ji nde, wo nin ben Ji bi suk-i pe sor. Ji jam do, nin yo kak nin mit wa ye gato ben sukibit bu ne nde. Ji jam do, nin watbot yé bok yo gato ki do, án sa, Yefun Allah bes án gum yerasul wa ben Yesus Kristus bi suk-i. Nin watbot yé bok gato ki sane, wade nin jam do, yé bok ne kidar.

³Ji jam do, nin simo Ji anato nin ku sukye mone, sarewo nin ben Ji bi suk-i petok sor, nin yo misyar Ji nde, wo nin simo Ji pe sor. Suk bok ne sa, nin ben sisu ndo.

⁴Sarewo suk dik yo gato Ji bariket nin mone anare: nin yo bi sukjimnut sye kasbot Ji saga ketke ne o nde.

⁵Sane nin napawa ketke nin bi sukjimnut sye kas subot Ji, wo su re nin bi sukjimnut sye yo kas subot Ji sane o nde. Re yo, nin brek satu ma et, nin kwet, ete nin bi sukjimnut sye kas subot Ji tepsu ketke ne satu o et. Nin yo kwet nde yo, bere Ji ma nai nin bi sukru ne wé kadit bi nat-i ré.

⁶Nin ben suk kwa dik ne ibit, sarewo nin ben kwa dik yo o gato ndo anare: Nin bariket suk mwa gato yé gato simo Nikolaus ben ne. Ji dom bariket suk gato yé bok ne ben ré.

⁷Sane nin brek nin dabe muya-muma kadit nde, wo nin jammo sukdu gato Yefun Allah Gen ki nai yé gato onyar kem mo Yefun Yesus mo nu ari ne et. Yé gato nggi wai kadit bur re bi suk-i yo, bere Ji kak os wa án mu nai kwebo gato ben yetu kem gesyos wa án git. Kwe ne kom mo Yefun Allah bi nat-i gato ndo.”

⁸Yefun Allah bi Gan ki nai ji do, “Nan krom sukdu wa malaikat gato mewa yé gato onyar kem mo Yefun Yesus mo nu ari mo kota Smirna sare do: Ji gato ut suk kadit ketke ete jom suk mwa ne kom mo pe gato or mó, Ji gato kwop, orete sun satu o bi sukdu-i anare:

⁹Ji jam do, nin ku sukye, nin yewa suk, sarewo Yefun syo suk mwa wa nin da gesyos ne mó ré. Ye Yahudi bok yo ki do, án sa, Yefun nai án gum sok mo Yefun bi rus-i. Án ma ki nin gum ibit ket kwayo-kwayo. Ji jam sukibit gato án kiket nin su ne o ré. Yé bok ne jam nde Yefun, wo yé gato ben bi suk-i sane sok mo biris bi yekwesu bi rus-i ne sor ré.

¹⁰Bere nin ku sukye, wo nin nyuwa nde. Ji ki sare do, bere biris bi yekwesu ben yetu ge bok yo but nin ge bok yo, ete sok nin mo sel. Sane bere biris bi yekwesu gato ben sukibit ne werwa gwat os wa nin subere nin misyar Yefun mone. Mo sel mit ne bere nin ku sukye sor kom mo kam musyu dik rek. Kapre karowa nin kwop rok mone, nin onyar kem mo Ji, nin ben Ji bi suk-i sane sor kom mo pe gato or mó yo, bere Ji bi os wa nin kem ndo to kapyo mato kapyo, tepsu ye gato nggi wai ku hadiah mo koirut.

¹¹Sane nin brek nin dabe muya-muma kadit nde, wo nin jammo sukdu gato Yefun Allah Gen ki nai yé gato onyar kem mo Yefun Yesus mo nu ari ne et. Yé gato nggi wai kadit bur re bi suk-i yo, bere sukkwop wam kedowe yo tok án nde, án yo kwop to kapyo mato kapyo nde.”

¹²Yefun Allah bi Gan ki nai ji do, “Nan krom sukdu wa malaikat gato mewa yé gato onyar kem mo Yefun Yesus mo nu ari mo kota Pergamus sare do: Ji gato bi nyom gato ot de we ne bi sukdu-i anare:

¹³Ji jam do, nin kem mo nat gato biris bi yekwesu kem mone. Nin da kem mone, sarewo nin onyar kem pe mo Ji, nin yo misyar Ji nde. Antipas gato ben Ji bi suk-i e, ki Ji bi sukdu-i ne petok sor, ye gu kwop. Kapre ye gu an kwop wé mo nin gwem mo nin dakai bi kota, gato biris bi yekwesu kem mone, nin yo misyar Ji dom nde.

¹⁴Sarewo suk bok yo gato Ji bariket nin mó anare: Yetu ge bok yo mo nin bi nu ari ne jom yenabi gato gum do Bileam bi sukduno-i. Kapre Bileam yo dufo mo ye Israel nde, an kadum os nai Balak, ye Israel bi yeko bi yekwesu dik yo, subere Balak gwat ye Israel ges mo os ibit. An ki bi sukdu-i wa tik ye Israel mit wa git sugit gato yé som sukdaret su ne. An ki bi sukdu-i wa tik nje mit subere yebris si nggon da bro wa ben siri su yu.

¹⁵Sane mo nin bi nu ari dom, ge bok yo jom Nikolaus bi pakon bi sukdu-i.

¹⁶Sane nin brek kadit sukdu gato ibit ne se! Nin yo brek kadit sukdu gato ibit ne nde yo, bergan sor ete Ji futma gu nin yé gato jom sukdu ne su nyom gato ot de we gato syesyar kadit Ji syokwet.

¹⁷Sane nin brek nin dabe muya-muma kadit nde, wo nin jammo sukdu gato Yefun Allah Gen ki nai yé gato onyar kem mo Yefun Yesus mo nu ari ne et. Yé gato nggi wai kadit bur re bi suk-i yo, bere Ji syo sugit gato ye kendo gum do, ‘manna’ ne napyo nai án git. Sugit ne yo bor wa yé mwa jam nde, wo tepsu suga nyim tuya Yefun syo manna nai ye Israel wa án kem mo bur re, bere Ji syo manna nai yé gato nggi wai kadit bur re bi suk-i subere yé ne nggiwa simo Yefun bi os-i pe sor. Sane dom, bere Ji syok jok kwo dik yo nai án. Mo jok ne ye krom gum be mó, wo yé gato ku jok ne sor ete jam gum gato ye krom mone.”

¹⁸Yefun Allah bi Gan ki nai ji do, “Nan krom sukdu wa malaikat gato mewa yé gato onyar kem mo Yefun Yesus mo nu ari mo kota Tiatira sare do: Yefun Allah bi Gan gato gro gan ru tepsu bot ru, Yefun Allah bi Gan gato gwes tak rup-rek tepsu tembaga gato ye kon ete nggri su san det wade nggren ne bi sukdu-i anare:

¹⁹Ji jam subot suk mwa gato nin ben ne. Ji jam do, nin bi sukjimnut sye kas subot yu e, nin onyar kem mo Yefun e, nin ós ye gato yewa suk e; kapre nin ku sukye, nin misyar Yefun nde, wo nin jom An bi sukdu-i ne krat sor. Ji jam do, su re, nin ben suk sane mwa wai kadit suk gato nin ben su ketke nin onyar kem mo Ji ne o ré.

²⁰Sarewo suk dik yo gato Ji bariket nin mone anare: Nin kak nin mit wa nggon gato gum do Izebel ma duno nin, nin yo duyawa mom nde. Nggon ne ki do, Yefun Allah anato bes mom gwat Yefun Allah bi suktaru ma wa nin, sarewo nggon ne kidar Ji bi pakwerut-i ge bok yo mó ré. Nggon ne ki bi sukduno-i gwat Ji bi pakwerut bok ne ges mo os ibit. Pakwerut ne ben siri su yu e, án git sugit gato ye som sukdaret su e ne.

²¹Ji kewa nggon ne kwet kadit os ibit gato mom gwat ne ware, mom bari ré, wo mom da bro wa yebris pe sor.

²²Sane bere Ji ben mom i ndo nde wade mom ku sukye, mom yo ndo o nde, mom sem sor. Sane dom, ye gato ben siri su nggon ne bergan sor, ete án si mom ku sukye ndo nde sino, wo án kwet kadit mom bi os-i yo, bere án yo ku sukye nde.

²³Yé bok ne sino gato simo nggon ne, bere Ji gu kwop wé. Ji gu yé bok ne kwop wé, subere yé gato onyar kem mo Yefun Yesus mo nu ari mwa ne sino jam do, Ji anato jam kadik-kadik bi sukjimnut-i kom mo mit ré. Yé bok ne yo ku os wa gurik sukibit gato án ben ne nde. Bere Ji ben sukye nai kadik-kadik tepsu sukibit gato án ben ne.

²⁴Nin deyo mo nu ari mo Tiatira sa, nin yo jammo nggon ne bi sukduno-i gato ibit ne nde. Nin yo jam sukdu gato ye kendo do, sukdu gato kru, gato biris bi yekwesu dakai kadum ne nde. Sane Ji ki sare do, Ji yo syogat nin ben suk yo o gato tepsu sukde wa nin sam ne o nde,

²⁵wo nin jom Ji bi sukduno-i gato nin jom su re ne pe sor wade Ji satu ma et. Ji anato jam kadik-kadik bi sukjimnut-i kom mo mit ré. Yé bok ne yo ku os wa gurik sukibit gato án ben ne nde

²⁶Yé gato nggi wai kadit bur re bi suk-i, ete ben suk tepsu Ji mit iwa ne sor kom mo pe gato or mó yo, bere Ji ben án nggiwa jom yewis bok ne sino mo bur re ré.

²⁷Bere Ji ben án nggi tepsu Ji bi Ai ben Ji nggiwa jom nje, tepsu Daud krombot Ji sare do, ‘Bere An ben sukye nai nje su nggarmom pu wade yé mwa ne sino jammo An sor, tepsu An gwa nje su nggarmom pu ne ndo nde sato ye gwa mbem, bere mbem ne mbrur ré.’

²⁸Sane bere Ji syo bí ik nai yé gato nggi wai mone dom ré.

²⁹Sane nin brek nin dabe muya-muma kadit nde, wo nin jammo sukdu gato Yefun Allah Gen ki nai yé gato onyar kem mo Yefun Yesus mo nu ari ne et.”