Read Abun Suk Gato Yohanes Me Ne 20 Bible Online

Suk Gato Yohanes Me Ne 20 - Abun bible

Suk Gato Yohanes Me Ne 20

¹Ji me suk bok gane or sa, ji sokme malaikat ge dik yo o is kadit gu ma. Malaikat ne jom kunci gato tep wa kak kwoye sye mo bur desnak ne syo. Malaikat jom bus sye dom.

²Malaikat but naga. {Naga ne ka sa nggor bin, sarewo kaim ne sye wai o ré.} Naga ne ben bi suk-i tepsu kwis kadit nyim tuya gato biris bi yekwesu, gato ye kendo gum do Iblis ne. Malaikat but naga ne ete rai su bus sor kom mo tahun ribu dik.

³Malaikat rai naga ne pe ete am mo kwoye sye mo bur desnak. Orete an ndomwa kwoye sye mo bur desnak ne syo krat wari wa naga ne. An ben syik mone subere ye yo ma kak o nde, subere naga yo ku os wa ben kidar nje mo buryo-buryo o nde, sane sor tahun ribu dik or. Tahun ribu dik or wé, ete ye kak kwoye sye mo bur desnak ne syo wa naga syesyar wikgan.

⁴Orete ji sokme yekwesu bi kursi bok yo. Yé gato kem mone anato yé gato ku suktinggi wa jom ete ndobot yetu. Sane dom ji sokme yetu ge bok yo gato ye gu kwop. Ye tot yé bok ne su toko wé su mbam, we yé bok ne ki subot suk gato Yefun Yesus ben ne, án ki subot Yefun Allah bi sukdu-i. Yé bok ne yo som suge doketke si suk gato ye ut ka sa suge ne nde. Ye yo syat suge doketke bi ja mo yé bok ne git det nde. Ye yo syat ja mo yé bok ne syim rut ne dom nde. Yé bok ne Yefun sun kadit sukkwop o ré, án si Kristus jom nje tepsu yekwesu sane sor kom mo tahun ribu dik.

⁵Yé bok ne anato yé gato Yefun Allah sun kadit sukkwop su wam doketke. (Sarewo ye yi neya gato kwop, bere eswa tahun ribu dik ne or wé, ete bere Yefun Allah sun án dom.)

⁶Yé gato Yefun Allah sun su wam doketke ne, yé ne sa, mit at wa. Yé bok ne tep wa Yefun Allah nai sok mo Yefun dakai bi rus-i ne. Bere yé bok ne yo kwop wam kedowe o nde, wo án tepsu yegweswai wa yetu si Yefun Allah. Bere yé bok ne rer mo Yefun Allah bi suk-i. Yé bok ne ben suk wa Kristus sor. Bere án si Kristus jom nje ne sor kom mo tahun ribu dik ne ré.

⁷Tahun ribu dik ne orete yo, malaikat sombok biris bi yekwesu kadit nat gato ye rai an mone.

⁸Biris bi yekwesu bere mubot bur mwa ne sino ete ben kidar nje mo bur re iwedewe. Biris bi yekwesu ben kidar nje mo nat gato gum do Gog si Magog. Biris bi yekwesu ben kidar yé mwa subere án sino sum wa gu Yefun bi rus-i mone. Yetu ne mwa wai o ré. Yetu ne mwa tepsu yen mo sem de.

⁹Yetu mwa ne sum ete mubot bur re sor, án kom mo kota gato Yefun Allah jimnotku. Yefun Allah bi rus-i sum mone, ete yetu mwa ne ti wairi wa Yefun bi rus-i, sarewo bot is kadit gu ete git yé mwa gato futma gu Yefun bi rus-i ne, yé mwa ne kwop or.

¹⁰Orete biris bi yekwesu gato ben kidar yé mwa ne, Yefun am mu ngga mo bot sye gato tepsu em ete ru sye basmi kwik su belerang. Yefun Allah am biris bi yekwesu mo nat gato Yefun am suge doketke si suge kedowe, gato tepsu yenabi gato kidar nje ne, nyim wé ré. Mo bot ne, biris bi yekwesu e, suge doketke si yenabi ne ku sukye ete dipa su noru nombrak sane sor to kapyo mato kapyo.

¹¹Orete ji sokme Yefun Allah gato kem mo kursi kwo gato sye. Bur re si gu nim ne fres wé kadit An ré. Ye yo ku bur re si gu nim ne o nde.

¹²Ji sokme yé mwa ne sino gato kwop sum mo kursi sye ne gwem. Yé gato gum sye e, yé gato gum wok e ne, yé mwa gato kwop ne sino ti mo kursi sye ne gwem. Buku bok yo kak mone. Orete ye nai Buku dik yo o ma, ye kak mone dom. Ye krom yé gato bere kem gesyos ne gum mo Buku ne. Or o Yefun Allah syo sukye nai yetu gato kwop ne tepsu sukdu gato ye krom mo buku bok ne. Yefun Allah syo suk nai yetu mwa ne tepsu suk gato yetu mwa ne ben ré.

¹³Yé gato kwop mo sem mit syesyar ete ma ti mo Yefun Allah gwem. Yé gato mo gwinggri syo mo bur desnak si sukkwop bi nat-i ne syesyar sino ma ti mo Yefun Allah gwem dom. Orete Yefun Allah syo sukye nai nje gedik-gedik tepsu suk gato gedik-gedik ben ne.

¹⁴Orete sukkwop bi nat-i si gwinggri syo mo bur desnak ne, ye am mu ngga mo bot sye gato tepsu em ete ru su nyor. (Bot sye gato tepsu em ete ru ne anato tepsu sukkwop kedowe.)

¹⁵Ye to ye yo krom an gum mo Buku Yegesyos nde yo, bere ye am ye ne mu ngga mo bot sye gato tepsu em ete ru ne.