Read Abun Suk Gato Yohanes Me Ne 22 Bible Online

Suk Gato Yohanes Me Ne 22 - Abun bible

Suk Gato Yohanes Me Ne 22

¹Orete malaikat ne kadum syur gato ben yé mbau ne nai ji me dom. Syur ne rer tepsu kaca. Syur ne sye kadit Yefun Allah si Domba Gan bi kursi sye ne.

²Syur ne sye ket os sye mit mo kota ne. Mo syur de kwe gato ben yetu kem gesyos ne kom mó. Kwe ne ke dik yo mo syur dere, ke dik yo o mo syur deta. Kwe ne bo ainadik-ainadik petok, tepsu tahun dik, kwe ne bo wam musyu dik sop we. Yetu mo buryo-buryo nai kwe ne nat wa kon án wip ne ge su.

³Suk mwa mo kota ne ndo sino. Yefun Allah yo dufo mo suk yo gato kem mo kota ne mo nde. Bere Yefun Allah si Domba Gan bi kursi sye mo kota ne. Yefun bi pakwerut ben Yefun bi suk-i mone.

⁴Bere Yefun bi pakwerut dakai ku Yefun Allah gro mone. Ye krom Yefun Allah gum mo án git det.

⁵Mo kota ne noru mo nde, sane án yo mitmo sukru si kam nde, we án bi Yekwesu Yefun Allah bere tepsu sukru rer ku án. Bere Yefun bes án tepsu yesu gato jowa Yefun bi suk-i ne sor to kapyo mato kapyo.

⁶Orete malaikat ne ki nai ji do, “Sukdu gato ji ki re sangge, sukdu ne tep wa yé onyar kem mó. Men bi Yekwesu Yefun Allah gato bok An Gen mo yenabi anato syogat An bi malaikat ma kadum suk gato bere bor nai An bi pakwerut mwa ne jam et.”

⁷Yefun Yesus ki do, “Nin jammo suk gato Ji ki re et, bergan sor ete Ji ma. Ye gato jammo sukdu subot suk gato bere bor mo buku re, ye ne sa, mit at wa, we bere Yefun ben sukndo su ye ne ré.”

⁸Ji gato gum do Yohanes jam ete sokme suk mwa gato ji krom more ré. Ji jam ete ji sokme suk mwa ne or sa, ji bare ji nggwa mo malaikat gato kadum suk mwa nai ji ne gwem. Ji bare ji nggwa wa ji bes malaikat ne gum kok,

⁹sarewo malaikat ne ki nai ji do, “Nan bes ji gum kok nde. Ji si nan tepsu Yefun Allah bi pakwerut sino. Men ka we si nan bi nji, gato yenabi bok ne si yé mwa ne sino gato jammo sukdu mo buku re, men sino tepsu Yefun Allah bi pakwerut. Sane nan bes ji gum kok nde, wo nan bes Yefun Allah gum kok sor ré.”

¹⁰Orete malaikat ne ki nai ji o do, “Nan gurik sukdu subot suk gato bere bor su kam sari ne ma mo buku re nde, we yo nam nde ge, suk mwa re bor ré.

¹¹Ye to ben sukibit yo, ben bi suk-i ne sor. Ye to ben suk gato Yefun bagri ket ne yo, ben bi suk-i ne sor. Ye to ben sukndo yo, ben bi suk-i ne sor. Ye to ben Yefun Allah bi suk-i ne yo, ben Yefun Allah bi suk-i ne sor.”

¹²Yefun Yesus ki do, “Nin jammo suk gato Ji ki re et, bergan sor ete Ji ma. Ji gwat suk mwa gato bere Ji syo nai nje tepsu suk gato án ben wa Ji ré.

¹³Ji anato Yefun gato ut suk kadit ketke ete Ji jom sane sor kom mo pe gato or mó. Ji anato kem kadit ketke sor to kapyo mato kapyo.”

¹⁴Ye gato ben Yefun bi suk-i, ben sato án gu án bi san kwo ndo it anane. Ye gato gu án bi san kwo yo, bere án ku os wa án git kwebo mo kweke gato ben yetu kem gesyos. Bere án ku os wa án sok ket ros syo mu mo kota mit ne. Yé ne sa, án mit at wa, we bere Yefun ben sukndo su án ré.

¹⁵Sarewo yé gato yo ku os wa sok mo kota ne nde anato yé gato bariket Yefun. Yé ne ben bi suk-i sato re, án kwa syua e, kro ri, frum suk e ne e, án ben siri su yu daret e, án gu ye yi kwop daret e, án som sukdaret e, án mit iwa kidar nje ket kwayo-kwayo en ne. Yé mwa gato ben bi suk-i sane, yo ku os wa sok mo kota ne nde.

¹⁶“Ji, gato gum do Yesus, Ji anato syogat Ji bi malaikat ma wa kibot sukdu mwa mo buku re wa ye gato onyar kem mo Ji mo nu ari mo bur re jam ré. Ji anato yeraja Daud bi dat. Ji anato kak os ndo wa yetu tepsu bí ik gato it ben sato kak os wa nombrak ne ma.”

¹⁷Yefun Allah bi rus-i, gato tepsu Yefun Yesus bi nggon gato bere An kra ne si Yefun Allah Gen ki nai Yefun Yesus do, “Yefun Yesus o, Nan ma et!” Yé mwa gato jam sukdu mo buku sino re ki do, “Yefun Yesus o, Nan ma et!” Yé mwa ne ki do, “Yefun Yesus o, Nan ma et!” Yé gato sosa, án ma nai syur gato ben án mbau mone et. Yé gato mit iwa ma nai syur ne yo, án nai yi sor, án yo bi suk yo wa nde.

¹⁸Ji, gato gum do Yohanes, ji ki suknapa wa yé mwa ne sino gato jam suktaru subot suk gato bere bor su kam sari ne ma mo buku re, sare do, ye gato syek kwa be tó sukdu re yo, bere Yefun Allah waii syek sukye tepsu sukye gato ji krombot mo buku re wa ye ne.

¹⁹Ye gato tot sukdu mo buku re napyo wé yo, bere Yefun Allah tot sukndo gato ji krombot mo buku re napyo wé kadit ye ne ré. Bere Yefun Allah tot sukndo gato ye ne ku mo Yefun Allah bi kota si kwebo gato ben yetu kem gesyos ne, Yefun Allah tot sukndo ne napyo wé kadit ye ne ré.

²⁰Ye gato kibot sukdu mwa re nai ji, An ki do, “Sangge, bergan sor ete Ji ma!” Sangge! Yefun Yesus, men bi Yekwesu, Nan ma et!

²¹Men bi Yekwesu Yefun Yesus ete mewa Yefun Allah bi rus-i ne sino sor. Sangge.