Read Abun Suk Gato Yohanes Me Ne 3 Bible Online

Suk Gato Yohanes Me Ne 3 - Abun bible

Suk Gato Yohanes Me Ne 3

¹Yefun Allah bi Gan ki nai ji do, “Nan krom sukdu wa malaikat gato mewa yé gato onyar kem mo Yefun Yesus mo nu ari mo kota Sardis sare do: Ji gato jom Yefun Allah Gen ge mufit gato mu ben Yefun Allah bi suk-i, Ji gato jom bí ge mufit ne bi sukdu-i sare: Ji jam subot suk mwa gato nin ben mone o ré. Yé mwa ne nut do, nin sa, mbau, nin onyar kem mo Ji, sarewo Ji jam do, nin misyar Ji anato nin tepsu yé gato kwop ré.

²Sane nin sun tom! Kom more, nin yo ben suk tepsu pe gato Yefun Allah iwa ne nde tó, bergan nin tepsu yé gato kwop rok ré. Sane nin misyar Yefun bi suk-i o nde, wo nin wergat nin nggwa subere nin ben suk tepsu Ji mit o et.

³Sukduno gato yé duno nin su ne, nin napawa pe sor. Sukduno gato yé ki nai nin jam ré, nin jam it, sane nin kwet kadit os ibit, ete nin benbot sukduno ne et. Sarewo nin sem su sukduno ne tó. Nin yo brek satu ma ete muket os gato ndo nde yo, bere Ji ba tepsu yegitsi. Kam gato Ji ba ku nin ne, bere nin gensu.

⁴Sarewo nin gato mo kota Sardis, nin deyo sa, nin mewa nin nggwa kadit os ibit. Nin sa, ben sato nin bi san yo dum nde. Bere nin it san gato kwo ndo, ete nin si Ji mu sino, we Yefun Allah me do, nin sa, nin ben bi suk-i tepsu Yefun mit ré.

⁵Yé gato nggi wai kadit bur re bi suk-i yo, bere si yé bok ne sino it san gato kwo ndo. Bere Ji yo rus án gum wé kadit Buku Yegesyos nde. Bere Ji ki mo Ji bi Ai si malaikat ne gwem do, Ji bi rus-i mo án.

⁶Sane nin brek nin dabe muya-muma kadit nde, wo nin jammo sukdu gato Yefun Allah Gen ki nai yé gato onyar kem mo Yefun Yesus mo nu ari ne et.”

⁷Yefun Allah bi Gan ki nai ji do, “Nan krom sukdu wa malaikat gato mewa yé gato onyar kem mo Yefun Yesus mo nu ari mo kota Filadelfia sare do: Ji gato ben Ji bi suk-i ndo petok, Ji gato ben Ji bi suk-i ri-roi sor, Ji gato jom yeraja Daud bi kunci ne, suk gato Ji kak, ye yo nggiwa grem suk yo krat yawa satu nde. Sane dom, suk gato Ji grem krat yawa, ye yo nggiwa kak o nde. Ji bi sukdu-i anare:

⁸Ji jam suk mwa gato nin ben ne or ré. Nin me re, Ji kak os wa nin sok mo Yefun bi rus-i. Ji kak os mo nin gwem nyim wé ré. Ye yi yo nggiwa grem suk yo yawa wa nin muket os ne nde. Ji jam do, nin yo nggi teker eta nde, wo nin werwa nin benbot Ji bi sukdu-i petok sor, nin yo rewa Ji gum nde.

⁹Yé bok yo gato kidar do, án tepsu ye Yahudi, sarewo Yefun yo nai án gum sok mo Yefun bi rus-i nde yo, yé bok ne jam nde Ji. Yé bok ne sok mo biris bi yekwesu bi rus-i. Bere Ji ben án ma bare án nggwa mo nin gwem. Bere án jam do, Ji anato bi sukjimnut sye kas subot nin ré.

¹⁰Kapre nin ku sukye, nin misyar Ji nde, wo nin benbot Ji bi sukdu-i petok sor tepsu Ji ki ne. Sane bere kam gato yetu mwa ne sino mo bur re iwedewe ku sukye ndo nde, bere Ji mewa nin kadit ré. Bere yetu mwa ne sino ku sukye subere yé gato misyar Ji, bere bor mone.

¹¹Bergan sor, ete Ji ma ré. Nin jom Ji bi sukduno-i ne pe, wade Ji satu ma et. Sane bere ye yi yo ku os wa nai sukndo gato bere nin ku ne wé kadit nin nde, bere nin kem ndo mone it.

¹²Yé gato nggi wai kadit bur re bi suk-i yo, bere Ji bes án tepsu kwedi mo Ji bi Ai Yefun Allah bi nu-i. Ye gato nggi ne kem pe mo nu ne. Yé ne yo mu kadit nu ne nde. Bere Ji krom Yefun Allah gum mo yé ne. Bere Ji krom Yefun Allah bi kota gum mo yé ne. Kota ne anato Yerusalem be gato bere Ji bi Ai Yefun Allah syo is kadit gu ne ma. Bere Ji krom Ji dakai gum be mo yé gato nggi wai kadit bur re bi suk-i dom ré.

¹³Sane nin brek nin dabe muya-muma kadit nde, wo nin jammo sukdu gato Yefun Allah Gen ki nai yé gato onyar kem mo Yefun Yesus mo nu ari ne et.”

¹⁴Yefun Allah bi Gan ki nai ji do, “Nan krom sukdu wa malaikat gato mewa yé gato onyar kem mo Yefun Yesus mo nu ari mo kota Laodikia sare do: Ji gato Sangge, Ji gato ki Ji bi sukdu-i subot Yefun Allah ne sangge, Ji gato ki Yefun Allah bi sukdu-i sisu ri-roi sor, Ji gato jom suk mwa gato Yefun Allah ut mo i-ke ne sino, Ji bi sukdu-i anare: Ye to jam Ji ké, ete kak nusyo wa Ji yo, bere Ji sok mu ku ye ne mo nu mit ré

¹⁵Ji jam subot suk mwa gato nin ben ne or ré. Nin yo ben Ji bi suk-i su nin mit dik nde. Nin yo bariwa ben Ji bi suk-i dom nde, tepsu nin kam nde, nin dek dom nde. Sa ndo sa, nin nai os dik sor, sare: nin ben Ji bi suk-i yo, nin ben su nin mit dik sor, ondewo nin ben Ji bi suk-i nde.

¹⁶Nin kam nde, nin dek dom nde, wo ben sato nin kam bo sor ré. Nin ben Ji bi suk-i su nin bambrai. Sane anato bere Ji bariket nin mone, ben sato Ji gwi nin su nin bi os ibit ne mu nden.

¹⁷Nin ki do, ‘Men yekaya it, men ku suk mwa mó ré. Men yo yewa suk nde.’ Nin da ki sane, sarewo nin jam nde, Ji nut mo nin do, ‘Kamapa, nin yo ndo nde. Nin yewa suk. Nin gro ndu. Nin kawarun ré.’

¹⁸Sane Ji duno nin do, emas gato ye kon ete ye nggri su san det wade nggren ne, nin ma nin so kadit Ji et. Sane bere nin tepsu ye gato ku suk mwa. Nin so san kwo wa nin it et. Sane bere nin kawarun o nde, bere nin damen o nde. Nin so ron wa nin es mo nin gro gan et. Sane bere nin sokme suk sisu ndo.

¹⁹Ye gato Ji bi sukjimnut sye kas subot ne yo, bere Ji ndantom yé ne, ete Ji kwam án mo sukibit gato án ben ne. Sane nin kwet kadit sukibit gato nin ben ne et. Nin ben Ji bi suk-i sisu nin mit dik si nin onyar dik et.

²⁰Nin jammo suk gato Ji ki re et. Ben sato Ji ma ti mo nusyo de nden ete Ji ké. Ye to jam Ji ké, ete kak nusyo wa Ji yo, bere Ji sok mu ku ye ne mo nu mit ré. Bere Ji si ye ne git sugit sino mone tepsu yedik.

²¹Yé gato nggi wai kadit bur re bi suk-i yo, bere Ji bes án gum kok. Bere án gum kok tep wa án si Ji tepsu yekwesu. Bere án si Ji kem mo yekwesu bi kursi gato Ji kem mone sino, tepsu Ji dakai nggi wai kadit bur re bi suk-i. Orete su re Ji si Ji bi Ai kem mo yekwesu bi kursi sino ré.

²²Sane nin brek nin dabe muya-muma kadit nde, wo nin jammo sukdu gato Yefun Allah Gen ki nai yé gato onyar kem mo Yefun Yesus mo nu ari ne et.”