Read Abun Suk Gato Yohanes Me Ne 4 Bible Online

Suk Gato Yohanes Me Ne 4 - Abun bible

Suk Gato Yohanes Me Ne 4

¹Sukdu wa yé gato onyar kem mo Yefun Yesus mo nu ari bok ne, ji jam or sa, ben sato ji semda ete ji sokme nusyo mo gu kak ré. Ye gato ji jam ki suk su ketke, gato saiye tepsu trompet ne, an ki do, “Nan ma more et. Ji kadum suk gato bere bor wari wa nan jam.”

²Sugane Yefun Allah Gen pet mo ji. Orete ji me yekwesu bi kursi mo gu. Yekwesu ge dik yo kem mo kursi ne.

³An nggren tepsu sukru wé, ru er si ru kur, tepsu jok gato sugum sye bi warna. Bres dik yo ru nggi wairi wa kursi ne. Bres ne ru tepsu jok zamrud gato nggren.

⁴Kursi musyu we sop at yo o kem wairi wa yekwesu gato gum kok wai ne bi kursi. Mo kursi mwa ne, yenggras gato gum kok ge musyu we sop at kem mó. Yenggras bok ne it san gato kwo ndo. Án bom yekwesu bi topi emas mo án su.

⁵Ji me nowarek, ji jam sukyo-sukyo pu. Ji jam nogu pu gato sye syesyar kadit kursi mo miten ne. Kak ru mufit ti mo kursi ne gwem. Kak ru mufit ne anato tepsu Yefun Allah Gen mufit gato ben Yefun Allah bi suk-i.

⁶Sane dom, ji me suk yo tepsu em mo kursi ne gwem. Em ne tepsu kaca gato rer ok tepsu syur gun gato ram nde. Yefun Allah bi pakwerut ge at mo gu ka sato suge ne mó. Suge at ne kem wairi wa Yefun bi kursi, ge dik yo mo kursi de gwem, ge dik yo o mo kursi de dari, ge dik yo o mo kursi de syim ge, ge dik yo mo kursi de syim jam. Suge at ne gro gan mo án kaim ne sino, gro deyo mo án kaim de gwem si gro deyo o mo án kaim de dari ne sino.

⁷Suge doketke ne ka sato singa. Suge kedowe ka sato sapi ge ndi. Suge kedogri gro-i ka sato yetu gro-i. Suge kedoat ka sato ndam syap tu gato ok.

⁸Suge at ne sino í mumat mó. Suge at ne sino gro gan bot kaim ne sino, gro gan deyo mo i de nden si gro gan deyo o mo i de mit dom. Noru nombrak suge at ne yo not nde, án badek petok sare do, “Yefun ga kok wai ne, Yefun ga ndo wai ne, Nan gum kok wai ‘dit men, Nan Yekwesu ga nggi wai. Yefun ga ketke ne mó e, Yefun ga su re mó e, Bere kam sari Nan mó o, Bere Nan mó o tó e.”

⁹Suge at ne ba sukbadek wa bes Yefun gato kem mo kursi ne gum kok e, un Yefun e, ki ndo mo Yefun e ne. Suge at ne ba syek Yefun gato kem to kapyo mato kapyo ne sa,

¹⁰yenggras ge musyu we sop at bare nggwa mo An gato kem mo kursi ne gwem. Yenggras ne un Yefun gato kem to kapyo mato kapyo. Yenggras ne bare bi topi gato án bom tepsu yekwesu ne mo Yefun bi kursi de gwem, ete án badek su do,

¹¹“Men bi Yekwesu ne e, Yefun gato jom men ne e, Nan sa, tep wa men bes Nan gum kok ne o, Men bes Nan gum sye ne o. Men bi Yekwesu ne e, Yefun gato jom men ne e, Nan sa, tep wa men un Nan gum ne o, Nan sa, tep wa ku suktinggi ne o. Men bes Nan gum kok a we, Men un Nan gum a we, Nan ut suk mwa ne sino o, Nan bi mas mo suk mwa ne sino o.”