Read Abun Suk Gato Yohanes Me Ne 8 Bible Online

Suk Gato Yohanes Me Ne 8 - Abun bible

Suk Gato Yohanes Me Ne 8

¹Domba Gan kak lilin gum domufit ne wé sa, suk mwa gato mo gu ne not ré. Suk mwa mone yo ki sukdu kwa dik yo mo nde sane sor kom mo jam napyo or,

²ete ji sokme malaikat ge mufit ti mo Yefun Allah gwem. Malaikat ge mufit ne ku trompet sino, ge dik ku trompet bo dik subere án tik bi trompet ne ba sye.

³Malaikat ge dik yo o mu mo meja gato ye grem suk wa ye som Yefun Allah su mone, ete an ti mo meja ne de. Malaikat ne jom sukbo emas. Malaikat ne ku suk gato ye gre ete i-bu basni grik ndo ne mwa tepsu suksom wa ye som Yefun Allah su. Malaikat ne gwat sukdu kadit ye gato onyar kem mo Yefun Yesus mwa ne sino. Malaikat gwat sukdu ne, ete syo nai Yefun sisu suksom gato grik ndo ne. Malaikat ne grem suksom si sukdu mwa gato yé ki nai Yefun ne mo meja gato ye gre suk wa som Yefun Allah su mone. Meja gane, ye nggo su emas ete ye grem mo Yefun bi kursi tak de gwem.

⁴Suk gato grik ne, ye syo bot git, ete i-bu gato basni grik ndo it sisu sukdu gato yé gato onyar kem mo Yefun Yesus ki nai Yefun Allah ne sino. I-bu gato grik ndo sisu sukdu ne it kadit sukbo mo malaikat syim mu kom mo Yefun Allah gwem.

⁵Orete malaikat gwat sukbo, ete nai bot kadit meja gato ye grem suk wa som Yefun Allah su ne. An bok bot mo sukbo mit, orete an am sukbo ne ges mo bur re ré. Sukbo ne ma rek mo bur re sa, nogu pu e, sukyo-sukyo pu e, nowarek e, sui juwai bur re e ne.

⁶Orete malaikat ge mufit gato jom trompet bo mufit ne fro wa tik trompet bok ne ba.

⁷Malaikat dofutmo tik bi trompet-i ba sa, yé yo am es gato krat sa jok tepsu nogi si bot fros su yetu dé ges mo bur re ré. Bur napyo bot git or ré. Kweke mwa ne sino napyo bot git or ré. Kadit kweke gri, ke dik bot git, wo ke we kem. Es kur mwa ne sino, bot git or ré.

⁸Malaikat kedowe tik bi trompet-i ba o sa, yé yo am suk yo ka sa banbo sye gato bot ru mone mu ngga mo sem. Sem ne napyo tepsu yetu dé mone or ré.

⁹Suk gato kem mo sem ne napyo kwop or ré. Kwem mwa ne mo sem napyo ibit or ré. Kwem gri mo yo, dik yo ibit, we ndo tó.

¹⁰Malaikat kedogri tik bi trompet-i ba o sa, bí sye dik yo ges kadit gu. Bí ne ru sye tepsu sukru sye. Bí ne ges mo syur napyo si syur nggrup napyo.

¹¹Bí ne gum do Ndó. Sane syur napyo ndó, ete yetu mwa gato da syur gato ndó ne kwop or ré.

¹²Malaikat kedoat tik bi trompet-i ba o sa, suk yo gwa kam su ne pet det gri, det dik yo ibit ré. Suk yo gwa aina digane dom. Suk yo gwa bí napyo digane dom ré. Sane kam su e, aina e, bí e ne napyo te ré. Nombrak napyo ndendu yut ré, noru napyo ndendu yut ré.

¹³Ji sokme saresa, ji jam ndam syap tu ge dik yo gato ok mo gu nim ne saiye do, “Sukye o, sukye o, sukye o, sukye ndo nde wa yetu gato kem mo bur. Bergan malaikat ge gri yo o tik bi trompet-i ne ba yo, yetu mo bur ku sukye ndo nde go!”