Read Abun Suk Gato Yohanes Me Ne 9 Bible Online

Suk Gato Yohanes Me Ne 9 - Abun bible

Suk Gato Yohanes Me Ne 9

¹Malaikat kedomumet tik bi trompet-i ba o sa, ji sokme bí dik yo ges mo bur ré. Orete ji sokme ye yo syo kunci nai bí gato ges ne wa kak kwoye sye gato mo bur desnak ne syo su.

²Bi ne kak kwoye sye gato mo bur desnak ne syo su kunci ne sa, bot bu it ma nim. Bot bu ne mwa ndo nde, tepsu bot bu mwa gato it kadit bot gato sye teker. Bot bu ne it mo gu sane sor bot bu kewa kam su. Gu nim ne ndendu ré.

³Orete yoi mwa is ma mo bur kadit bot bu ne. Yoi ne ku suktinggi tepsu wi.

⁴Yefun syaugat yoi ne do, “Yoi git es e, kwe e, sukjan e ne ibit nde, wo yoi jau yetu gato ye yo syat Yefun bi ja mo án git det ne mo nde. Yetu gato gum sok mo Yefun bi rus-i ne, yoi gu nde.”

⁵Yoi yo ku suktinggi wa gu yetu kwop nde, wo yoi gu nje yó ndo nde tepsu wi gu nje. Yoi gu nje wade yé dipa ete wo su. Yoi gu nje sane sor kom mo aina mumek.

⁶Aina mumek gato yoi gu nje su ne, yetu mwa ne sino iwa án dakai kwop kadit sukye ne, sarewo án yo ku os nde. Án werwa án kwop, sarewo ben sato sukkwop titi kadit án ré.

⁷Yoi ne ka sato kuda gato yé fro tepsu yeko gato futma wa gu yesa. Yoi bom suk yo mo yoi su ka sato yekwesu bi topi emas. Yoi gro-i ka sato yetu gro-i.

⁸Yoi sugo-i ka sato nggon sugo-i. Yoi syos-i sye ka sato singa syos-i.

⁹Yoi it suk sato san besi kewa yoi tunap. Yoi ok yo, yoi i pu sye sato kuda gato gwat kereta mwa futmu wa gu yesa ne.

¹⁰Yoi nyo-i ka sato wi nyo-i. Yoi gu nje yó sato wi gu nje ne. Yoi ku suktinggi wa gu nje su yoi nyo wade yé dipa ete wo su. Yoi gu nje sane sor kom mo aina mumek or.

¹¹Yoi bi yekwesu anato malaikat ge dik yo. Malaikat ne yekwesu mo kwoye sye mo bur desnak ne dom. Su a Ibrani malaikat re gum do, Abadon. Su a Yunani malaikat re gum do Apolion (gato bi sukjimnut do, “Ye gato ben yetu ibit”).

¹²Sukye kwa gri gato ndam syap tu saiye su ne, kwa dik sa, yoi ben or ré, wo kwa we yo o mó tó.

¹³Malaikat kedomumat tik bi trompet-i ba o sa, ji jam sukdu ma kadit suk suti at mo meja emas gato ye grem suksom wa ye som Yefun Allah su mone, mo Yefun Allah gwem.

¹⁴Sukdu ne, ye ki nai malaikat kedomumat gato jom bi trompet-i sare do, “Nan mu sombok malaikat ge at gato ye rai mo Syur Efrat de ne et.”

¹⁵Malaikat kedomumat ne mu sombok malaikat ge at ne. Malaikat ge at ne, Yefun fro ndek wa mu gu yetu napyo kwop wé tepsu bi jam, si bi kam, si bi aina si bi tahun gare it. Kadit yetu ge gri, án gu ge dik kwop, wo ge we ete kem tó.

¹⁶Malaikat ge at ne bi yewukmise gato it mo kuda ne kom mo ge juta wotin we, ji jam ye ki ré.

¹⁷Kuda mwa ne si yé gato it mo kuda ne, ji me tepsu ji semda sare do, yé gato it mo kuda it san besi kewa án tunap. San ne er tepsu bot ru e, kur tepsu jok nilam e, kri tepsu belerang. Kuda ne su-i tepsu singa su-i. Bot e, bot bu e, ru sye basmi kwik su belerang ne syesyar kadit kuda syokwet ré.

¹⁸Bot e, bot bu e, belerang e ne, suk gri ne ben sukye wa nje. Suk gri gato syesyar kadit kuda syokwet ne gu yetu napyo kwop or ré. Kadit yetu ge gri, án gu ge dik kwop, wo ge we ete kem tó.

¹⁹Kuda bi suktinggi mo án syokwet sisu án nyo ne sino. Kuda nyo tepsu kwis. Mo kuda nyo su sato kwis su mó. Kuda nyo anato gu nje yó ndo nde.

²⁰Yetu napta gato yo kwop mo sukye bok ne nde tó yo, án sino yo brek kadit sukibit gato án ben ne nde. Yetu ne som yerom e, aboksye e ne pe sor, án som sukdaret gato yetu ut win Yefun Allah e ne. Yé ut suk ne kadit suk sato emas e, perak e, tembaga e, jok e, kwe e ne. Suk bok gato yetu dakai ut wa som daret ne yo me suk nde, suk ne yo jam sukdu gato yé ki ne nde, suk ne yo mu dom nde.

²¹Sane dom, yetu gato kem tó ne, án yo brek kadit sukibit gato án ben nde sato: án gu nje kwop e, án kwa syua e, kro ri e, frum suk e ne e, án ben siri su yu e, án syimsi suk e ne. Sukibit mwa ne án ben petok sor.