Read Achang VPOM 11 Bible Online

VPOM 11 - Achang bible

VPOM 11

¹Gvshih nyeisjvng gonh gas nyingh dvja kyingh kat, dang eq dvyhangteh zis dvyhung.

²Nyamoq buisthuq shot pheh tyungh loh lyis Shina mau mas pazoe dvkoeuq nyvng las houmha nyeis.

³Nyamoq gas, Los geh, jyenhchvp kuot las gis shoq tsain phuot goh, ge nyang changh nyang tsain taiq goh. Houmha nyamoq gas luk gungsthaiq jyenhchvp, jyenhchvp tap das tsohnhih tsain yoh.

⁴Houmha nyamoq gas, Los geh, yang nyeisjvng gonh ma dyos loh das zis yahge yah nyings hoeuh das xiklyis wugungs eq, maukhung thuk dah tyoeuqzvm eq tsain kuot goh, ge.

⁵YHENSAIN ka dius jens kuot dah wugungs yahge tyoeuqzvm lyis yoeuh das ge maukhung mhayah gyoh los.

⁶Housoeh YHENSAIN ka, Nyamoq gas dius dvnyau kyingh, dvnyingh kyingh nghuot las, heika nyamoq vsaiq kuot xi muh nghuot: nyamoq kuot ya kuot yvlyis yoh kuot loh das.

⁷Los geh, nyamoq nyang changh taiq dah dang ma seqgyo goh shoq nyamoq nyingh lyis e lhoeu nhunk dyei goh, ge.

⁸Housoeh YHENSAIN ka nyamoq lyis hou mhayah nyeisjvng gonh sanh tyo kat las nyamoq wugungs kuot zis no tyamp.

⁹YHENSAIN ka nyeisjvng gonh nyingh lyis lhoeu nhunk dyei gvng mas hauh joqyos lyis Babel[11] ge nyhink. YHENSAIN ka nyamoq lyis hauh joqyos masyah nyeisjvng gonh sanh tyo tyamp.

¹⁰Heika Shem dah diusjangh caiq nghuot. Shem ka nyah nyenhkyi dvxo zvn, dvjeis lhyi thang lhyi aiq zvn lyis lo Arpashad khoeu los.

¹¹Shem ka Arpashad bos thang lhyi oengxo zvn nyeis shih las nyelo eq yukgis lo eq tsain bos shih.

¹²Arpashad gas somhci oeng zvn lyis lo Shela khoeu los.

¹³Arpashad gas Shela bos thang lhyi nyeixo somhci zvn nyeis shih las nyelo eq yukgis lo eq tsain bos shih.

¹⁴Shela gas somhci zvn lyis lo Eber khoeu los.

¹⁵Shela gas Eber bos thang lhyi nyeixo somh zvn nyeis shih las nyelo eq yukgis lo eq tsain bos shih.

¹⁶Eber gas somhci nyei zvn lyis lo Peleg Khoeu los.

¹⁷Eber gas Peleg bos thang lhyi nyeixo somhci zvn nyeis shih las nyelo eq yukgis lo eq tsain bos shih.

¹⁸Peleg gas somhci zvn lyis lo Reu khoeu los.

¹⁹Peleg gas Reu bos thang lhyi aiqxo gau zvn nyeis shih las nyelo eq yukgis lo eq tsain bos shih.

²⁰Reu gas somhci aiq zvn lyis lo Serug khoeu los.

²¹Reu gas Serug bos thang lhyi aiqxo nyhet zvn nyeis shih las nyelo eq yukgis lo eq tsain bos shih.

²²Serug gas somhci zvn lyis lo Nahor khoeu los.

²³Serug gas Nahor bos thang lhyi aiqxo zvn nyeis shih las nyelo eq yukgis lo eq tsain bos shih.

²⁴Nahor gas aiqci gau zvn lyis lo Tera khoeu los.

²⁵Nahor gas Tera bos thang lhyi dvxo gau zvn nyeis shih las nyelo eq yukgis lo eq tsain bos shih.

²⁶Tera gas nyhetci zvn jweh lyis lo jens Abram, Nahor, Haran moq khoeu los.

²⁷Heika Tera vkoq diusjangh caiq nghuot. Tera gas Abram, Nahor, Haran moq dah uwus nghuot. Haran gas Lot dah uwus nghuot.

²⁸Haran gas nyah uwus Tera nyeis shih lyis nyang khoeu jang, Khalde mau Ur wus mas shei khoq.

²⁹Abram yahge Nahor eq yhensain nyhiq tsain yoeus. Abram dah yhensain nyhiq nyings gas Sarai nghuot. Nahor dah yhensain nyhiq gas Haran dah lonyi Milkha nghuot. Haran gas Milkha yahge Iskha dah uwus nghuot.

³⁰Sarai gas dius thonh nghuot las lo ma bos.

³¹Hauh yoq lyis Tera gas nyah lo Abram, nyah nyeilo Haran lo Lot, nyah doeusmuh, Abram dah yhensain nyhiq Sarai moq lyis shwih las Khanan mau mas loh das ge, Khalde dius nyeis dah Ur masyah thuq los. Nyamoq gas Haran mas jweh las houmha nyeis.

³²Tera gas nyenhkyi aiqxo oeng zvn lyis Haran mas shei.