Read Achang VPOM 12 Bible Online

VPOM 12 - Achang bible

VPOM 12

¹Gvshih Abram lyis YHENSAIN taiq zis gas, Nah mau, nah buisnoms, nah uwus yhen mhayah thuq las ngos nvng lyis tuonh shet das mau mas loh aq.

²Ngos nvng lyis diuszains nyau kuot das: ngos nvng lyis shvmanh dyei las nvng kuhxing das. Nvng masyah dius jens shvmanh yoh das.

³Nvng lyis shvmanh dyei soeu lhyi ngos shvmanh dyei das; nvng lyis nhoengh soeu lhyi ngos nhoengh das. Nvng masyah nyeisjvng thoq mas dius nyau gas shvmanh tsain yoh das, ge.

⁴Housoeh YHENSAIN nyang lyis taiq zis yah dvyhangteh thuq loh. Lot eq nyang yah chank loh. Abram gas Haran masyah thuq uhlyis nyenhkyi nyhetci oeng zvn nghuot.

⁵Housoeh Abram gas nyah yhensain nyhiq Sarai, nyah vnoeuh dah lo Lot, zisyos dvnganh, Haran mau mas nyang yoh dah jyeidwis jens, nyah yhenbang dvnganh shwih las Khanan mau pheh thuq loh. Housoeh nyamoq hauh mau mas jweh loh.

⁶Abram gas hauh mau suh lai las Shekem wuxom More ge joqyos wons zains khyei mha jweh: hauh uhlyis Khanan dius jens houmha nyeis.

⁷YHENSAIN eq Abram jyank mas thuq los las, Haih mau gas ngos nah vnyau vshih lyis dyei das, ge. Housoeh las nyang gas hauh joqyos mas nyang lyis thuq xoeuq dah YHENSAIN xiklyis phon ci.

⁸Hou mhayah nyang Bethel buisthuq pheh dah jing mas tyungh loh las zvng lyis Bethel buisthuq pheh, Ai dah buiswvng pheh dah vjo mas kuot. Houmha eq YHENSAIN dah xiklyis phon ci lha YHENSAIN lhyi chungh paiq.

⁹Abram tsoq dyung yenh shih las Khanan mautyi pheh loh.

¹⁰Gvshih hauh mau mas phanghkhauq gyoh los. Phanghkhauq svsoh changh yvmvyah Abram gas Egutu mau mas khau nyeis das ge e loh.

¹¹Egutu mau ni los lyis Abram gas nyah yhensain nyhiq Sarai lyis, Nvng svsoh yungh dah vmesbih nghuot zis ngos seq.

¹²Housoeh las Egutu dius nvng lyis nyvng lyis, Heika nyah yhensain nyhiq nghuot ge ngos lyis sat las, nvng lyis gas vdwis toh das.

¹³Nvng ngah nhamhmuh nghuot oen taiq aq: housoeh nah gvng mas ngos sunghhuq das, nah gvng mas ngos kang luiq das, ge.

¹⁴Abram Egutu mas jweh lyis, hauh vmesbih svsoh yungh yvlyis Egutu dius jens nyvng.

¹⁵Hwankti Pharao dah zau jens eq nyang lyis nyvng las Pharao xikkhonh mas chungh kyoh. Housoeh hauh vmesbih lyis Pharao yhen mha shwih kat dyei.

¹⁶Pharao gas hauh vmesbih phauh Abram lyis yvng, noeu, mauhlyihzoe, jyeidwis vbusbih jyeidwis vmesbih jens, luzoe zains yahge gola-u tsain dyei.

¹⁷Abram yhensain nyhiq Sarai gvng mas YHENSAIN Pharao yahge nyah yhenbang lyis yomh khyoq.

¹⁸Housoeh las Pharao gas Abram lyis khi lha, Nvng ngos lyis cha kuot? Nyang nah yhensain nyhiq nghuot zis, ngos lyis chamus ma taiq?

¹⁹Nyang lyis ngah yhensain nyhiq shwih duot bas jungh ge nvng, nyang lyis nah nhamhmuh nghuot oen chamus taiq? Gvshih hai nah yhensain nyhiq lyis shwih yoeus las loh lo aq, ge.

²⁰Pharao gas Abram cho nyah dius jens lyis vmingh dyei zis yah dvyhangteh, nyamoq gas Abram yahge nyah yhensain nyhiq lyis eq, nyang yah sen dah zisyos dvnganh yah eq mulas tsain nhang kat.