Read Achang VPOM 13 Bible Online

VPOM 13 - Achang bible

VPOM 13

¹Housoeh las Abram gas, nyang yahge nyah yhensain nyhiq, nyang yah sen dah zisyos dvnganh yah Egutu masyah thuq las Khanan mautyi pheh loh. Lot eq dvgeh nghuot.

²Abram gas gaunyhauq zisyos, ngwis xing zisyos yah svsoh dis los.

³Khanan mautyi masyah dyung loh las Bethel wuxom, Bethel yahge Ai wus jo,

⁴Cangxeih lyis nyang zvng kuot las phon ci khoq ku joqyos mas jweh loh. Abram gas houmha YHENSAIN lhyi chungh paiq.

⁵Abram yah dvgeh loh dah Lot eq yvng, shvbeq, noeu kyunk, yhenbang nyoshoq yoh las,

⁶Nyah phvtang dvjoq mas nyeis das zis joqyos zvvs goeus: khasoeh ge lyis nyah phvtang zisyos nyo yvmvyah dvjoq mas dvgeh ma yoh nyeis lo.

⁷Abram dah gaunyhauq yoeuh bang yahge Lot dah gaunyhauq yoeuh bang dyoqgoh loh. Hauh uhlyis Khanan jens, Perizi jens houmha nyeis.

⁸Housoeh las Abram gas Lot lyis, Yang gas boeklo nghuot yvmvyah ngos yahge nah vjo mas eq, ngah gaunyhauq yoeuh bang yahge nah gaunyhauq yoeuh bang jo mas eq ma dyoqgoh bas jungh.

⁹Maunyeis dvjanggyon nah xikkhonh mas joq ma nghuot lhyeh? Ngos yah gang las nyeis aq. Nvng loqwi pheh loh lyis ngos loqyos pheh, nvng loqyos pheh loh lyis ngos loqwi pheh loh das, ge.

¹⁰YHENSAIN Sodom yahge Gomora wus ma mhont shih yoq lyis, Zoar wus jweh shoq Yodan lvng yvm chank dah wuxom pa ka jeis gis las YHENSAIN dah khyam[12] teh eq, Egutu mau teh eq nghuot joq yvlyis Lot nyvng kat.

¹¹Housoeh las Lot gas hau Yodan mauxom gonh lyis khyen yoeus las buisthuq pheh thot loh zis yah nyah phvtang ganggoh loh.

¹²Abram gas Khanan mas nyeis khoq shih. Lot gas hauh wuxom pa mha dah wus mas bos nyeis las Sodom wus jweh shoq nyah zvng tsain kuot.

¹³Sodom wus mas bang gas YHENSAIN xikkhonh mas yaunos kuot bang nghuot.

¹⁴Lot Abram yah gang loh thang lhyi, YHENSAIN Abram lyis taiq zis gas, Gvshih nvng nyeis masyah buisthuq buiswvng, mautsung mautyi pheh yoeuh kat aq.

¹⁵Nvng nyvng kat maunyeis dvnganh yah, nvng yahge nah vnyau vshih lyis vcaiq vto dyei toh das.

¹⁶Ngos nah vnyau vshih lyis tsohmop teh jebais los nhang das. Dius dvyuk yuk tsohmop lyis yoh suon nghuot lyis gas nah vnyau vshih lyis yoh suon das.

¹⁷Nvng toq las hauh maunyeis xing choeu, lvm choeu suh loh aq, ngos nvng lyis dyei das, ge.

¹⁸Housoeh Abram gas nyah zvng lyis Hebron wus wons zains tsain yuk joqyos Mamre mas cheh las nyeis. Houmha YHENSAIN xiklyis phon ci dyei.