Read Achang VPOM 14 Bible Online

VPOM 14 - Achang bible

VPOM 14

¹Hauh yoq lyis Shina hwankti Amraphel, Elasa hwankti Ariok, Elam hwankti Khedolaome, Goim hwankti Tidal moq gas,

²Sodom hwankti Bera, Gomora hwankti Birsha, Adma hwankti Shinab, Zeboim hwankti Shemeber, Zoar ge Bela dah hwankti moq jes tsain zan-goh.

³Haih hwankti oeng yuk moq gas, gvshih Coh Thomh ge Sidim langhkhau mha tsain thoenk nyeis.

⁴Nyamoq gas Khedolaome lyis dvci aiq zvn phuqsoe lha, dvci somh vzvn lyis gomloeus toq.

⁵Dvci nyei vzvn lyis Khedolaome gas nyah shot pheh dah hwankti jens yah dvgeh e lha Ashterot Kainaim mas Refaim dius lyis, Ham mha Zuzim dius lyis, Shawe Kiriathaim mas Emim dius lyis zan ung.

⁶Edom boms mas nyeis dah Hor dius jens lyis eq, mhanhdyvp nvm Ela Pharan jweh shoq khat tangh tyamp.

⁷Nyamoq hou mhayah doms los las Kadesh ge Enmishaphat mas jweh lyis Amalek mau gonh lyis eq, Hazazon Tama mas nyeis Amori dius lyis eq yoh tsain zan ung.

⁸Housoeh las Sodom Gomora, Atma, Zeboim, Zoar ge Bela hwankti jens gas thuq las Sidim langhkhau mha loh zan langh.

⁹Nyamoq gas Elam hwankti Khedolaome, Goim hwankti Tidal, Shina hwankti Amraphel, Elasa hwankti Ariok jens lyis tsain thoenk zan. Housoeh hwankti nyei yuk yah oeng yuk tsain zan-goh.

¹⁰Hau Sidim langhkhau mha tsoh nhih dwang tsain joq. Houmha Sodom yahge Gomora hwankti jens phang los las hauh dwang mas tsain gyoh tyamp. Luiq los bang gas boms pheh phang loh.

¹¹Ung bang gas Sodom yahge Gomora wus mas dah zisyos dvnganh, zokho dvnganh yoeus las loh.

¹²Sodom mas nyeis, Abram dah vnoeuh lo Lot yahge nyah zisyos eq tsain yoeus loh.

¹³Hou mhayah phang luiq los soeu dvyuk gas, Hebre dius Abram lyis los taiq kyoh. Ashkol yahge Aner dah vmang, Amori dius Mamre ge soeu dah terebin zains nvm mas nyeis. Nyamoq gas Abram yah buisnoms kuot toh bang nghuot.

¹⁴Abram gas nyah vnoeuh lo nyhik loh cho xauhgyo lyis, nyah yhen mha mui toh dius somhxo dvci xet yuk shwih las Dan wus jweh shoq chank khat.

¹⁵Nyenh lyis, nyang yahge nyah jons jens vphung phung gvm zis yah zan las Damasku wus dah mautsung shot pheh Hoba wus jweh shoq chank khat.

¹⁶Housoeh nyamoq gas zan yoeus dah Lot eq, nyah zisyos eq, vmesbih jens eq, wugungs dius jens eq yoh doms tyungh shwih los.

¹⁷Abram gas Khedolaome yahge gohtoeu hwankti jens lyis ung khoq las tauh los uhlyis Sodom hwankti ka nyang lyis zes das ge, Hwankti langhkhau ge dah Shawe mas thuq e.

¹⁸Salem hwankti Melkhizedek eq ohlhyoq yahge zvbiq chi e; nyang gas nyhang thank Mangso dah phudyei soeu nghuot.

¹⁹Nyang Abram lyis shvmanh las taiq zis gas, Maukhung nyeisjvng YHENSAIN Nyhang Thank Mangso ka Abram lyis shvmanh dyei bas jungh:

²⁰Nah jeswus jens lyis nah loq mas kyauh los dah Nyhang Thank Mangso eq ngelhoq bas jungh, ge. Abram eq nyang yoh los masyah ciboms dvboms nyang lyis dyei.

²¹Sodom hwankti ka Abram lyis, Ngos lyis hauh dius tsain dyei las nvng gas zisyos yoeus aq, ge.

²²Abram Sodom hwankti lhyi taiq zis gas, Ngos Abram lyis dis nhang goeus oen nvng taiq chank ma bos bas jungh,

²³khyingshoq dvdoeus eq, thyvkoq twih dvkhvt eq nvng yoh masyah ngos cha eq ma yoeus, oen maukhung nyeisjvng YHENSAIN Nyhang Thank Mangso xikkhonh mas ngos maukhi.

²⁴Nghuot laus eq loyvm jens zo goeus zis yahge Aner, Eshko yahge Mamre pheh ngos yah dvgeh loh bang nyamoq yoh los dah zisyos gas nyamoq gvmboms yah dvyhangteh yoeus loh bas jungh, ge.