Read Achang VPOM 15 Bible Online

VPOM 15 - Achang bible

VPOM 15

¹Hauh thang lhyi Abram jyank mas nyoqnyvng masyah YHENSAIN dang jweh taiq zis gas, Abram eh vgyuk, ngos nah gos nghuot. Nvng xauh goeus dah phauh shangh cho ka kuh, ge.

²Hauh uhlyis Abram gas, YHENSAIN Mangso eh, nvng ngos lyis cha dyei das? Ngos lo ma bos, ngah yhenzis sain das soeu ka hai Damasku wus mas dah Elieza nghuot das lah?

³Tsai, Abram taiq zis gas, Yoeuh aq, nvng ngos lyis vnyau vshih ma dyei; ngah yhen ganthoq mas khoeu los soeu dvyuk gas ngah yhenzis zom das zis nghuot goeus, ge.

⁴YHENSAIN dang nyah jyank mas doms jweh zis gas, Hauh soeu ka nah yhenzis zom das soeu ma nghuot, nah gungs mas yaus soeu nyang nah yhenzis dvzom das, ge.

⁵Housoeh ge lho lha Abram lyis nghe mha shwih thuq las, Maukhung mha nghank yoeuh aq, kyi lhyi nvng yoh suon lhyi suon aq. Nah vnyau vshih eq houyah dvyhangteh nghuot das, ge.

⁶Abram gas YHENSAIN lhyi lomsjingh las YHENSAIN eq nyang lyis dan, ge lhom yoeus dyei.

⁷Nyang taiq shih zis gas, Ngos gas nvng lyis haih mau sain nhang das oen Babilon mau, Ur wus masyah shwih thuq los dah YHENSAIN nghuot, ge.

⁸Hauh uhlyis Abram gas, YHENSAIN Mangso eh, haih mau lyis sain das zis ngos khasoeh yoh seq das lah, ge.

⁹YHENSAIN ka, Somh zvn bos dah noeupon dvdoeu, somh zvn dah shvbeq zains dvdoeu, somh zvn dah yvnglus dvdoeu, khotjyauh dvdoeu yahge guzoe dvdoeu ngah xiklyis yoeus los aq, ge.

¹⁰Housoeh nyang dvnganh yoeus los las vgungs masyah aiq khyamh khyamh khwih las dvshot dvkhyamh khyamh toh. Nghoq lyis gas ma tsain khwih.

¹¹Shoh zo nghoq tsain dang gyoh los laus eq Abram khat tyamp.

¹²Buiswvng loh lyis Abram yhetmuh muih las, yoeuh aq, gyuk cho yahge mau chuot cho jweh los.

¹³Hauh uhlyis YHENSAIN Abram lyis taiq zis gas, Haih zis seq toh aq: nah vnyau vshih gas nyamoq yah ma sen dah mau mas boengh duot las hauh mau bang yah jons kuot shoeuhshih zis nyeixo zvn xauh das.

¹⁴Nyamoq lyis jons kuot dah vnyau lyis eq ngos soetuon das: hauh thang lhyi nyamoq gas zisyos nyoshoq yah tsain thuq los das.

¹⁵Nvng gas mang shoq nyeis las nyens nyens tap tap shei lha ba nyhop zis xauh das.

¹⁶Nyamoq gas nyei caiq lai thang lhyi doms los das: khasoeh ge lyis Amori dius jens dah yaunos ma nyuk los shih, ge.

¹⁷Buis wvng las chuot doengs lyis yoeuh aq, nyikhauh khyomp, nyilhyam doms thuq los las hauh shoh khyamh vjo chank yah lai loh.

¹⁸Hauh nyeih lyis YHENSAIN ka Abram yah thanghchvp chap las, Nah vnyau vshih lyis Egutu lvng masyah jeismuh lvng ge dah Uphrat lvng jweh shoq haih mau,

¹⁹Ken, Kenizi, Kadmon dius,

²⁰Hiti, Perizi, Refaim dius,

²¹Amori, Khanan, Girgashi, Yebusi dius nyeis mau dvnganh yah nah vnyau lyis dyei toh goeus, ge.