Read Achang VPOM 16 Bible Online

VPOM 16 - Achang bible

VPOM 16

¹Gvshih Abram dah yhensain nyhiq Sarai gas lo ma bos. Nghuot laus eq nyang gas Hagar ge Egutu vnyau jons nyih dvyuk yoh.

²Housoeh las Sarai gas Abram lyis, YHENSAIN ka ngos lyis lo bos das toeuh ma dyei. Housoeh las nvng ngah jons jyank mas wvng aq. Nyang masyah ngos lo yoh mvbeh, ge. Abram eq Sarai dang gyo dyei.

³Abram gas Khanan mau mas dvci zvn nyeis thang lhyi Abram dah yhensain nyhiq Sarai gas nyah jons nyih Egutu vnyau Hagar lyis nyah yhensain phoq Abram dah nyinhungh kuot.

⁴Abram gas Hagar jyank mas wvng las Hagar gas ung mha loshang chi los. Nyang nyah ung mha loshang chi los zis seq goeus ya, nyang Sarai lyis ma phauh kuot los.

⁵Housoeh las Sarai gas Abram lyis, Ngos xauh dah yau gas nah jyank mas jweh bas jungh. Ngah jons lyis nah loq mas dyei las gvshih nyang ngos lyis ma phauh ma nyang kuot. Nvng yahge ngah vjo mas YHENSAIN soetuon dyei bas jungh, ge.

⁶Abram gas Sarai lyis, Yoeuh aq, nah jons nyih gas nah loq mas bos, nvng khasoeh kuot mes kuot aq, ge. Hauh uhlyis Sarai gas nyang lyis gyvzaiq gyvnang kuot las Hagar phang thuq loh.

⁷Gvshih YHENSAIN dah loeuswons soeu dvyuk gas, Shur pheh loh cho nvm mas dah jeisthuq dwang vyvm mas nyang lyis nyvng las,

⁸Sarai dah jons nyih Hagar eh, khalhye yah thuq los? Khapheh loh nyeis lah, ge nyei. Nyang gas, Ngah yhensain Sarai jyank masyah phang los, ge.

⁹YHENSAIN dah loeuswons soeu ka, Nah yhensain jyank mas doms loh las nyah o mha gop nyeis aq, ge.

¹⁰YHENSAIN dah loeuswons soeu nyang lyis taiq shih zis gas, ngos nah vnyau vshih lyis ma yoh suon lo shoq jebais los nhang das, ge.

¹¹YHENSAIN dah loeuswons soeu tsoq taiq shih zis gas, Yoeuh aq, nvng ung mha loshang chi toh las yukgislo khoeu das, nyah nyings lyis Ishmael[13] oen nyhink dyei chah: khasoeh ge lyis nvng xauh dah shohjyen lhyi YHENSAIN gyo yoeus dyei.

¹²Nyang gas dius ye duot las yuk khanghmuh dah jes duot das. Nyang lyis yuk khanghmuh jes kuot das. Nyah vmang vnoeuh moq yah gang las nyeis das.

¹³Housoeh nyang yah jisgoh dah YHENSAIN lhyi, Nvng gas nyvng dah Mangso nghuot, ge lui. Khasoeh ge lyis ngos Mangso lhyi jyoengh nyvng las haih cho taiq das xiklyis dwis nyeis nyvng, ge.

¹⁴Hauh dang masyah dius jens gas Kadesh yahge Bered vjo mas dah jeis dwang lyis Berlahairoi ge lui.

¹⁵Hagar gas Abram lyis yukgis lo khoeu dyei las Abram eq nyang lyis Ishmael nyhink .

¹⁶Hauh uhlyis Abram gas xetci khyuk zvn bos goeus.