Read Achang VPOM 18 Bible Online

VPOM 18 - Achang bible

VPOM 18

¹Abraham gas buisjvng lyis nyah zvng khomhdwang cho mha tsung toh lyis YHENSAIN ka Mamre dah wons zains jens nvm mas nyang lyis los thuq xoeuq.

²Nyang yoeuh nyeis lyis, dius somh yuk nyah nvm mas yap joq. Nyang hauh bang lyis nyvng lyis zes das ge, zvng khomh masyah wuih thuq loh las paiq gop zis yah taiq zis gas,

³Ngah YHENSAIN eh, ngos nah xikkhonh mas nyoqnho yoh nghuot lyis gas, nah jyeidwis lyis vlai toh khoq goh.

⁴Ngos jeis dvtsiq jenh chi lyih dyei bah, khyei cheih las saiqzains khyei mha no shih geh.

⁵Ngos zonoms eq dvtsiq yoeus lyih das, housoeh daus bi lho lhyi dvloh geh: khasoeh ge lyis ngos lyis hauh jyehjuh kham yoeus bas jungh ge, namoq nah jyeidwis jyank mas jweh los, ge. Nyamoq eq, Taiq zis yah dvyhangteh kuot aq, ge.

⁶Abraham gas Sara nyeis dah zvng khau mha wuih wvng loh las sunghso mons somh pan yah ohlhyoq lvnyap lhyoq aq, ge taiq toh.

⁷Tsai, Abraham gas noeu phung mha wuih e lha noeu coeu donh lo dvdoeu e she lha nyah jyeidwis lyis dyei; hauh soeu eq lvnyap ba sat.

⁸Housoeh nauhcoeu eq, noeunauh eq shoh eq zonoms nyamoq dah xikkhonh mas loh tsain dvng dyei. Nyang eq hauh saiqzains khyei, nyamoq nvm mas yap joq lyis nyamoq tsain zo.

⁹Hauh uhlyis nyamoq gas, Nah yhensain nyhiq Sara khalhye nyeis lah, ge nyei. Nyang gas, zvng mas nyeis, ge toeuh.

¹⁰Nyamoq mas dvyuk taiq zis gas, Buisnyeis dyingh lyis[17] nah jyank mas doms jweh los das. Hauh uhlyis nah yhensain nyhiq Sara gas yukgis lo yoh das, ge. Housoeh taiq soeu dah nungsthank zvng khomh yvm mas Sara nyeis las hauh dang xauhgyo.

¹¹Gvshih Abraham yahge Sara gas nyenhkyi bos las mang goeus. Sara gas mes eq ma mus lo.

¹²Housoeh las Sara gas, Ngos mang goeus, ngah yhensain phoq eq mang goeus las ngos yoh pyo shih das lah, ge nyang gauh yis zo.

¹³Housoeh las YHENSAIN ka Abraham lyis, Sara gas, Ngos mang goeus lyis lo gis yoh shih das lhyeh, ge chamus yis.

¹⁴YHENSAIN ma yoh kuot zis cha bos. Buisnyeis dyingh lyis ngos nah jyank mas doms jweh los das las Sara gas yukgis lo yoh das, ge.

¹⁵Sara gas gyuk yvmvyah, Ngos ma yis, ge he. Hauh soeu eq, Ma nghuot, nvng yis goeus, ge.

¹⁶Hauh dius jens gas toq las Sodom pheh uh xoeu lha loh. Abraham eq nyamoq lyis chank pauq kat das ge loh.

¹⁷YHENSAIN eq, Ngos kuot das muh Abraham lyis ma taiq taiq zauh toh das lah.

¹⁸Abraham gas kuhxing lha yomzains dius nyau nghuot das. Dius dvnganh gas nyang masyah shvmanh yoh das.

¹⁹Khasoeh ge lyis Abraham lyis YHENSAIN khi yoeus las nyah cho YHENSAIN taiq toh dang yah dvyhangteh yoh nyuk los shoq YHENSAIN dah cho chank kuot nyeis las, dan cho yahge lyi bos cho lhyi yoh tyink das xiklyis Abraham gas nyah lo jens yahge nyah yhenbang lyis nyah thang chank nyeis bas jungh ge, nyang taiq das zis ngos seq, ge.

²⁰Tsai, YHENSAIN ka, Sodom yahge Gomora wus dah ma gis cho hoeuh zis svsoh kuh, nyamoq dah yaunos eq svsoh nyo las,

²¹Gvshih ngos gyoh loh las, ngah jyank mas bangh los zis yah dvyhangteh nyamoq jyoengh kuot ma kuot yoeuh das; ma kuot lyis eq ngos seq das, ge.

²²Gvshih hauh bang hou mhayah nungs phuk las Sodom shot pheh loh. Hauh uhlyis Abraham gas YHENSAIN xikkhonh mas yap joq shih.

²³Abraham gas vnvm mas loh las taiq zis gas, Dan bang lyis lhung bang yah dvgeh jyoengh mhont lo das lhyeh?

²⁴Hauh wus mas dah dan bang oengci nyeis mvbeh; hauh dan bang oengci gvng mas hauh wus lyis ma mhont mhont ma yoh lhuiq toh das lah?

²⁵Dan bang lyis lhung bang yah dvgeh sat das zis yahge dan bang lyis lhung bang xauh teh xauh nhang das zis gas nvng yah we loh bas jungh: nyeisjvng soetuon soeu ka lyi bos khyvlyis tuon das ma nghuot lhyeh, ge.

²⁶Housoeh las YHENSAIN ka, Sodom wus vkhau mha dan bang oengci xo nyvng nghuot lyis gas, hauh bang gvng mas hau dvwus gonh lyis lhuiq kat das, ge.

²⁷Abraham phuk taiq zis gas, Yoeuh aq, ngos tsohmop yahge nyiyvp teh dvnghuot, nghuot laus eq ngos nvng YHENSAIN lhyi womh taiq.

²⁸Dan bang oengci o mha oeng yuk yomh joq mvbeh; oeng yuk yomh gvng mas wus gonh lyis mhont das lah, ge nyei. YHENSAIN toeuh zis gas, Hauh wus mas ngos nyeici oeng yuk xo nyvng lyis gas hauh wus lyis ma mhont das, ge.

²⁹Abraham gas, Nvng hauh wus mas nyeici yuk xo nyvng mvbeh, ge lyis nyang gas, Ngos hauh nyeici gvng mas ma mhont das, ge.

³⁰Abraham gas, YHENSAIN eh, nhaiq vgyo yo, ngos taiq shih bah, hauh wus mas nvng somhci xo nyvng mvbeh, ge lyis nyang gas, Somhci yuk xo nyvng nghuot lyis ma mhont das, ge.

³¹Abraham gas, Ngos taiq shih bah; Hauh wus mas aiqci yuk xo nyvng shih das mvbeh, doms ge. Nyang taiq, Hauh aiqci yuk gvng mas ngos ma mhont das, ge.

³²Abraham gas, YHENSAIN eh, nhaiq vjenh yo, hai dvlhain kyingh jenh taiq shih bah; hauh wus mas dvci yuk xo nyvng mvbeh, ge. Nyang gas, Ngos hauh dvci yuk gvng mas ma mhont das, ge.

³³YHENSAIN ka Abraham yah dye taiq goh lyis loh lo: Abraham eq nyah joqyos pheh tauh loh.