Read Achang VPOM 2 Bible Online

VPOM 2 - Achang bible

VPOM 2

¹Housoeh maukhung nyeisjvng yahge nyamoq dah somtung somxo lhyi dye gvnkhanh goeus.

²Nyhet vnyeih lyis Mangso ka nyah muh lyis dye kuot. Housoeh las nyhet vnyeih lyis nyang nyah muh dvnganh masyah no.

³Mangso ka hau nyhet vnyeih lyis shvmanh las gyingshang nhang. Khasoeh ge lyis Mangso ka, nyang gvnkhanh muh dvnganh dye las hauh nyeih lyis no.

⁴Heika maukhung nyeisjvng khasoeh gvnkhanh dah sungson nghuot. YHENSAIN [1] Mangso maukhung yahge nyeisjvng lyis gvnkhanh uhlyis,

⁵nyeisjvng thoq mas saiq, mhanh ma yuk thuq los shih las, xoh ja tsungh ja eq ma yuk shih. Khasoeh ge lyis YHENSAIN Mangso ka nyeisjvng thoq mas mau ma wus nhang shih; nyeisjvng mas muh zwi das dius eq ma nyeis shih.

⁶Nghuot laus eq nyeisjvng masyah thuq dah jeis yah nyeisjvng gonh lyis jyweq nhang.

⁷YHENSAIN Mangso ka nyeisjvng[2] mas dah tsoh mons yah dius vbusbih vzwvng kuot las nyah nho mha kang soq muot kat dyei lyis hauh dius gas kang bos soeu bweh los.

⁸Gvshih YHENSAIN Mangso ka, buisthuq shot pheh Eden mas khyam dvkoeuq ba tsungh toh. Houmha nyang kuot toh dah dius lyis nyhei toh.

⁹YHENSAIN Mangso ka saiqzains vja ja lyis tsoh masyah yuk los nhang. Hauh saiqzains goeu gas nyoqjeih xiklyis yoeuh omes phoh zis yahge zo gis phoh zis tsain nghuot. Khyam gungs mas kang dwis nhang saiqzains yahge gis gang seq nhang dah saiqzains tsain yuk joq.[3]

¹⁰Hauh khyam lhyi jyweq nhang das xiklyis Eden masyah jeismuh dvlvng yaus thuq los. Hou mhayah jeis nyei lvng yaus gang thuq loh.

¹¹Cangxeih vlvng dah nyings gas Pishon nghuot. Hauh jeis lvng gas xing bos dah Hawila mau chank yah yaus lhaink loh.

¹²Hauh mau mas dah xing ka gis. Saiqxangh yahge phauhdap Onik luk eq joq.

¹³Aiq vlvng dah nyings gas Gihon nghuot: Houka Khush[4] mau chank yah yaus lhaink loh.

¹⁴Somh vlvng dah nyings gas Tigri nghuot; houka Asiria mau dah buisthuq pheh yaus loh. Nyei vlvng gas Uphrat nghuot.

¹⁵YHENSAIN Mangso ka hauh vbusbih lyis shwih yoeus las Eden khyam mha muh zwi das xiklyis eq dyangh das xiklyis eq nyhei toh.

¹⁶YHENSAIN Mangso hauh dius lyis tying toh zis gas, Nvng hauh khyam mha bos shihzains dvnganh mas zis yoh zo.

¹⁷Nghuot laus eq gis gang seq das dah vzains mas zis nvng ma gis zo: Khasoeh ge lyis nvng hauh zis zo nyeih lyis nvng jyoengh shei das, ge.

¹⁸YHENSAIN Mangso ka, Vbusbih gas nyang dvyuk kyingh nyeis das zis gas ma gis, ngos nyah xiklyis nyang yah phi dah pangh soeu lhyi kuot das, ge.

¹⁹Gvshih YHENSAIN Mangso ka, mhanhdyvp mas dah yewus yahge dang dah nghoq dvnganh lyis tsoh yah kuot las nyamoq lyis yoeuh las nyings nyhink dyei das xiklyis hauh vbusbih jyank mas shwih los. Dwis ya dwis zis dvnganh gas hauh dius nyhink dyei zis yah dvyhangteh nyings tsain yoh.

²⁰Housoeh dius gas gaunyhauq dvnganh, dang dah nghoq yahge mhanhdyvp yewus dvnganh lyis nyings nyhink dyei. Nghuot laus eq Adam nyhenshang nyang yah phi dah pangh soeu ma bos shih.

²¹Housoeh las YHENSAIN Mangso ka vbusbih lyis yhet muh muih nhang lha, nyang yhet joq. Hauh uhlyis nyah nvm yau dvkhvt she lho lha, hauh joqyos mas shoh yah tyink dyei.

²²YHENSAIN Mangso ka hauh vbusbih masyah yoeus dah nvm yah vmesbih dvyuk kuot las, nyang lyis hau vbusbih jyank mas shwih los dyei.

²³Hauh vbusbih taiq zis gas, Gvshih heika ngah shohyau mas dah shohyau, ngah shoh mas dah shoh nghuot. Housoeh las nyang lyis vmesbih oen das: khasoeh ge lyis, nyang gas vbusbih masyah yoeus thuq zis nghuot.[5]

²⁴Hauh gvng mas vbusbih gas nyah ungwes uwus lyis toh khoq las nyah yhensain nyhiq yah xonh zis yah nyah zomh gas dvsuih dvshoh bweh los.

²⁵Hauh dius yahge nyah yhensain nyhiq gas shohchen nghuot laus eq nyah aiq yuk ma xoq.