Read Achang VPOM 21 Bible Online

VPOM 21 - Achang bible

VPOM 21

¹Hauh thang lhyi YHENSAIN ka nyang taiq toh zis yah dvyhangteh Sara lyis gis zis kuot dyei, nyah dangthoengh bos vgus nyang lyis shvmanh dyei las,

²nyang ung mha loshang chi los las Abraham lyis Mangso nyang lyis taiq toh dah shishenh, mang thang lhyi nyah xiklyis yukgis lo khoeu dyei.

³Abraham eq nyah xiklyis Sara khoeu dyei dah loshang lhyi Isak ge nyhink.

⁴Abraham ka Mangso taiq toh vgus, nyah lo Isak lyis xet vnyeih lyis vthyoh tyomh dyei.

⁵Abraham ka nyah lo, Isak khoeu uhlyis dvxo zvn bos goeus.

⁶Sara gas Mangso ngos lyis gaus nhang goeus, haih loeus xauhgyo bang eq ngos yah dvgeh gaus das, ge.

⁷Nyang taiq shih zis gas, Sara gas lo nauh gvmshuk das ge Abraham lyis hank taiq ku das lah? Khasoeh ge lyis nyang mang thang lhyi ngos nyang lyis lo dvkhoeu dyei, ge.

⁸Loshang Isak eq kuh los las nauh kangh dyei. Isak lyis nauh kangh nyeih lyis Abraham gas pwe zainsmuh kuot.

⁹Gvshih Egutu vmesbih Hagar masyah Abraham yoh dah yukgis lo gas Isak lyis jwangh nyhap nyeis yvlyis Sara nyvng.

¹⁰Housoeh yvmvyah nyang gas Abraham lyis, Haih jyeidwis metang lhyi khat tyamp aq. Haih jyeidwis nyih dah lo gas ngah lo Isak yah dvgeh yhenzis xauh kham yoeus das zis ma nghuot, ge.

¹¹Abraham gas nyah lo nghuot yvmvyah hauh cho lhyi nghamh yau nyeis.

¹²Nghuot laus eq Mangso Abraham lyis taiq zis gas, Hau nah loloeu Ishmael yahge nah jyeidwis Hagar xiklyis vchiq, Sara nvng lyis taiq ya taiq zis gyo aq: khasoeh ge lyis nah xiklyis vnyau vshih gas Isak masyah gyoh das.

¹³Hauh yukgis lo eq nah vnyau vshih nghuot yvmvyah, nyang lyis eq ngos dius dvnyau bweh nhang das, ge.

¹⁴Abraham gas noq yah toq las ohlhyoq yahge jeistyvp yoeus las Hagar dah kvtoq mas kih dyei thang lhyi lo eq shwih dyei las nhang kat. Hagar eq thuq las Besheba mhanhdyvp mas suh whang yenh.

¹⁵Jeistyvp mas jeis thank thang lhyi, lo lyis mhanhgyomh khau mha toh khoq las,

¹⁶Loshang shei yvlyis ngos ma mes nyvng, ge uhjyangh lyei dvbaiq ko loh las loshang jyank pheh xoeu tsung lha kaiq ngaus.

¹⁷Mangso ka hauh loshang ngaus thwe xauhgyo. Housoeh las Mangso dah loeuswons dvyuk Hagar lyis maukhung mhayah lui las taiq zis gas, Hagar eh, nvng cha chah nyeis? Vchiq, hau loshang ngaus thwe Mangso xauhgyo.

¹⁸Toq aq, loshang lhyi loq yah toeu aq. Ngos nyang lyis dius nyau kuh dvnyau bweh nhang das, ge.

¹⁹Hauh thoq lyis Mangso nyang lyis nyoq phank dyei las nyang jeisdwang dvkoeuq nyvng. Housoeh las nyang jeistyvp tyink las loshang lyis shuk nhang.

²⁰Hauh loshang bes los zis yah dvyhangteh Mangso eq nyang yah dvgeh nghuot. Nyang gas mhanhdyvp mas nyeis las shoh baiq soeu bweh los.

²¹Nyang gas Paran mhanhdyvp mas nyeis las nyah ungwes eq Egutu lonyi dvyuk yoeus dyei.

²²Hauh shishenh gyo lyis Abimelek yahge nyah jeszau Phikol Abraham lyis taiq zis gas, Nvng kuot loh cho khanghmuh mas Mangso nvng yah dvgeh nyeis.

²³Housoeh las ngos lyis eq, ngah locaiq ehchen lyis eq nvng ma jus khyvlyis ma kuot, ngos nvng lyis jyetdap sainhnos xoeuq teh, ngos lyis eq gvshih nvng khau nyeis, ngah dius jens lyis eq jyehjuh chixoeuq das oen, nvng gvshih heimha Mangso lhyi maukhi aq, ge.

²⁴Abraham eq, Nghuot goeus, ngos maukhi das, ge toeuh.

²⁵Abraham gas Abimelek dah jyeidwis jens lhuot loh dah jeis dwang cho Abimelek lyis yaus.

²⁶Abimelek taiq zis gas, Hau hank kuot zis ngos ma seq, nvng eq ngos lyis ma taiq kyoh, ngos eq khvnyhik jweh shoq ma xauhgyo, ge.

²⁷Hauh uhlyis Abraham gas Abimelek lyis yvng yahge noeu dyei las nyah aiq yuk dang thanghchvp tsain toh.

²⁸Abraham gas yvng phung mha dah yvngmuh nyhet doeu kangh toh.

²⁹Abimelek eq, Hai kangh toh dah yvngmuh lo nyhet doeu gas khasoeh nghuot, ge Abraham lyis nyei.

³⁰Abraham toeuh zis gas, Haih jeisdwang cho, ngah shot pheh kanghjyoeng duot das xiklyis nvng haih yvngmuh lo nyhet doeu ngah loq masyah lhom yoeus aq, ge.

³¹Houmha nyah aiq yuk mau tsain khi yvmvyah hauh joqyos lyis Besheba[21] ge nyhink.

³²Housoeh nyah aiq yuk Besheba mas dang thanghchvp tsain toh. Hauh thang lhyi Abimelek yahge nyah jeszau Phikol moq gas Philisti mau pheh loh lo.

³³Abraham gas Besheba mas mvgyengs zains tsungh las hauh yvmas YHENSAIN vcaiq vto nyeis Mangso lhyi chungh paiq.

³⁴Housoeh Abraham gas Philisti mau mas nyangh shoq nyeis khoq.