Read Achang VPOM 22 Bible Online

VPOM 22 - Achang bible

VPOM 22

¹Hauh zis tsain dye thang lhyi Mangso ka Abraham lyis shi yoeuh das ge, Abraham eh, ge lui, Nyang gas, Heimha nyeis, ge toeuh.

²Mangso ka, Nvng jyetdap dah nah loloeu loteh Isak lyis shwih las Moria mau mas loh aq. Ngos nvng lyis shet das boms mas nyang lyis lomhxangh kuot las ngos lyis phudyei aq, ge.

³Housoeh las Abraham gas noq yah mauhlyihzoe tu toq zwis, ngheq dyei das thangh dye ba wons lyis nyah lo Isak yahge jyeidwis aiq yuk shwih las, Mangso nyang lyis taiq dah boms pheh loh.

⁴Somh vnyeih, Abraham nghank yoeuh kat lyis hauh joqyos lyis we masyah nyvng kat.

⁵Abraham gas jyeidwis vzomh lyis, Nah aiq yuk heimha mauhlyihzoe yah dvgeh nyeis langh geh; ngah phvtang thyimha loh paiq khoq bah; dye lyis nah aiq yuk jyank mas tauh los das, ge taiq khoq.

⁶Housoeh Abraham gas ngheq dyei das thangh yoeus las lo Isak lyis huon, nyi yahge sham ka nyah loq mas chi lha nyah phvtang dvgeh doq loh.

⁷Doq loh nyeis lyis Isak gas nyah uwus Abraham lyis, Uwus eh, ge. Uwus eq, Alo eh, ge toeuh. Isak gas, Yoeuh aq, thangh eq nyi eq yoh toh, ngheq dyei das yvnglo khalhye neh, ge nyei.

⁸Abraham gas, Alo eh, ngheq dyei das yvnglo gas Mangso nyah xiklyis nyang sont toh das, ge. Housoeh nyah phvtang dvgeh doq loh.

⁹Nyah phvtang ka Mangso taiq dah joqyos mas jweh las, Abraham houmha phon kuot las thangh dye kih jam lyis, nyah lo Isak lyis twih lho lha phon, thangh thoq mas kih toh.

¹⁰Gvshih Abraham nyah loq toeu lha lo lyis sat das ge sham yoeus chi.

¹¹Hauh uhlyis YHENSAIN dah loeuswons soeu ka, maukhung mhayah Abraham, Abraham, ge lui. Nyang eq, Ngos nyeis, ge toeuh.

¹²Loeuswons soeu taiq zis gas, Nah loq hauh loshang lhyi vzangh, cha eq vkuot, ngah jyank masyah yoh dah nah loloeu loteh ngos lyis dyei das zis ma yu yvmvyah, nvng Mangso lhyi gyukwoms zis gas gvshih ngos seq goeus, ge.

¹³Housoeh Abraham yoeuh kat lyis, yoeuh aq, nyah nungsthank mas yvnglus dvdoeu mhanhgyomh mas khyau mhayah nyih joq yvlyis nyvng. Housoeh las Abraham hauh yvnglus e she lha nyah lo dah gungsthaiq kuot.

¹⁴Housoeh yvmvyah Abraham gas hauh joqyos lyis,YHENSAIN dyei, ge nyhink. Khvnyhik jweh shoq YHENSAIN dah boms mas sont toh dyei das, ge tsain taiq.

¹⁵YHENSAIN dah loeuswons soeu maukhung mhayah Abraham lyis aiq vlhain lui las,

¹⁶Ngos YHENSAIN ngvnyang nyings mas maukhi zis gas, Hai nvng kuot dah cho yahge nah loloeu loteh lyis ma yu yvmvyah,

¹⁷Ngos nvng lyis magons magoh shvmanh dyei das. Ngos nah vnyau vshih lyis maukhung mha kyi yahge thomh yvm mas dah sihsho teh jebais los nhang das las, nah vnyau vshih gas nyamoq dah jeswus lyis ung lha yoh sain das.

¹⁸Hauh thoq lyis nvng ngos taiq domsyos gyo yvmvyah, nah vnyau vshih gvng mas nyeisjvng thoq mas dius nyau dvnganh gas shvmanh yoh das, ge.

¹⁹Abraham gas nyah jyeidwis tang jyank mas tauh loh las Besheba pheh dvgeh tsain loh. Abraham Besheba mas nyeis.

²⁰Haih cho dye bweh thang lhyi Abraham lyis taiq los dang gas, Yoeuh aq, Nah vnoeuh Nahor dah yhensain nyhiq Milkha eq loshang bos goeus, ge.

²¹Hauh bang gas loxeih Uza, vnoeuh Buza, Aram dah uwus Kemuel,

²²Kheset, Hazo, Pildash, Yidlap, Bethuel nghuot.

²³Bethuel gungs mas yaus zis Rebeka nghuot. Hau xet yuk moq gas Abraham dah vnoeuh Nahor dah yhensain nyhiq Milkha khoeu kat bang nghuot.

²⁴Nyah nyinhungh Reuma eq Teba, Gaham, Tahash, Makha moq lyis khoeu kat.