Read Achang VPOM 24 Bible Online

VPOM 24 - Achang bible

VPOM 24

¹YHENSAIN ka Abraham lyis cho khat khanghmuh mas shvmanh dyei goeus. Gvshih nyang svsoh mang goeus.

²Housoeh las Abraham gas, nyah yhen mha nyenhkyi zes kuh las nyah zisyos dvnganh lyis yoeuh dah jyeidwis lyis khi yoeus las, Gvshih nah loq ngah tanghbauh jo mas jauh kat[22] aq.

³Ngah lo lyis ngos nyeis mau Khanan lonyi ma yoeus dyei das xiklyis YHENSAIN maukhung nyeisjvng Mangso mha ngos nvng lyis maukhi nhang das.

⁴Housoeh nvng ngah mau, ngah vnyau jyank mas loh las ngah lo Isak lyis yhensain nyhiq yoeus dyei aq.

⁵Housoeh jyeidwis gas, Hauh nyelo haih mau mas ma mes chank los nghuot lyis ngos nah loloeu lyis nvng thuq khoq mau mas yoh doms shwih tauh loh das lhyeh, ge toeuh.

⁶Abraham gas, Ngah loloeu lyis houmha ma doms shwih loh das xiklyis zaih aq.

⁷Ngos lyis ngah uwus yhenbang, buisnoms jens, choq thyet mau masyah shwih yoeus las ngos lyis tsoq las nah vnyau vshih lyis ngos haih mau dyei das, ge ngos lyis maukhi lha taiq soeu, YHENSAIN, maukhung Mangso ka nyah loeuswons nah xik mas nhang das las, ngah loloeu xiklyis nvng houmha dah lonyi xauh yoeus dyei das.

⁸Hauh nyelo nah thang mha ma chank los nghuot lyis gas, gvshih ngos nvng lyis maukhi nhang cho mhayah nvng luiq bas jungh. Nghuot laus eq nvng ngah lo lyis houmha ma doms yoh shwih loh, ge.

⁹Housoeh las jyeidwis gas, nyah yhensain Abraham dah tanghbauh jo mas loq jauh kat las maukhi toh.

¹⁰Hauh thang lhyi hauh jyeidwis gas, nyah yhensain dah gola-u kyunk masyah dvci doeu tu huon lha thuq loh. Nyah yhensain dah whot eq nyang wons las Mesopotamia mau Nahor wus mas jweh loh.

¹¹Nyang gas nyenhthang zoh, nyelo jens jeis kham yoq lyis, wus nghe jeisdwang yvm mas gola-u jens lyis tsain whop nhang lha nyeis.

¹²Housoeh nyang gas, YHENSAIN ngah yhensain Abraham dah Mangso eh, ngah yhensain Abraham lyis nhaiqnyen shohgyo das zis khvnyhik haih cho bweh nhang aq.

¹³Yoeuh aq, ngos haih jeisdwang nvm mas yap joq. Haih wus mas dah lonyi jens jeis kham das ge lyih das.

¹⁴Hauh uhlyis nah jeis jywang khyoq las ngos lyis jeis dvtsiq gvmshuk aq, oen sang lhyi, Shuk aq nah gola-u lyis eq ngos kham dyei bah, ge taiq los dah lonyi gas nah jyeidwis Isak xiklyis sont toh lonyi nghuot bas jungh: housoeh lyis nvng ngah yhensain lhyi jyetdap sainhnos cho chixoeuq yvlyis ngos yoh seq das, ge dung.

¹⁵Hauh dangzoh ma doms shih lyis yoeuh aq, Abraham dah vnoeuh Nahor vzomh Milkha dah lo Bethuel lonyi Rebeka gas jeis jywang wuq las lyih nyeis.

¹⁶Hauh nyelo gas svsoh yungh las lonyi gyingh nghuot. Nyang gas jeisdwang mas nyah jywang mha jeis e tyink lho lha doq los.

¹⁷Hauh uhlyis jyeidwis gas nyah jyank mas wuih e lha, Nah jywang mha dah jeis dvtsiq jenh gvmshuk aq, ge sang.

¹⁸Hauh lonyi eq, Shuk aq yhensain eh, ge nyah kvthoq masyah jywang dvtsiq lvnyap khyoq las gvmshuk.

¹⁹Nyang lyis dye gvmshuk lyis, Ngos nah gola-u lyis eq jo shoq tsain kham gvmshuk bah, ge las,

²⁰jywang mha jeis, lang mas lvnyap nghat kat las gola-u dvnganh dah xiklyis jeisdwang mas jeis e doms wuih kham nyeis.

²¹Hauh soeu eq YHENSAIN ka nyah muh ung nhang zis nghuot ma nghuot yoh seq shoq nyang lyis samlo yoeuh nyeis.

²²Gola-u jeis dye tsain shuk thang lhyi hauh soeu ka nyelo xiklyis shekel dvkhyamh ko lyei dah xing nhodangh yahge shekel dvci ko lyei dah xing thoengh dvzomh lap las,

²³Nvng hank lonyi nghuot, ngos lyis jenh taiq kyoh aq; nah phvbih yhen mha ngamoq thoenggus vbos lah, ge.

²⁴Nyang gas, Nahor vzomh Milkha dah loloeu Bethuel lonyi nghuot, ge.

²⁵Tsoq las, Ngamoq yhen mha huhyau yahge gaunyhauq zos nyoshoq joq, thoenggus eq bos, ge.

²⁶Hauh soeu ka gop las YHENSAIN lhyi paiq zoh lyis,

²⁷Nyah jyetdap sainhnos ehnyet yahge jyoeng dah ehnyet ngah yhensain jyank masyah ma yoeus tyamp dah, YHENSAIN, ngah yhensain Abraham dah Mangso ka ngelhoq bas jungh: ngos lyis eq ngah yhensain dah buisnoms yhen mha YHENSAIN shwih tuonh shet goeus, ge.

²⁸Hauh nyelo gas yhen mha wuih loh las hauh cho dvnganh nyah ungwes mebih lyis taiq kyoh.

²⁹Rebeka mas Laban ge mungs dvyuk bos. Laban eq jeisdwang mas hauh soeu jyank pheh wuih e.

³⁰Laban gas nyah nhamhmuh jyank mas dah xing nhodangh yahge thoengh zomh eq nyvng. Hauh soeu ngos lyis housoeh ge, ge dah Rebeka dang lyis xauhgyo gvng mas nyang thuq e yoeuh lyis, yoeuh aq, hauh soeu ka jeisdwang nvm, gola-u yvm mas yap joq.

³¹Nyang taiq zis gas, YHENSAIN mha ngelhoq soeu eh, wvng los aq, chamus nghe mha yap joq? Ngos joqyos sont toh, gola-u lhunk das joqyos eq bos, ge.

³²Housoeh las hauh soeu ka yhen mha wvng las gola-u tu tsain khyoq. Yhensain moq eq huhyau yahge gola-u zos tsain dyei. Nyang yahge nyang yah dvgeh bang dah khyei cheih das zis jeis eq dyei.

³³Nyah xikkhonh mas zo das wom eq chi los dyei, nghuot laus eq nyang gas, ngos taiq chah zis ma yoh dye taiq lyis ngos wom ma zo das, ge. Laban eq, Taiq aq, ge.

³⁴Hauh uhlyis nyang gas, Ngos Abraham jyeidwis nghuot.

³⁵YHENSAIN ka ngah yhensain lhyi svsoh shvmanh dyei las nyang dis nyeis: yvng phung, noeu phung, ngwis xing, gola-u, mauhlyihzoe yahge jyeidwis vbusbih vmesbih jens nyoshoq nghuot.

³⁶Ngah yhensain Abraham dah yhensain nyhiq Sara gas nyenhkyi kuh thang lhyi ngah yhensain xiklyis yukgis lo khoeu dyei las Abraham gas nyang yoh ya yoh zis dvnganh lo lyis dyei goeus.

³⁷Ngah yhensain ka, Ngos khau nyeis, Khanan mau mas lonyi jens masyah nvng ngah lo xiklyis yhensain nyhiq ma yoeus dyei dyei,

³⁸ngah uwus yhen yahge ngah vnyau jyank mas wvng loh las ngah lo xiklyis nyi yoh yoeus dyei das, ge ngos lyis maukhi nhang.

³⁹Ngos gas, hauh nyelo ngos yah ma mes chank los mvbeh, oen ngah yhensain lhyi taiq goeus.

⁴⁰Nghuot laus eq nyang gas, Ngos phuqsoe nyeis dah YHENSAIN ka nyah loeuswons soeu nvng yah dvgeh nhang kat las, nvng loh cho ung nhang lha ngah vnyau ngah uwus yhen mhayah nvng ngah lo xiklyis nyi yoh yoeus dyei das.

⁴¹Nvng ngah vnyau yhen mha jweh goeus ya, nvng hai ngah khonh masyah luiq bas jungh. Nyamoq nvng lyis lonyi ma dyei kat laus eq nvng ngah khonh masyah luiq das, ge kat.

⁴²Housoeh las khvnyhik ngos haih jeisdwang nvm mas jweh las, YHENSAIN lhyi, ngah yhensain Abraham dah Mangso eh, hai ngos suh e cho nvng shvmanh dyei nghuot lyis gas,

⁴³ngos hai jeisdwang nvm mas yap joq; heimha jeis kham lyih dah lonyi dvyuk yuk lyis, ngos lyis nah jeis jywang mha jeis dvtsiq jenh gvmshuk aq, oen lhyi,

⁴⁴Shuk aq, nah gola-u lyis eq kham gvmshuk bah, ge ngos lyis toeuh dah nyelo gas, ngah yhensain dah lo xiklyis nvng YHENSAIN sont toh dyei lonyi nghuot bas jungh, oen dung.

⁴⁵Ngah ehnyet mas housoeh taiq yangh ma dye taiq shih lyis Rebeka gas jywang wuq las jeisdwang mas jeis lyih kham. Hauh uhlyis ngos gas, Jeis dvtsiq gvmshuk aq, oen sang.

⁴⁶Nyang eq jeis-jywang kvthoq masyah lvnyap khyoq las, Shuk aq, nah gola-u lyis eq ngos tsain gvmshuk das, ge. Housoeh las ngos eq shuk, gola-u lyis eq nyang tsain kham gvmshuk.

⁴⁷Hauh uhlyis ngos gas nyang lyis, Nvng hank lonyi nghuot lah, oen nyei. Nyang gas, Nahor lhyi Milkha khoeu dyei loloeu Bethuel dah lonyi nghuot, ge. Housoeh ngos hauh xing nhodangh nyah nho mha lhangh dyei, thoengh zomh eq loq mas gvmhuot.

⁴⁸Hauh uhlyis ngos gop las YHENSAIN lhyi paiq: ngah yhensain vnoeuh dah nyeilo lyis, ngah yhensain dah doeusmuh yoh shoq ngos lyis cho dan cho shwih los, YHENSAIN, ngah yhensain Abraham dah Mangso lhyi ngos chungh.

⁴⁹Housoeh las gvshih ngos khasoeh kuot das zis seq shoq, ngah yhensain lhyi namoq jyehjuh yah jyoeng cho chixoeuq das ma chixoeuq das zis gas taiq yoeuh geh, ge.

⁵⁰Laban phvtang Bethuel gas, Haih cho ka YHENSAIN sont zis nghuot, ngah phvtang ka nvng lyis cha ma taiq lo noh.

⁵¹Yoeuh aq, Rebeka gas nah xikkhonh mas nghuot, nyang lyis shwih loh aq, YHENSAIN dah dang yah dvyhangteh nyang nah yhensain dah doeusmuh duot bas jungh, ge.

⁵²Abraham dah jyeidwis hauh dang xauhgyo lyis, YHENSAIN xikkhonh mas nyeisjvng mas jweh shoq paiq.

⁵³Tsai, hauh jyeidwis gas ngwis yah kuot dah shunkzis, xing yah kuot dah shunkzis yahge dyimis lap las Rebeka lyis dyei, Nyah ungwes metang nyah mungs lyis eq phauhdap zis vja ja dyei.

⁵⁴Hauh thang lhyi nyang yahge nyah thang mha chank los bang zo shuk las hauh nyenh ku. Nungsnvp toq los lyis nyang gas, Gvshih ngah yhensain jyank pheh ngos lyis pont kat geh, ge.

⁵⁵Nyah ungwes metang nyah mungs gas, Haih nyelo ngamoq yah dvci nyeih ko nyeis shih bas jungh; housoeh las chank loh bas jungh, ge.

⁵⁶Hauh soeu ka, Ngos lyis vtsain sheq toh lo; ngos suh cho lhyi YHENSAIN shvmanh dyei goeus; ngah yhensain jyank mas lvnyap doms jweh loh bas jungh, ngos lyis pont kat geh, ge.

⁵⁷Nyah metang ka, Housoeh lyis gas nyelo lyis khi yoeus las nyei yoeuh shih bah, ge.

⁵⁸Housoeh nyah metang ka Rebeka lhyi khi lha, Nvng haih soeu yah vmes chank loh lah, ge nyei lyis, Nyang gas, Chank loh das, ge.

⁵⁹Housoeh las nyamoq gas nyamoq dah nhamhmuh lonyi Rebeka yahge nyang lyis bau kat soeu lhyi eq, Abraham dah jyeidwis yahge nyang yah dvgeh los bang lyis pont kat.

⁶⁰Nyah metang ka Rebeka lyis, Nhamhmuh lonyi eh, nvng gas dius mons mons sens sens ungwes bweh los bas jungh; nah vnyau vshih gas nyamoq dah jeswus lyis ung lha xauh sain bas jungh, ge shvmanh dyei kat.

⁶¹Hauh thang lhyi Rebeka yahge nyang lyis bau kat soeu yahge gohtoeu vmesbih jens eq hauh soeu yah bos loh. Housoeh jyeidwis gas Rebeka lhyi shwih loh.

⁶²Gvshih Isak gas Khanan mautyi pheh nyeis yvmvyah nyang Berlahairoi masyah tauh jweh los.

⁶³Isak gas, nyenhthang zoh lyis jangpa pheh nghamh yoeuh das ge thuq loh. Nyang yoeuh kat lyis, yoeuh aq, gola-u tsain los nyeis yvlyis nyvng.

⁶⁴Rebeka eq yoeuh kat lyis Isak lyis nyvng lyis gola-u masyah gyoh las,

⁶⁵Abraham dah jyeidwis lyis, Pa mhayah yang lyis zes das ge yah jyank pheh los nyeis soeu ka hank nghuot lah, ge nyei. Jyeidwis eq, Nyang ngah yhensain nghuot ge lyis nyang gas nyoq nghop yoeus las nyah nyoqnho nghop.

⁶⁶Jyeidwis eq nyang kuot cho dvnganh Isak lyis taiq kyoh.

⁶⁷Isak gas Rebeka lyis nyah ungwes Sara nyeis khoq dah zvng mas shwih hwank kat las nyang nyah yhensain nyhiq bweh los. Isak gas nyang lyis jyetdap las nyah ungwes shei yvlyis nhaiq yoh taink.