Read Achang VPOM 25 Bible Online

VPOM 25 - Achang bible

VPOM 25

¹Abraham gas Ketura ge soeu lhyi eq phoengh hwank.

²Nyang gas Abraham lyis Zimran, Yokshan, Medan, Midian, Ishbak, Shua moq khoeu dyei.

³Yokshan mas yaus zis Sheba yahge Deban. Deban dah Loloeu jens gas Ashuri Letushim, Leumim nghuot.

⁴Midian dah loloeu jens gas, Epha, Epher, Hanok, Abida yahge Elda nghuot. Haih bang dvnganh gas Ketura dah vnyau vshih jens nghuot.

⁵Abraham gas nyang yoh zis dvnganh Isak lyis dyei.

⁶Nyinhungh lo jens lyis eq, Abraham nyang nyeis shih lyis jyungshuk gvm dyei las, nyah lo Isak jyank masyah buisthuq shot pheh nhang kat.

⁷Abraham kang dwis nyeis khoq dah zvn gas dvxo nyhetci oeng zvn nghuot.

⁸Abraham gas nyenhkyi bos, mang las shei loh. Housoeh nyang gas nyah dius jens nyeis yvmas jweh loh.

⁹Nyang lyis nyah loloeu tang Isak yahge Ishmael gas Mamre pheh xoeu toh, Hiti dius Zohar lo Ephron maunyeis mas bos dah Makpela lukkhyung mha ba nyhop.

¹⁰Houka Hiti jens jyank masyah Abraham wis toh zis nghuot. Abraham yahge nyah yhensain nyhiq Sara lyis houmha dvgeh nyhop.

¹¹Abraham shei thang lhyi nyah lo Isak lyis Mangso shvmanh dyei. Isak gas Berlahairoi mas nyeis.

¹²Heika Sara dah jyeidwis Egutu lonyi Hagar Abraham lyis khoeu dyei dah loloeu Ishmael, dah loloeu jens vzoh yah dyei toh.

¹³Ishmael dah loloeu jens vzoh yah nghuot. Nebaiot, Kedar, Adbel, Mibsam,

¹⁴Mishma, Duma, Masa,

¹⁵Hadad, Tema, Yetu, Naphish yahge Kedema.

¹⁶Nyamoq gas nyamoq nyang nyeis dah wus, thoeng dah joqyos mas chank las nyhink dah zaulo dvci aiq yuk nghuot.

¹⁷Ishmael gas dvxo somhci nyhet zvn kang dwis khoq las shei. Nyang gas nyah dius jens nyeis yvmas jweh loh.

¹⁸Nyamoq gas Hawila masyah Shur jweh shoq nyeis. Houka Egutu masyah buisthuq shot Asiria pheh loh cho mha nghuot. Ishmael dah mau gas nyah boekyis dvnganhmoq nyeis dah mau yvm mas nghuot.

¹⁹Heika Abraham lo Isak dah diusjangh caiq nghuot. Abraham gungs mas yaus zis Isak nghuot.

²⁰Isak gas yhensain nyhiq Rebeka lyis yoeus uhlyis nyeici zvn nghuot. Rebeka gas Padan Aram mas dah Aramean dius Bethuel dah lonyi, Laban dah nhamhmuh nghuot.

²¹Isak gas nyah yhensain nyhiq Rebeka lo ma bos yvmvyah YHENSAIN lhyi dung; YHENSAIN eq nyang dung dang gyo dyei las nyah yhensain nyhiq ung mha loshang chi los.

²²Housoeh hau ung mas dah lozoms gas zan-goh nyeis. Housoeh las nyah ungwes gas, Ngos lyis heisoeh mus zis gas chamus las au, ge. Housoeh nyang gas YHENSAIN jyank mas e nyei.

²³YHENSAIN ka, Nah ung mha dius aiq nyau bos; nah gungs masyah dius aiq nyau gang joq. Dvnyau gas gohtoeu dvnyau thoq lyis yom zes bos das, kuh soeu ka ngis soeu jyank mas jyeidwis duot das, ge.

²⁴Buisnyeis dyingh las khoeu los lyis yoeuh aq, lozoms nghuot.

²⁵Xik lyis vyuk gas mauh yuk dah mis teh dvgungs yah nes: housoeh las nyang lyis Esau nyhink.

²⁶Thang mha vyuk gas Esau dah khyeichuk lyis toek toek nyhik las khoeu los las, nyang lyis Yakop[23] nyhink. Lotang khoeu los uhlyis Isak gas khyukci zvn bos goeus.

²⁷Hauh lotang bes los las Esau ka shoh khat joeui bos las mhanhdyvp mas nyeis soeu bweh los. Yakop gas ehnyet nyens zis yah zvng mas nyeis soeu nghuot.

²⁸Isak gas Esau dah khat shoh xauh zo las nyang lyis jyet. Rebeka gas Yakop lyis jyet.

²⁹Dvnyeih gas Yakop zonoms jyauq nyeis lyis Esau gas mhanhdyvp masyah yuot shet wvng los.

³⁰Esau ka Yakop lyis, Hai nah conhnes ngos lyis dvtsiq jenh gvmtsoh aq, ngos nyungdaus yuot shet los, ge. Housoeh las nyang lyis Edom[24] ge nyhink.

³¹Yakop gas, Khvnyhik nyang nah loxeih toeuh ngos lyis ungh dyei aq, ge sang.

³²Esau ka, Ngos yuot las shei loh, ngah loxeih toeuh ngos cha kuot das, ge.

³³Tsai, Yakop gas, Housoeh nvng maukhi toh aq, ge. Nyang maukhi lha nyah loxeih toeuh ungh dyei.

³⁴Hauh thang lhyi Yakop gas Esau lhyi sunghso lhyoq yahge nuk yings gvmtsoh. Nyang hauh zis dye zo shuk goeus ya doms toq thuq loh. Housoeh Esau ka nyah loxeih toeuh lyis mvgon kuot tyamp.