Read Achang VPOM 27 Bible Online

VPOM 27 - Achang bible

VPOM 27

¹Gvshih Isak gas mang las nyoqjet goeus. Nyang gas nyah loxeih Esau lhyi, Vlo eh, ge lui. Nyang eq, Ngos heimha nyeis, ge toeuh.

²Nyah uwus Isak gas, Yoeuh aq, ngos mang goeus, ngos kha nyeih shei das zis ma seq.

³Housoeh las ngos ma shei shih lyis nvng nah shohkhat vyhang lyei yahge nyo thuk yoeus wons las ngah xiklyis mhanhdyvp mas shoh loh khat wons los aq.

⁴Housoeh ngos o khyvlyis ba jyauq los aq, ngos zo las nvng lyis shvmanh dyei bah, ge.

⁵Isak nyah lo Esau lyis housoeh taiq dang Rebeka xauhgyo. Gvshih Esau ka mhanhdyvp mas shohkhat loh goeus.

⁶Hauh gyo lyis Rebeka gas nyah lo Yakop lyis khi yoeus las, Yoeuh aq, nah uwus gas nah vmang lyis taiq dang ngos xauhgyo.

⁷Houka, Ngah xiklyis shoh baiq las ngos o khyvlyis ba jyauq los aq, ngos zo las, ngos ma shei shih lyis YHENSAIN xik mas ngos nvng lyis shvmanh dyei bah, ge nyeis, ge.

⁸Housoeh las ngah lo eh, ngos taiq shet khyvlyis gyo aq.

⁹Shvbeq phung mha e lha, hou mhayah coeu yungh dah shvbeq lo aiq doeu khyen los aq; nah uwus zo mes khyvlyis ngos ba jyauq bah.

¹⁰Nvng nah uwus jyank yoeus loh aq, nyang zo las nyang ma shei shih lyis nvng lyis shvmanh dyei bas jungh, ge.

¹¹Yakop gas nyah ungwes Rebeka lhyi, Yoeuh aq, ngah vmang Esau ka mauh yuk soeu nghuot, ngos gas jyot jyot nghuot.

¹²Uwus ngos lyis sop yoeuh mvbeh; hauh uhlyis ngos nyah xikkhonh mas mhuih soeu bweh las shvmanh yoh das gungsthaiq nhoengh zis xauh das, ge.

¹³Nghuot laus eq nyah ungwes gas, Vlo eh, nvng xauh dah nhoengh zis gas ngos lyis zangh bas jungh, nvng ngah dang dvgyo aq, shvbeq lo e yoeus los aq, ge.

¹⁴Housoeh las nyang nyah ungwes jyank mas shvbeq lo e tsain she los. Nyah ungwes eq nyah uwus o khyvlyis shoh ba jyauq.

¹⁵Hauh thang lhyi Rebeka gas, yhen mha joq, nyah loxeih Esau dah dyi yungh tsain yoeus las lonhungh Yakop lyis gvmhuot.

¹⁶Shvbeq yeis yah eq, loq yahge lainzain mas lyet dyei.

¹⁷Nyang jyauq toh shoh yahge sunghso lhyoq nyah lo Yakop loq mas dyei kat.

¹⁸Yakop gas nyah uwus jyank mas wvng las, Uwus eh, ge lui lyis, nyang gas, Nyeis vlo eh, nvng khayuk nghuot, ge.

¹⁹Yakop gas, Ngos nah loxeih Esau nghuot, uwus nvng taiq zis yah dvyhangteh ngos kuot goeus, toq tsung aq, uwus nvng nah ehnyet ngos lyis shvmanh dyei das zis hai ngah shoh zo dyei aq, ge nyah uwus lyis taiq.

²⁰Isak gas, Nvng hou iq khasoeh yoh nyap, ge vlo lyis lhom nyei. Yakop toeuh zis gas, YHENSAIN, nah Mangso ka ngos lyis lvnyap yoh yoeus nhang lha nghuot, ge.

²¹Isak gas, Ngah lo eh, ngah jyank mas ywi los aq, nvng ngah lo Esau nghuot ma nghuot ngos nvng lyis sop yoeuh bah, ge Yakop lyis taiq.

²²Yakop eq nyah uwus Isak jyank mas ywi loh las, uwus eq nyang lyis sop yoeuh uhjyangh, Thwe ka Yakop thwe, nghuot laus eq loq gas Esau dah loq nghuot, ge.

²³Housoeh nyah loq gas vmang Esau dah loq teh mauh yuk yvmvyah, nyang Yakop nghuot zis ma seq las nyang lyis shvmanh dyei.

²⁴Isak gas, Nvng jyoengh ngah lo Esau vnghuot lah, ge lyis nyang eq, Nghuot, ge.

²⁵Housoeh las nyah uwus gas, Ngah jyank mas chi los aq; Ngah dyos yah ngah lo lyis shvmanh dyei das zis ngos nvng xo shoh zo bah, ge. Housoeh nyang chi wvng loh las nyah shoh zo dyei, zvbiq eq chi loh dyei las shuk.

²⁶Hauh thang lhyi nyah uwus Isak gas nyang lyis, Tanh tanh los aq ngah lo eh, bvlot los tanh aq, ge.

²⁷Yakop eq ni loh las nyang lyis bvlot tanh. Nyah uwus gas nyah dyi lyis nam las, yoeuh aq, ngah lo dah shom ka YHENSAIN shvmanh dyei dah danh pa shom teh nghuot.

²⁸Mangso ka mau mas jyweh nyeis mas coeu eq, guk nyoshoq yahge zvbiq eq nvng lyis dyei los das:

²⁹Gohnyau bang nah jyank mas jons mus las, gohmau gas nah xikkhonh mas gop bas jungh. Nvng nah vmang vnoeuh yhensain duot las, nah ungwes dah lo jens nah jyank mas gop bas jungh; Nvng lyis nhoengh bang nhoengh zis xauh bas jungh, nvng lyis shvmanh dyei soeu ka shvmanh zis xauh bas jungh, ge nyang lyis shvmanh dyei.

³⁰Yakop gas nyah uwus dah shvmanh xauh las nyah uwus xikkhonh masyah thuq loh dvsoq lyis, vmang Esau shoh khat loh masyah jweh los.

³¹Nyang eq nyah uwus jyank mas shoh ba jyauq chi loh las, Ngah uwus eh, nah lo lyis shvmanh dyei das zis ngos nah lo xo los dah shoh toq zo dyei aq, ge nyah uwus lyis taiq.

³²Uwus Isak gas, Nvng hank nghuot, ge nyei lyis nyang gas, Ngos nah loxeih Esau nghuot, ge.

³³Housoeh las Isak gas, Houlhyi nvng ma jweh shih lyis ngah jyank mas shoh zos chi los soeu ka hank nghuot goeus au? Hau zis ngos zo las ngos nyang lyis shvmanh dyei goeus nyvng. Nghuot goeus hauh soeu ka shvmanh zis jyoengh xauh goeus, ge svsoh mauh dvn zoh lyis taiq kyoh.

³⁴Esau ka nyah uwus taiq dang xauhgyo lyis kaiq ngaus zoh lyis yah, Uwus eh, ngos lyis eq shvmanh dyei aq, ge dung.

³⁵Nyah uwus gas, Nah vnoeuh gas joeui yah nah shvmanh mhuih yoeus loh goeus, ge.

³⁶Esau ka, Housoeh las nyang lyis Yakop[25] ge ma nghuot lhyeh? Haq lhain eq lyis nyang ngos lyis aiq lhain ungzo loh goeus. Ngah loxeih toeuh eq nyang yoeus loh goeus, gvshih ngah shvmanh eq doms yoeus tyamp dyei goeus: ngah xiklyis shvmanh dvkoeuq eq ma nyet lo lhyeh, ge.

³⁷Isak gas, Yoeuh aq, ngos nyang lyis nah yhensain duot aq, oen goeus; nyah vmang vnoeuh dvnganh gas nyah jyank mas jons mus bas jungh, oen goeus. Guk zvbiq eq nyang lyis thuk toenk dyei goeus: Housoeh las vlo eh, nah xiklyis ngos khasoeh seq kuot lo das lah, ge Esau lhyi toeuh.

³⁸Esau ka, Uwus eh, nvng shvmanh dvkoeuq kyingh dvyoh lhyeh? Uwus eh, ngos lyis shvmanh dyei aq, ge ngaus.

³⁹Housoeh las nyah uwus Isak gas, Nvng nyeis jang gas jenh yahge maukhung jyweh yah we das;

⁴⁰Nvng nah sham yah kang dwis das, nah vnoeuh jyank mas jyeidwis duot das: nghuot laus eq nvng toeu nghank los[26] nyeih lyis nyang nah thoq mas zau cho mhayah yoh luiq das, ge.

⁴¹Nyah uwus gas Yakop lyis shvmanh dyei gvng mas Esau ka Yakop lyis hoeng. Esau nghamh zo zis gas, Ngah uwus shei lha kuk das shishenh ni goeus; hauh thang lhyi ngos ngah vnoeuh Yakop lyis sat das, ge.

⁴²Hau loxeih Esau dang Rebeka lyis kyoh las nyang gas lo Yakop lyis khi lha, Yoeuh aq, nah vmang Esau ka nvng lyis sat las nhaiq shei sat bah ge.

⁴³Housoeh yvmvyah ngah lo eh, ngah dang gyo aq. Nvng Haran mas nyeis, ngah mungs Laban jyank mas lvnyap phang loh aq.

⁴⁴Nah vmang nhaiqyo bi shoq houmha dvyoq nyeis aq.

⁴⁵Nah vmang nhaiqyo bi las nvng, nyang lyis kuot dah muh nyang tohnyhik lho lhyi ngos nvng lyis doms shwih nhang das: dvnyeih dvm lyis nah aiq yuk lyis chamus yoh somh nhang das lah, ge.

⁴⁶Rebeka gas Isak lyis, ngos haih Hiti lonyi tang gvng mas ngos shei mes goeus; Yakop eq haih mau mas dah vmesbih teh dah Hiti lonyi dvyoeus nghuot lyis gas, ngos dwis nyeis shih das zis gas chah vkyuh bos lah, ge.